العقل الباطن لها كذا مسمى..العقل الساحر .. العقل اللاواعي .. والعقل اللاقط
يلقط كل شي وين ماتروح يجلس يلقط ويخزّن ..المشاعر والاحاسيس والخبرات
كلش يجمعه هالعقل
من والواحد جنين في بطن امه يبدا يخزن
زي مثلا طفل امه في مرحلة الحمل كانت دايم مكتئبه وشايله هم ومدري ايش
سبحان الله يجي البزر صياح بزياده
وهالشي اثبتته الدراسات ..
اقرب تشبيه للعقل الباطن هي السبوره تكون فاضيه وانت تعبيها
وتكتب وتكتب وتمسح الاخطاء
كذا العقل الباطن يكون فاضي وانت تخزن الخبرات وتخزن وتمسح الخبرات السلبيه وتستبدلها بأشياء ايجابيه
تجينا وحده تقول والله مدري ولدي وراه يخاف
والثانيه تقول بنيتي توها بزر وراها مهيب تتقبل تاكل اي شي
وش دراها ان هذا طعمه موب زين
الله يسلمك انتي وياها هذا تخزن عنده في عقله الباطن شعور الخوف وعدم التقبل
هالشي ماجاه الا انتم السبب فيه
لان والله حضرتك شفتي مره صرصور وقمتي تزاعقين وتناقزين فوق الكنب
ولقطتي بزرك بسرعه معك
هنا خلاص خزّن ان الصرصور والحشرات شي مخيف ومرعب
وصار كل ماشافها بيرتاع وبيصيح
وانتي كلتي مره زبيب بالغلط وقمتي تتقعشرين
ومتقرفه ومدري ايش خلاص تخزّن عندها ان هالشي موب زين
<< وجه يتذكر جمانه وهي مستانسه بالببسي ولا تبي خضار
العقل الباطن مثل المستودع يعطيك السلوكيات المتشابهه اللي مرت عليك من قبل
احياناً نلقى واحد عمره 18 سنه ويعاني من اكتئاب ولو درسنا وضعه الحالي بنشوف ان ماشاء الله حياته مستقرّه واهله موب مقصرين معه
بس لما نرجع لطفولته نلقى مثلا ان ابوه وامه كانوا دايم يتهاوشون ودايم يشوف امه حزينه وتبكي
خلاص هنا عقله الباطن تبرمج على المشاعر السلبيه
المجتمعات الشرقيه مثل الصين واليابان وطقتهم من وهم صغار وهم يتعلمون رياضة اليوقا
وهالرياضه تساعد على الاسترخاء ومفيده جدا للعقل الباطن
لانه جالس يكلم نفسه داخلياً ويرسل لنفسه رسايل ايجابيه
**وشو العقل الباطن ؟؟
كهو العقل المخزّن عند الانسان
يخزن كل شي أفكارك ..احاسيسك ..مشاعرك ..وتصرفاتك وسلوكك
ويخزن معتقداتك وتجاربك السابقه
يخزن كل المواقف اللي مريتا بها في حياتك
ايجابيه او سلبيه ..ومايفرق بين الحقيقه والخيال ..
كل شي يلقطه ويحطه فيه ..
