كلمات عااابره @klmat_aaaaabrh

عضوة نشيطة

العلاج الفتاك بإذن الله تعالى للجن العنيد والشيطان المريد (علاج السحر والمس )

بسم الله الرحمن الرحيم

بسم الله نستعين على كل جبار عنيد ظالم

انا ادري ان كثير من بنات المسلمين ابتلين بالسحر والمس والعين حتى لايكاد يخلو

بيت من بيوت المسلمين من مصاب بمرض روحي بس إن شاء الله نساعد بعضنا بعض

وأي وحده اكتشفت طريقه تحجم فيها هالجن وتضعفهم ماتبخل علينا وتساهم بتخفيف

المعاناة عن اخواتها المسلمات المتضررات من أذى الشياطين والجن وتصدقون ياأخواتي

اني كتبت الموضوع وماباقي عليه شي ويخلص الا ينمسح وتطير الصفحه وكنت ماراح اكتبه مره ثانيه

لاني بجد اتعب وتجيني ضيقه لما اكتب وخاصه لما احاول اكشف اسرار ونقاط ضعفهم

والله يقويني إن شاء الله واكتب موضوعي على خير ويستفيد منه كثير من الاخوات ومابي منكم إلا الدعاء بشفائي وإبطال سحري

نجي للمفيد ياحلوات وأي وحده منكم تعاني او اللي فيها بمرتبة شيطان مارد ومستقوي

ومجننها ومستقعد لها واذا راحت للشيخ وجلس يقرا الشيخ تفلت هالمارد وجلس يسب

ويتكلم كلام الانسان الواعي مايقوله بإذن الله تعالى انه بيتأدب ويتربى وبيصير من مارد الى

صرصور بس المهم اليقين والايمان بأن الشفاء من عند الله

اولاً : روحي لأقرب شجرة سدر وتنقي من هالورق الاخضر سبع سدرات وعالخلاط

وصبي عليهم علبة ماي صحه صغيره او نفس كمية علبة ماي الصحه وشغلي الخلاط

وياسلام بتسوين احلى ميلك شيك سدر وبالهنا والشفاء مقدما وطبعا هالعصير لازم تسوينه

كل يوم وتشربينه عالريق والله انه يضعفه ويحجم من قوته لدرجة انك راح تنسين ان فيك

شي وطبعا للتسهيل للي ماعندهم او قريب حولهم سدر اذا لقيتي سدر اخذي كذا غصن

مليان ورق سدر اخضر وزين واغسليهم وحطيهم بمشخاله وجيبي قصدير وقصيه

مستطيلات او مربعات وحطي على عدد ايام الاسبوع 7 ايام كل يوم سبع ورقات وحطي بكل

قصدير سبع ورقات سدر وصفطيهم كذا صفطه بحيث مايدخل هواء وبعد ماتخلصينهم

حطيهم بالفريزر وكل صبح طلعي قصدير وافتحيه وطلعي الورق بتلاقينه اخضر طازج

وكل اسبوع سوي نفس الطريقه واللي موظفه او طالبه تسويهم من الليل وتعبي ميلك شيك

السدر بعلبة ماي صحه وتحطهم بالثلاجه واذا صحت الصبح تشربهم وبالهناء والشفاء والعافيه عليكم

وبالعذاب على الشياطين والجن

وتتصبحين بسبع تمرات عجوة المدينه ( للامانه ماألتزمت فيها والا تراها شديده عليهم

ماتخليهم يجددون السحر )

وللي ترقي نفسها عند شيخ او هي ترقي نفسها قبل الرقيه ( بس للي ترقي نفسها اخاف

تتعب او تطيح لازم يكون عندها احد ) في حاجه تسوونها تكسر خدام السحر والمس

ادري الحين كل وحده تقرأ جالس الشيطان والجني يقرأ ويدعي علي ويكرهني لاني علمتكم

اسرار تعذبهم

شوفو ياحلوات تروحون للعطار وتشترون سدر مطحون ناشف زي الحنه حلو وبعدها

تجيبين طاسه حطي فيها خمس ملاعق على حسب اللي يكفيك وصبي عليها ماي واعجنيه

مثل الحنه لاتخلينه سايل خليه زي الزبادي وبعدها ادهني فيه كل جسمك لاتخلين ولا مكان

وتعالي لراسك يازين راسك عاد هالمنطقه هي اللي يتمركزون فيها وقت الرقيه علشان

يتحكمون فيك حطي السدر مثل الماسك كأنك مسويه حمام زيت او حاطه حنه ولفي شعرك

والبسي ملابسك وتوكلي على الله وروحي للرقيه وشوفي شبيصير فيه ياأنه بيصايح

ويصارخ ويقول حرقتوني بالسدر ياأنه بياكل هوا ومن بعد السب والكلام الوصخ بيسكت

ويقول ارحميني ذبحتيني بالسدر ياإنه بيسبني لاني علمتكم الطريقه بس ماعليه المهم انتم

