العاقلات ضروري يعطوني مشورتهم...الله يسعدكم

حبيباتي اعجبني فعلا ... ردود الكثيرات منكم وطريقة نصحها وحلها لكثير من مشاكل اخواتها الحوائيات
واليوم جاء دوري اطلب منكم المشورة ... باختصار حبيبات وزي منتو شايفين بتوقيعي عند قريبة سلحره لا تندهشون نعم ساحره تصنع السحر .. ومن نصيبي اني كنت من ضحاياها
الموضوع مو هنا الموضوع ان بنت اختها تصير زوجة اخوي شفتوا الحظ كيف وطبعا بنت اخوها تتعامل برضوه مع السحر ولكن السحر الأندنوسي ... المهم اتفقن علي ويا سلام دججوني بانواع السحر وانا يا غافلين لكم الله
حتى الشيخ قال الله اكبر اول مره ادري ان فيه ناس قلوبهم حجر من السحر الي شافه فيني / طبعا هو خبى علي واهلي كذلك حتى رحت عند راقية وخبت ولا رضيت تعلم اش فيني بس وصت امي بضرورة علاجي
زوجة اخوي قاطعناها وكذلك خالتها الساحرة ... وحاولوا يوصلون لنا باي طريقة ولكن احنا قطعنا العلاقة نهائيا
المهم من ضمن السحر كان عندي تعطيل زواج وتشويه جمال .. ولله الحمد والمنة وبقدرة الله جاني عريس وتعبت كثير ودسيت على الناس عشان ما يوصلهم خبر وقبل الزواج ب3 ايام عزمنا الناس وكان خارج مدينة جده
وطبعا زوجة اخوي زي الي تشوفونهم في المسلسلات محنكة في الشر والحيلة وممكن تسوي اي شي للوصول لهدفها
اقنعت اخوي قبل لا تضرني اني مصدر خطر على حياتها لاني متهورة وممكن اخرب بيتها وان اني راعية معاكسات وشباب وانا واخواتها هي خربانات وهي الوحيدة البريئة .. اخوي مصدق وزعل من امي لانها مقاطعه حرمته
وزعل اكثر عشان ما عزمناها للزواج ... تدرون انها ترسل بنات يتصلون على البيت بحيل مختلفة عشان تعرف رقم جوالي وانها مشككة اخوي بتربيتنا وتقوله امك طيبة بس البنات يكذبون عليها وترى امك فالتتهم ومدلعتهم .
الحمد لله بعد ما قاطعناها ارتحنا من المشاكل بس هي ما ارتاحت ابدا هي وخالتها وخصوصا يوم عرفوا اني تزوجت
وصارت ترسل لبيت اهلي اكل وحلى واحنا عارفين ان فيه سحر وراحت عند الناس وتبكبكت وقالتلهموان احنا قاطعناها بعد عشرة عمر وانها متأسفة وندمانه وهاجوا علينا اقاربنا واتهمونا بالحقد بس احنا ما علمناهم سبب القطيعه الحقيقي وصبرنا
المهم يابنات انا حملت وبدأت الأذية تدب فبيتي احلام وكوابيس واصوات وحشرات الين مات الجنين فبطني وجاني نزيف حاد من غير سبب طبي وانا عارفه انه خيره وكمان لاني اهملت في العلاج والرقية الشرعية / ورحت مكة ودعيت من كل قلبي وكنت كل جمعه اروح وادعي لأن الأطباء قالولي فيك كيس كبير فوق المبيض وراح يقتل الأجنة وما تحملين كمان بس الشيخة قالتلي انتبهي تسوين عمليه لأن هذا من السحر / والحمد لله يابنات ربي فرح قلبي وحملت مره ثانيه بس
شديت حيلي سرت اقرأ قران واتصدق وادعي وجاني نزيف وتنومت في المستشفى بس الحمد لله ربي رحمني الجنين حي
والجني اتكلم وقال مراح اخليكم تفرحون فيه ..وطلعت من المستشفى وواصلت العلاج بالرقيه والدعاء والصدقه بس يابنات
انتو اشرايكم انا ما علمت احد اني حامل وفالعيد حكون في الشهر السادس هل اخرج للناس عادي ويعرفون اني حامل ولا اكمل الكتمان الين ما اولد انا متوكله على الله بس اخاف يحقدون علي ويحسدوني انا مو عارفه اش اسوي واش التصرف الصيح اكمل بالكتمان او اعيش طبيعي ويدرون الناس ويعلمونهم اني حامل .. مشورتكم يا حلوات وآسفه على الأطالة