^
السلام عليكم ورحمة الله وبركاته ..
هلا والله وحياكم الله >>تلم عباياتهم وتعلقه ورى الباب
والله مدري كيف أبدأ بالموضوع تخبرون الطنزه ماله مقدمات .. تجي فجأه
بس الوكاد انه.. منتشر بيننا
نجي للتعريف :
الطنزه هي شماته مغلفه بقالب من الظرافه والتنكيت السامج غالباً
وتكون الطنزه في أحد من خلق الله , سواءً في شكله أو منصبه أو دينه أو أخلاقه أو طبخه >>تعاني من الأخيره
مره شفت وحده تتطنز بواحد وهي صغيره ويوم كبرت ماخذت الا هو
> لحد يتطنز بالرومنسيين مردكم لذا
المهم ..
دائماً ألاحظ اللي يتطنزون بشي / تجيه هجمه مرتده ولو بعد حين لنفس الشي اللي تطنز فيه
لذلك أنا حاطه إيدي بمويه بارده , اذا شفت احد يتطنز علي قلت في نفسي مردك تصير زيي
خلونا إحْبيَبْين .. ونترفع عن الطنزات اللي مالها داعي ..
ترا الطنزه مرده لصاحبه وين ماراح تلحقه >> درر عرق جبيني
يختي قبل لا تتطنزين حطي نفسك بالموقف وتذكري انها مردوده لك >>فالعقل يامره
يقول الرسول عليه الصلاة والسلام ((لايشمت احدكم في اخيه فيعافيه الله ويبتليك ))
عليه الصلاة والسلام ..
ترك لنا دين عظيم .. فهلاّ تخّقنا بأخلاقه ..
يقول عليه الصلاة والسلام .. (أكملكم إيماناً أحسنكم خلقا)
ويقول ..(إِنَّ سُوءَ الْخُلُقِ لَيُفْسِدُ الْعَمَلَ كَمَا يُفْسِدُ الْخَلُّ الْعَسَلَ )
الخلاصه ..
- لا تتطنزي على أحد ترا ربي ماهو بعيد
- لا تسوي لي فيها وتتطنزين بشي زين عشان يجيك >> الله يختبرك مب انتي تختبرينه !!
- إذا شفتي أحد مبتلى بشي مب زين احمدي الله على العافيه واسكتي .. >فمٍ ساكت مايدخله ذباب >>مدري حسيت المثل زابط يحث على السكوت
وبث ..
أتمنى يعجبكم الموضوع ويكون خفيف عليكم .. ومفيد وهو الاهم ..
وإذا عندكم تجارب لطنزات شفتوها وبعدين انقلبت على أصحابها إذكروها للعظه والعبره ..
لكم المايك ..