الاحلام أحد منفسات العقل الباطن ..والله سهرانه ذاك اليوم
وجالسه تشوفين فلم رعب وكله عن الارواح والجن بسم الله الرحمن الرحيم
وخلصتي ورحتي تنامين
شي طبيعي راح تكون احلامك كلها عن هالشي اللي شفتيه
تلقينها تقوم مرتاعه وياربي وش هالحلم
وعلى طول تررررن ترررن << متصله على احدى القنوات
وياشيخ شفت جنّي
وعلى طول انتي مسحوره
وتبدا عاد مرحلة القرآءه والتشكك بالناس وتتميرض ومدري ايش
وهي كلها فلم شافته وخزّنه عقلها الباطن ونامت وطلعه لها
كثير اشياء مايصير لها حل بس نلقى الحلول واحنا نايمين
هنا عقلك الباطن وهو في حالة استرخاء وانتي نايمه
قام يسترجع الخبرات القديمه ويعطيك حلول
وتلقينك اول ماتقومين تقولين سبحان الله
لقيتها وانا امس كله اعصّر مخي ادور حل
وبعد من متنفسات العقل الباطن المشي اثناء النوم او يتكلم وهو نايم
<< الله من الفضايح اللي تصير
** ** **
أفضل مثال لفهم العقل الباطن هو تعلم السواقه
في البدايه تكون مره كل وعيك معك وواعي بكل شي حولك
وين تحط رجلك ووش تسوي بيدك ومتى تشغل الفلشر
بس بعد اسابيع وبعد ماتتعود تسوي هالاشياء بدون تفكير وبشكل تلقائي
تلقونه رافع رجله ومطلعها مع الدريشه ومتكّي كنه جالس بصالتهم ويسوق بيد وحده
** ** **
العقل الباطن هو المسئول عن كل المشاعر والاحاسيس اللي تجيك فجأه مثلا انت تخاف من المصاعد وداخل في السوق في أمان الله تتمشى وتبلع
فجأه شفتا المصعد تبدا تعرق وقلبك بسرعه يضرب وتتنحش عن هالمكان
العقل الباطن يايسيطر يايفقد السيطره
اذا سيطر يعطيك قناعات جديده وتبدا تفكر مع نفسك تقول اعقل مافيه شي يخوف ترى كلها مصعد
وان فقد السيطره بتصير خايف وبسرعه بتطلع من السوق وحالتك حاله
** ** **
فيه شي في العقل الباطن اسمه الساعه البيولوجيه
وش هالساعه ؟؟
هالساعه الله يسلمكم مهيب ساعه صدقيه << ساعه كذبيه
هالساعه موجوده في عقلك الباطن .. تبرمج عقلك انك بتقوم الساعه اربع
وفعلا ماتجي اربع الا وانت وقايم
انا الحمدلله عندي هالساعه .. ودايم اذا حطيت منبه اقوم قبله بدقيقه
وهالشي مايجي بين يوم وليله .. مايجي الا بعد برمجه وتكرار الين تتقن هالشي
يعني تحس فجأه كأن فيه منبه جاك من جوا .. تفز تقوم تحسب انك متأخر وكذا واذا ناظرت الساعه ولاه توه المنبه باقي له دقيقه ويرن
وهالشي برمجوا نفسكم عليه بس مو هالفتره ثم تنّكبون يروح عليكم الدوام وتفوتكم المحاضرات
سووها بالعطله
** عمل العقل الباطن ..
العقل الباطن مثل الكبيوتر وهذا اقرب تشبيه له ..الكمبيوتر له مدخلات ومخرجات
تجي تفتح اللاب وتدخل للفايرفوكس
وتروح لقوقل وتكتب فضايح المدري وشو
هذا كله يسمى مدخلات
اذا بحث قوقل وطلع لك المواقع وكلها لايمكن الوصول لهذه الصفحه
هذا يسمى مخرجات
كذا العقل الباطن كل شي يلقطه ويدخله
ويخرج الشي المكرر واللي متعود عليه بشكل يومي
** ** **
** كيف يعمل عقلك الباطن من أجلك ؟؟
بعطيكم مثال تشبيهي : اذا جا وقت الغدا وحطيتوا كلش على السفره شي طبيعي تجي وتمسك الملعقه وتبدا تاكل بشكل تلقائي
مايحتاج عقلك الواعي يقول لعقلك الباطن كل شوي يالله ارفع الملعقه يالله ودها لفمك يالله رجعها للصحن
شي تلقائي تسوي هالعمليه ..
وتقدر تدرب عقلك لعاده معينه مثلا واحد جاته بعثه وتوهق
وشلون باكل بالملعه وهو ماغير يضرب بالخمس
يبدا يدرب نفسه بشكل يومي انه يمسك الملعقه وياكل بها رز بخاري
اول مره بيطيح من الرز وبيتكبب
ومع التكرار والتدريب بيصير ابد تقل مولود في امريكا
** ** **
** عقلك الباطن لايصدر أحكاما أخلاقيه ..
العقل الباطن تنفيذ فقط ..كل شي يجمعه ومايفرق بين الصح والخطا وبين الخير والشر
بين قوسين ( مافيه ضمير ) مسئولية التفرقه تقع على عاتق العقل الواعي وهو اللي يفكر اللي يصلحه خطا او صح
** ** **
** فهم العلاقه التي تربط بين العقل الواعي والعقل الباطن ..
اقرب تشبيه له ربّان السفينه .. العقل الواعي هو الربّان اللي له شخصيه قياديه ويوجّه كل الانشطه على ظهر السفينه ..