ادعوا لي دعوه بظهر الغيب لعلها تكون سبب بشفائي وتفريج كربتي

ياسلاااااااااااااااااااااام الحين خلصنا من اول علاج فتاك للشياطين المرد والجن العاصي العنيد

ثانيا : ياسلام على ثانيا ياهوووووووووووووووووووه ياأنها بتربيه هالثانيه

الحجااااااااااااااااااااااااااامه

ياهي عجيبه وياليتني عرفتها وطبقتها من يوم ماعرفت علتي اهم شي اختاري وحده تحجم زين

وتعرف تشرط زين حجمي الراس اليافوخ والقمدوحه والكاهل والاخدعين وسلسلة الظهر

وظهر الرجل وهي تعرف وين تحجمك فيه بس المهم ابدي بالراس والله انها عجيبه انا يوم

سويتها شي عجيب والله ان راسي يطبخ وتشوفون فقاعات والدم يطبخ كأنك حاطه ابريق شاهي على
النار وهو يغلي الدم كذا يغلي ولونه اسود وهذا معناته وجود التهاب واخلاط رديئه طبعا كله

اوصاخ وعقد الجن ولا بعد ازيدكم من الشعر بيت شي عجيب يابنات والله اني كنت اسمع

ومااصدق يقولون ان خادم السحر يحضر على الواحد وقت الحجامه ماصدقت وفعلا انا يوم

الحجامه حسيت بشي عجيب مع ان اول مادخلت عادي بس يوم حطت الكاسات علي تقولون

معلقه بخطاطيف اللي يعلقون فيها الاسماك احس بشي عجيب كأني بعالم ثاني وجلس يصايح

بشكل مو طبيعي خايف يقول لاتذبحوني لاتفكون العقد ومن هالكلام فسبحان الله صدق رسولنا الكريم صلى الله عليه وسلم :
في صحيح البخاري : عن سعيد بن جبير ،عن ابن عباس ، عن النبي صلى الله عليه وسلم ،

قال :

" الشفاء في ثلاث : شربة عسل ،وشرطة محجم ، وكية نار ، وأنا أنهى أمتي عن الكي " .

شوفو الحديث ماحدد الشفاء من ايش الشفاء من أي مرض والمرض الروحي اقصد الجن

والشياطين يعتبرون من الامراض اللي تصيب الانسان لانهم عايشين بجسمنا وتلاقين الجسم

مليان اخلاط رديئة منهم

والله يابنات طلع من راسي شي عجيب ومن ظهري مثل الكبده سودا سبحان الله وحجمت مره

ثانيه علشان الدوره ماتنزل علي مثل الناس بس شوي وتوقف وقالت لي المحجمه تعالي ثاني يوم

الدوره علشان البويضه توها تفتح وتنزل المهم رحت عندها وحجمتني طبعا ولان خادم السحر

عندي متمركز بالارحام يحاول يمسك الدم مايطلع وطبعا حتى بالمره الاولى كانت المحجمه

بحرب علشان الدم يطلع وهو ماسك الدم حتى مكان الحجامه صار الجلد اسود المهم ثالث مره

للارحام ويالله طلع دم المهم بعد ماحجمتني امرتني انزل واطلع يعني اوقف واجلس واتعصر

وسبحان الله يطلع مني كتلة دم وثاني يوم يطلع مني كتله متجمده اول مره تطلع معاي كذا

وبعدها الحقير وقف الدوره علي بس مش مهم قالت لي المحجمه إن شاء الله الشهر الجاي

تنزل الدوره بشكل افضل بس والله يابنات الحجامه رااااااااااااااااااااااااائعه رووووووووووعه

بس لازم الاستمرار عليها المسحور لازم يسويها كل اسبوعين وانا بشهر سويتها مرتين

وحسيت الحمدالله بتحسن وهذا بفضل الله سبحانه وتعالى المهم الاستمرار يابنات

والله ان اول مره سويت الحجامه ماطلع معاي دم الا قليل وفي اماكن ماطلع منها دم ابد صار

المكان اسود بس ثاني مره طلع

اللي لاحظته من خلال تجربتي اغلب إلا كل المسحورين مزاجهم دايم متغلب سرعة الغضب

العصبيه كل هالاعراض بتخف مع الحجامه والسدر بإذن الله

وبالنسبة للسدر اقصد الميلك شيك الطازج ممكن تطبقين حديث الرسول الكريم انك تشربين ثلاث رشفات منه والباقي تمسحين به على كل جسمك حتى شعرك وممكن تجيبين بخاخ من ابو ريالين وتعبينه سدر وتبخين على شعرك وللمعلوميه ترى للسدر فوائد عديده منها :

