العبايه -- من الألف الى الياء

مساء / صباح الخير عليكم

كيفكم بنوتات
وشو عاملين مع المطر والبرد !
ربي يرحمنا برحمته ويجعلها امطار خير وبركه

ندخل بالموضوع
--

في هالوقت خصوصا مع المطر والرطرطه -- هواء -- و و و
الوحده من تطلع للبيت عشان تركب السياره تقول على طرف عبايتها السلام
على طول تتملى مويه ومن تنشف المويه تقلب رصاصي على ابيض على بني على لوعه كبد

--

بالتالي لازم نراعي هالنقطه اننا نهتم بغسل العبايه وخصوصا عبايه المشواير اليوميه
على الاقل بالاسبوع مره
وبالاوقات اللي مثل كذا لو لاحظتي انها نظيفه على الاقل اغسلي طرف العبايه من تحت
لأن كثره الغسيل تفقد القماش جماله ولمعته
ويمكن يحبب او ينتش
وان كانت مطرزه او فيه شغل راح يتفكك ويخرب و و و

وشامبو العبايات موجود الان وبكثره بالسوق
والافضل برأيي انا برسيل

 
وفيه انواع مختلفه مثل اومينو واريال وكل وحده واللي ترتاح له
وكمان لو ماكان عندك ومضطره تغسلين عباتك استخدمي شامبو الشعر لانه افضل من اي نوع صابون جاف يمكن يخلي العبايه تبهت

--

نجي لنشر العبايه الافضل انك تنشرينها على حبلين او على مكان عريض حتى مايكون فيه حز للحبل او سيم المنشر وارفعي الكموم على طرف المنشر عشان مايكون فيه ثقل على الخياطه من جهه الابط
>>>> ترى لها طقوس في نشر العبايه
وماانصح بوضعها بالغساله او النشافه
تراها ماتامذ خمس دقايق غسل عاليد

--

نجي للكوي
الافضل انك تكوينها بالبخار
والا بالمكوى العادي بس من جوى عشان مايعطيها اللمعه البايخه
وفيه انواع قماش جميله بالسوق ماتحتاج كوي مثلا الصالون والرهيب بدرجاتهم

--

احب اضيف نقطه تعليق العبايه
جيتي من مشوار على طول افصخيها وعلقيها
يعني حتى لو تعبانه مهدوده مايحتاج تقطينها على الكنب وتتكسر وتتعفط
ومو لازم بالدالوب
اي مشجب او علاق ملابس قريب للباب وبس

--

عند شراء العبايه لا تتحسفين وتختارين قماش اقل جوده عشان سعر ارخص
العبايه هذي مظهرك للعالم وكمان شي يومي تقريبا تلبسينها فلا تتحسفين بدفع الفلوس فيها
>> وجهه نظري مااعممها على الكل

--

نجي عاد للعبايات وعددها
بالنسبه لي عندي عبايه للمناسبات وعبايه لكل الطلعات
للمناسبات ولأنها متكلفه جدا ألبسها بالزواجات فقط

اما الطلعات فألبسها في مكان بر وبحر وسوق ومطعم و و و
ومااتحسف فيها ابد لأني كل كم شهر اغيرها فعلى الاقل احللها ومن هنا ابين لكم سبب اختيار قماش ذو خامه ممتازه

--

لازم تراعين عند اختيار العبايه ان قماشها مايكون لماع كأن احد راشك بهوز مويه
مايكون قماشها من النوع اللي يتكسر فتعطين لنفسك مظهر انك غير مباليه وغير مهتمه
ومااقصد بكذا انك تبالغين بشكلك
اقصد انا ان يكون المظهر العمومي مرتبه ونظيفه


جال في خاطري هذا الموضوع وحبيت نتناقش فيه
عطيتكم افكاري
وارحب بافكار كل وحده تدخل وتعطينا طريقتها وعدد عباياتها واقمشتهم


لكم ودي ،،