اذا اخطأ الربان وعطاهم اوامر خطأ السيفنه بتنحرف عن مسارها وبتغرق ..
يعني الربان هو اللي له سلطه على ظهر السفينه ..
كذا العقل الباطن والعقل الواعي.. يجي العقل الواعي يتحكم في الاشياء اللي تصلح يسويها واللي ماتصلح مايسويها
** ** **
** كيف تتواصل مع عقلك الباطن ؟؟
التواصل يكون بالتغذيه ..يغذا بالمعلومات والافكار ..مثل الكمبيوتر
ولازم تعطي العقل وقت عشان يستوعب المهمه ويفهم الحدث ويؤلف المشاعر والاحاسيس
يعني مو والله تجي تبرمجه تقول اليوم بسوي الساعه البيولوجي وبتخلص من الخوف ومدري
كذا ترى بعلق عليك وبتظطر تسوي ريستارت
مثل الطفل لو قلتا له جب لي مويه بيستوعب وبيروح يجيب
بس لو قلنا له جب مويه ورح صك باب الغرفه ولا تنسى الشنطه نزلها معك وغير ملابسك
عطينا كذا أمر موب مستوعب وبيتلخبط ..
العقل الباطن عطه هدف واحد عشان مايتشتت ويتبرمج صح
** ** **
** الفوائد الاربعه التي يمكنك الحصول عليها عندما تعرف كيف تتواصل مع عقلك الباطن :
1\ العقل الباطن يحل المشكلات اللي مايقدر يحلها العقل الواعي ..بعد مايسترخي الواحد او في الحلم او يتذكر خبرات سابقه ويسترجعها ..
2\ العقل الباطن يعطيك افكار جديده وطرق مبتكره ماقد فكرتا فيها ..
3\ يعلمك وشلون تستخدم الحدس ( الحاسه السادسه _ الفراسه ) يعني يجيك شي سريع من الداخل
يعني تحس ان اذا رحتي لهالعزيمه بتلقين كذا وحده لابسه مثل لبسك
وفعلا اذا دخلتي بتلقين احد عليه مثلك ..
4\ العقل الباطن يخليك تحس بالاسترخاء والثقه في دوامك وأدائك في المهام ..
** ** **
** كيف يمكنك استخدام عقلك الواعي لحل مشاكلك ؟؟
<<لاحظوا اني قلت عقلك الواعي لاتصيرون مثلي احسبه يتكلم عن الباطن الين خلصت النقاط
شكلي كنت أهوجس بحليب الشوكلاته اللي شربته
طبعا اي مشكله في الدنيا لها حل ..
1\ اول شي تحدد المشكله ..مثلا .. يجيك واحد يقول ياربي انا ماعمري دخلت اختبار وحليت زين
2\ حدد سبب المشكله..يعني تعرف متى طلعت هالمشكله وليه طلعت ..
وهالشي لازم تبحث في نفسك عشان تكتشف وشي الاسباب ..ونفترض ان السبب هو الاهمال..
3\ حدد جميع الحلول الممكنه ..يعني تقول لازم اشد حيلي من بداية السنه
<< كل سنه لازم هالجمله تنقال
.. احط جدول للمذاكره بشكل يومي ..الجديه..أغش ..4\ قيّم الحلول الممكنه .. تشوف هل هي مناسبه او لا ..وهل هي صح او خطأ
( وطريقة التقييم اكتب كل الايجابيات والسلبيات لهالحلول)
5\ دع عقلك الباطن يتخيل أفضل الحلول ويختارها..
6\ ضع الحل في حيز التنفيذ ..وبعد مانفذه قيّمه شف هل حلك هذا نجح او لا ..
** ولازم هالخطوات تكون مكتوبه على ورقه **
** كيف يمكنك استخدام عقلك الباطن لحل مشاكلك ..
( ثمان نقاط ..سته منها نفس حقات العقل الواعي ..يبقى سبعه وثمانيه )
وقبل ماتنفذ رقم سته استرخي ..والاسترخاء العضلي من افضل عمليات الاسترخاء
7\ تحويل المشكله الى العقل الباطن لتحل المشكله .. ( تتكلم مع نفسك .. أبي أحل لمشكله ..
ماابي اكون خواف ) ثم تسرتخي ..
8\ اذا تلقيتا الاجابه من عقلك الباطن فتصرف بناء على التعليمات اللي تلقيتها منه ..
