يمكن وايد بالقسم شفنا طرق للعصيده بطرق مختلفه واضافات مختلفه
وانا للامانه مدري اذا حد من زميلاتنا بالموقع نزل هالطريقه بس اتمنى تشوفون طريقتي وتعطوني رايكم لان يهمني وايد
طبعا مثل ما قلت عصيده بحرينيه عرفناها من يوم صغار وبالعاده تتسوا للمره الي توها والده او بالعيد او كفطور بأيام الشتا..مقاديرها سهله ومتوفره بكل بيت وراح اذكر الطريقه مع المقادير مع بعض
وقبل ما ابدا حبيت اقول شي اني الحمدلله حبيت بكرا ابدا رجيم وقبل ما اودع كل شي حبيت اكلها لاني وايد احبها اتمنى تدعولي ربي يقوي عزيمتي لاني احتاج انقص وزني بسبب مشكلات صحيه بس للاسف مافي عزيمه بس الله كبير
واتمنى بعد واسمحولي بثقل عليكم تدعون لي اتزوج الانسان الي ابيه ويبيني ويسهل امورنا عاجل غير اجل يارب
طولت عليكم وايد سامحوني من كل قلبي وندخل بالعصيده..
طبعا المكون الاول طحين ما راح احدد لج كميه معينه على حسب الاشخاص الي راح تاكل معاج انا ما كان حد معاي سويت كاس صغير يعني لا تتقيديين بهالنقطه
استعملت هذا الكاس البلاستيك ترا اعرض من كاس الجبن الصغير بشوي وسوري الكاس وصخ من الطحين
نضعه في قدر او اي شي يناسبج ونحركه على النار بدون اضافه اي شي حتى يصير لونه بني فاتح لا تخلونه يصير غامق عشان لا تحسين بمروره بعدين بالطعم انسب شي بني فاتح
راح يصير بعدين جذي وراح نلاحظ بعض الكور الصغيره المتكتله لونها ابيض مثل ما بتشوفين بالصوره
بعدها ننخلها طبعا عشان نتخلص من هالكور ونحصل على طحين بني ناعم
وهذي النتيجه بعد النخل
نرجعه لنفس القدر الي حركناه فيه بالبدايه وطبعا بعدين نكون مجهزين
زعفران منقوع بماي ورد وممكن شويه هيل مطحون وتوصي بالزعفران كل ما حطينتي اكثر صار الذ
ودبل الكاس ماء-الضعف- وممكن نحتاج اكثر شوي جهزي ماي حار بس مو يغلي يعني عادي
بالبدايه نضيف منقوع الزعفران
وبعدها السكر طبعا عادي مش مطحون وطبعا حسب الذوق وتقدرين تضيفين وتخلطين وذوقي وشوفي يحتاج اكثر او لا وضيفي اذا احتاج ونضيف الماء على طول وحطي شوي شوي لين تحسيته صار لين ومتماسك مثل الصوره
ونحرك
االين يصير شكلها بهالطريقه
وبعدين نحطها بصحن ونحركه الملعقه عليه حتى يصير بشكل مرتب
وطبعا في اثناء ما ارتبه بالصحن اقوم بتذويب قطعه زبده صغيره على النار ما راح تاخذ وقت
واقوم بوضع الزبده على العصيده<< لغه عربيه بحت خخخخ
وتقدم مع القهوه
ترا جدا سهله وما تاخذ وقت جربوها وبتدعولي اكيد
صحتين وعافيه لا تحرموني من تعليقاتكم