1- تدمير لنفسية الشيطان المارد والجني العنيد

2- راحه نفسيه للمريض ورفع للمعنويات

3- لصفاء وبياض ونقاء البشره ياسلاااام عالسدر انك تغدين بيضا قشطه واللي بشرتها دهنيه

زين لها ويسكر المسام بعد خذيلك قطنه بلليها بالسدر وامسحي بوجهك وخليها لاتغسلينها

وحطي مكياجك وروحي لدوامك

قال الحافظ بنحجر في الفتح : ( وذكر ابن بطال أن في كتب وهب بن منبه أن يأخذ سبع ورقات من سدرأخضر ، فيدقه بين حجرين ، ثم يضربه بالماء ، ويقرأ آية الكرسي والقواقل ، ثم يحسومنه ثلاث حسيات ، ثم يغتسل به ، فإنه يذهب عنه كل ما به ، وهو جيد للرجل إذا حبس عنأهله ( فتح الباري - 10 / 233 ، أنظر " مصنف عبدالرزاق – 11 / 13 – برقم 19763

وانا عند الحجامه قالت لي قصص صارت معها منها سوت حجامه لوحده وسبحان الله ربي

شفاها والجني طلع بالحجامه وتقول والله ان الدم تطشر على الجدار لان الكأس طار سبحان الله

وحده ثانيه سبحان الله هي واختها متوقف نصيبهم ويوم سوو حجامه وهم يتزوجون سبحان الله كانت الحجامه من الاسباب اللي ربنا كاتبها لهم انهم يشفون فيها

طبعا الحجامه ماهي الا سبب من الاسباب اللي ربي كاتب ان البنت تشفى بالحجامه فعلينا بذل

الاسباب المشروعه والتوكل على الله فأي وحده تبتدي تدخل بنظامها وبرنامجها السدر

والحجامه مابيها تتعلق فيها وانها هي اللي بتشفيها ولكن حطي في بالك انها من الاسباب اللي

سبحان الله ربنا يكتبلك الشفاء فيها فالتوكل التام على الله وانه هو الشافي المعافي وحده وبذل

الاسباب المشروعه للشفاء كإختيار الراقي الثقه ومانتعلق فيه نروح ونرقي عنده واحنا موقنين

بأن الشفاء بيد الله ومالراقي الا انسان مثلنا مثله وسبب من الاسباب اللي سبحان الله ربنا يكتب

لنا الشفاء على يده بأمر من الواحد القهار

وبالله التوفيق وارجو أن يكون ماكتبته سبب من الاسباب المشروعه في علاج وشفاء اخواتي
المسلمات ومابي منكم غير الدعاء لي بالشفاء من السحر وان ربي يرزقني بالزوج الصالح اللي اتمناه والذريه الصالحه

97K

يلزم عليك تسجيل الدخول أولًا لكتابة تعليق.

تسجيل دخول

noralasil2005 • 14 سنة

الله يجزااااااك خير يالغلا

بس مين اللي تعرف تحجم وبأمانه

والله يشفيك ويزوجك ويرزقك الذريه الصالحــه وكل محرومه

..

رانسي .. • 14 سنة

الله يجزاك كل خير .. ويسعدك دنيا واخرة ..
وينصرك على من اذاك .. ويفرحك بشفاءك عاجل غير اجل
ويجعل مااصابك كفارة لذنوبك .. ويرزقك الفردوس الاعلى لصبرك
اسلوبك روووعة .. حمستيني بصراحة استخدم السدر

عصير التوت والعنب • 14 سنة

جزاك الله خير

لاتسألني • 14 سنة

عصير التوت والعنب :

جزاك الله خير

جزاك الله خير

جزاك الله خير

تذكرت مره قرأت لحجامة تقول

إذا كانت المريضة تقرأ القران بنية الشفاء

تظهر له العقد الموجوده بالجسم اثناء الحجامة

فـ سبحان الله

اسأل الله العظيم رب العرش العظيم ان يشفيك ويشفي جميع مرضى المسلمين

سبحان الله وبحمده ، سبحان الله العظيم

اللهم صلي وسلم وبارك على سيدنا محمد عدد ماذكره الذاكرون وغفل عن ذكره الغافلون

كلمات عااابره • 14 سنة

noralasil2005 :

الله يجزااااااك خير يالغلا بس مين اللي تعرف تحجم وبأمانه والله يشفيك ويزوجك ويرزقك الذريه الصالحــه وكل محرومه ..

الله يجزااااااك خير يالغلا بس مين اللي تعرف تحجم وبأمانه والله يشفيك ويزوجك ويرزقك الذريه...

الله يجزاك كل خير على دعوتك الصالحه
شوفي حبيبتي ابحثي بقوقل عن حجامه بمنطقتك وراح تشوفين تجارب البنات وبتلاقين ارقام وعناوين الحجامات
انا سويت كذا والحمدالله لقيت حجامه بنت حلال الله يجزاها كل خير