العقل الباطن يساعدك في التقييم .. فتجلس تتخيل الحلول اللي عطيته اياها
ويرتاح لخيال معين ..هنا اتبع الخيار اللي ارتاح له عقلك لان الارتياح الداخلي يأتي من عقلك الباطن..
** قوانين العقل الباطن **
( وعددها 12 قانون )
1\ قانون نشاطات العقل اللاواعي : والمقصود منه ان اي شي تفكر فيه بيتسع وتشوف منه الكثير
مثل لو كنتا واقف على الشاطئ وشفتا سمكه
من كثر ماانت تفكر فيها وتتأملها بتلقى نفسك تشوف كذا سمكه ..
وهالشي يوصلك للقانون الثاني ..
2\ قانون التفكير المتساوي : يعني الاشياء اللي تفكر فيها كثير وتشوف منها الكثير بيخليك تشوف شبهها بالضبط ..
يعني انت تفكر بالسعاده بتشوف اشياء ثانيه تذكرك بالسعاده..
وهالشي يوصلك للقانون الثالث..
3\ قانون الانجذاب ..يعني اي شي تفكر فيه بينجذب لك ..العقل الباطن مثل المغناطيس
اذا انت تفكر بشكل ايجابي بتنجذب لك وفس الشي بالتفكير السلبي
مثلا جالس متكي وتفكر في فلان وانك مشتاق له ..فتلقاك مايمديك توقف عن التفكير الا وهو متصل عليك وهالشي مثل التخاطر
او انتي تبين شي من ابوك وراافض نهائيا ..نفرض انه جوال..تروحين تصلحين له شاهي وتفكرين وتدعين يارب ابوي يوافق
وانتي تقدمين له الشاهي تفكرين تقولين اتمنى الحين اذا سألته يوافق
وشوي تلقين امك قايله وراه يابو فلان ماتشتري لها جوال .. تشوفين ابوك على طول يقول ان شاء الله بعد الصلاة خلكم جاهزين نروح نشتريه ..
4\ قانون المراسلات : يعني عالمك الداخلي يؤثر على عالمك الخارجي .. الصراعات الداخليه تعكس على تصرفاتك ..
5\ قانون الانعكاس : يعني ان عالمك الخارجي يرجع لك ويؤثر على عالمك الداخلي
مثلا رايح عزا .. العالم الخارجي للعزا كله حزن ..وتصير مكتئب ..
6\ قانون التركيز ( ماتركز عليه سوف تحصل عليه )
يعني اي شي تركز عليه بيأثر على حكمك على لاشياء وعلى شعورك واحاسيسك ..يعني اذا ركزتا على التعاسه بتصير مشاعرك سلبيه ..
7\ قانون التوقع: يعني اي شي تتوقعه وتحط معه شعورك واحاسيسك بيحدث لك في عالمك الخارجي
مثلا توقعتا انك منتب ناجح وبتفشل في هالماده ..بتلقى نفسك يوم الاختبار ماتقدر تفكر وماتعرف تجاوب على الاسئله..
8\ قانون الاعتقاد : يعني اي معتقد تكرره اكثر من مره وتضع معه شعورك واحاسيسك بيتبرمج هالاعتقاد في مكان عميق جدا في عقلك اللاواعي
مثل انه يعتقد انه أتعس انسان في العالم
بيتمرج عقله الباطن انه تعيس وبيعيش في كآبه وحزن ..
9\ قانون التراكم ( مهم ) : اي شي تفكر فيه اكثر من مره وتعيد التفكير فيه بنفس الاسلوب
ونفس الطريقه بيتراكم هالشي في عقلك الباطن مثل لو كان عندك خوف اجتماعي .. تحاور نفسك
انك بتواجه الناس وكل يوم تكرر هالشي ..يروح عنك هالخوف وتقدر تواجه الناس
10\ قانون العادات : اي شي تكرره باستمرار وكل يوم بيتراكم ويتحول لعاده دائمه
مثل موضوع الكتابه عند الاطفال
11\ قانون الفعل ورد الفعل ( قانون السببيه ) اي سبب بيكون له نتيجه حتميه واذا تكرر نفس السبب بتحصل نفس النتيجه ولا يتغير الا اذا تغير السبب ..
مثل لو كنت دايم تفكر بطريقه سلبيه
بتصير دايم تعيس ولن تصبح سعيد ..مادامك تفكر بهالطريقه بتعيش اغلب وقتك بحزن..
12\ قانون الاستبدال : اذا بغيتا تغير اي قانون من القوانين السابقه فلابد انك تستخدم هالقانون
تاخذ اي قانون وتستبدله بطريقه ثانيه من التفكير الايجابي..
** ** **
** من أهم تدريبات برمجة العقل الباطن ..
( مايتقبل الا في حالة الاسترخاء )
* تدريب حواري لتقوية الحوار الايجابي ، وماينفع اي تحاور ..الا بهالطريقه ..
1\ تستلقي على ظهرك وتغمض عيونك
2\ تتنفس من عشر مرات لعشرين مره ..والافضل عشرين ..ويكون بعمق وبطيء مو تجي تتنفس عشرين مره كنك تلهث
3\ تحاور نفسك بشكل ايجابي بلغة ( الياء ) وهالحوار اساسي قبل ماتبدا تبرمج لهدفك
ياغاده انتي قوية الشخصيه .. ياغاده انتي تقدرين تتخلصين من المشاعر السلبيه ..
ياغاده انتي واثقه من نفسك .. ياغاده انتي تتحدين أفكارك السلبيه ..
ياغاده انتي نقدرين تتحكمين في قلقك وتوترك ..ياغاده بسطي الامور ..
ياغاده أحسني الظن وتفائلي بالخير .. ياغاده تقدرين تتحكمين بحساسيتك الزايده ..
ياغاده انتي تقدرين تواجهين الآخرين بثقه .. ياغاده انتي تقدرين تحاورين الآخرين ..
4\ استخدام لغة ( الأنا ) القويه مع استخدام ( نَفَس ) بعد كل عباره بلغة الأنا..
نفس الخطوات اللي فوق بس نشيل ال ( يا ) ونحط ( أنا )
مثل أنا قوية شخصيه << ثم نتنفس بعمق
** ويستخدم هالخطوات لمدة 3 أسابيع متوااصله ومرتين في اليوم ..
ولو قطعنا هالبرمجه يوم واحد تروح كل البرمجه وترجع تعيدها من اول ولمدة ثلاث اسابيع **
** ** **
** خمس قواعد أساسيه لبرمجة العقل الباطن :
1\ رسالتك لازم تكون واضحه ..
2\ رسالتك لازم تكون ايجابيه ..
3\ رسالتك لازم تكون مستخدمه للحاضر وماينفع للماضي ..
4\ لازم يصاحب رسالتك احساس قوي بمضمونها ..مثلا تعيش شعور قوة الشخصيه
5\ رسالتك لازم تتكرر كذا مره ..اجبر نفسك بالغصب تبرمج بشكل يومي ..
** الطريقه العقلانيه لمقاومة الأفكار السلبيه المحبطه ..
( من افضل الطرق التي تطرد الافكار ..مثل انا انسان فاشل ..انا مااقدر اسوي هالشي )
1\ أخذ نفس بسيط ثلاث مرات .. تتنفس بشكل عميق وتطلعه مع الفم ببطئ ..
2\ تحاور نفسك .. أنا قوي الشخصيه .. انا واثق من نفسي ..وأنا أتحدا افكاري وحوارتي السلبيه واقدر اتغلب عليها .
.انا انسان ناجح وعندي المقدره على التغيير بإذن الله
..اللي داخلي حوار سلبي متطفل صادر من نفسي الاماره بالسوء ..
3\ أخذ ثلاث مرات نفس بكتمه .. يكون نَفَس قوي من الانف وتحبسه جوا لمدة خمس ثواني ثم تطلعه مع الفم
4\ أنا لست السبب انما هي نفسي الأماره بالسوء ..
5\ أخذ ثلاث مرات نفس طويل وقوي ..تاخذه بقوه وتطلعه بقوه من الفم << وهذي تنفع اذا انهزم فريقك في المباراة
6\ صرف التركيز : بتغيير المكان .. وتغيير النشاط
* وهالشي تسويه مع كل فكره او حوار سلبي *
** وافضل وقت للبرمجه اللي يتبرمج فيها عقلك تكون قبل النوم وبعد الفجر **
** ** **
وبكذا أكون خلصت موضوعي
حاولت اكتبه بطريقه مبسطه وبنفس الوقت مايخرب الموضوع
الحمدلله استفدت كثير وتبينت لي أشياء كثيره
وان شاء الله تستفيدون انتم بعد
منقوول .. ..