هاد موضوعي حصري من كتابتي
حبيت انه يكون بهاد القسم لسببين :
الاول اني مهووسة عناية بالبشرة
التاني انه رفيقتي اخصائية طب بشرة
فحسيت انه عندي كتير معلومات بقدر افيدكم فيها .....
طبعا كلنا بنعرف انه العناية ببشرة وجهنا او حتى جسمنا باستمرار تضمنلنا انه نكتسب صفات جمالية، وتقاوم الاصابات والامراض والاثار السيئة، يلي بتكتسبها بشرتنا من البيئة
واكيد العناية ضرورية وما بنستغني عنها عشان نحتفظ بجمال وجهنا , طبعا كلمة عناية كبيرة شوي وبتشمل عدة جوانب مهمة مثل :
*الاستعانة بالمستحضرات الطبيعية للعناية بالبشرة
*الاهتمام بالناحية الغذائية عشان يوخد الجلد العناصر يلي بيحتاجها ليتجدد
*الابتعاد عن الاشياء السيئة يلي بتضر بشرتنا مثلا :التدخيــن والشمس لفترة طويلة
راح نحكي عن هاي الاشيا بالتفصيل ،لازم طبعا نحاول نهتم بالناحية الغذائية لانه الجلد بيوخد يلي بيلزمه من عناصر عن طريق الغذاء فبينتعش وبيتجدد وبيكتسب حيوية
وعشان نعتني ببشرتنا صح لازم نتجنب الاشياء يلي بتسيئ للبشرة لانها بتضر الجلد من الاعماق متل التدخين يلي بيعمل شيخوخة مبكرة للجلد ونحنا بس نلتقي بشخص مدخن ببين هالشي على وجهه بيكون الوجه هيك باهت وما في حياة واكيد بيختلف عن وجوه يلي ما بيدخنوا لانه التدخين بيكب سمومه بجسم الشخص المدخن
الاشراف
×××الصورة مخالفه×××
وكمان الشمس لما نتعرضلها لفترات طويلة وخاصة يلي بيعملوا تان ع الشواطئ بتساعد على انه تجعد الوجه وبتشيخ الجلد يعني ببين الشخص اكبر من عمره بكتير وعشان نحمي بشرتنا من الشمس بنستخدم كريمات واقية {جبتي اشي جديد}
امممممم في ناس كتير بيعطونا نصائح وارشادات بتخص البشرة، في منها صحيح وفي منها خطأ ومنافي للصحة لدرجة الخرافة { متعوب عليها الكلمة}
البشرة بتتأثر بالتغيرات يلي بتصير معنا وهاد الاشي يلي مخربلنا بشرتنا وضعنا الصحي والنفسي والاجتماعي كلها الها تأثيرات ع هالبشرة {الله يعينها}
وبزمنا هاد كثرت المستحضرات التجميلية يلي هدفها العناية لدرجة انه صار صعب تميزي شو يلي بيناسب بشرتك وصعب تختاري اشياء ما بتضرك {كانت تصير معي يا جماعة}
اوك الاشي الاساسي يلي راح احكي عنه بموضوعي لليوم
كيف تعرفي نوع بشرتك واساسيات العناية فيها
ضروري ضروري نعرف نوع بشرتنا عشان تكون عنايتنا ناجحة ، ليش؟
لانه لكل نوع بشرة عناية خاصة فيها
عشان تعرفي نوع بشرتك لازم اولا توقفي امام مرآة
تطلعي منيح ع بشرتك بتلاحظي مثلا انها لزجة ومزيتة؟
طيب في عندك رؤؤس سودا ع بشرتك؟
طيب بتتعرضي لالتهاب وحكة وافرازات دهنية خاصة عند الانف؟
طيب عندك حب شباب ؟
طيب في قشرة كتيرة بشعرك؟ {واخرتها مع طيب}
الاشراف
××× الصوره مخالفه×××
امممم اذا هاي المواصفات عندك فمعناها بشرتك دهـــنية
لانه يلي بميزها انه بتفرز دهون لانه عندها الغدد الدهنية يلي بالجلد كتير نشيطة
عشان هيك بتتجمع الدهون عليها وبتلزق فيها اتربة وغبار فبيطلع الناتج رؤؤس سودا
يعني : غدد دهنية نشيطة = دهون متراكمة + اتربة وغبار = رؤؤس سوداء
وكمان بتتعرض بسبب الدهون الزايدة لالتهابات جلدية مع حكة وعادة بتكون ع الانف
وبسبب هاي الدهون كمان بيطلع حب الشباب بفترة البلوغ
طيب ليش في عنا زيادة بافراز الدهون ؟ بسبب التغير الهرموني يلي بيصير بالجسماو اسباب تكوينية
وفي كتير ناس بشرتهم دهنية عندهم مشاكل بقشرة الرأس او الشعر وطبعا كمان بسبب زيادة نشاط الغدد الدهنية .
نروح لنتعرف على نوع تاني
بتحسي انه بشرتك خشنة ما الها بريق؟
بتعاني من القشب او تشققات بجلدك؟
بتلاحظي انه عندك حساسية من الميك اب ؟
الاشراف
××× الصوره مخالفه ×××
هاي مواصفات لصاحبة البشرة الجافة
يعني الغدد الدهنية يلي عندك نشاطها ضعيف على عكس البشرة الدهنية
طيب لو وحدة سألتني شو فايدة الغدد الدهنية ؟
اممممم بتفرز دهون تساعد على تليين الجلد
وهاي البشرة بتتعرض للقشب والتشققات في حالات انه الجفاف بكون شديد وكمان بتكون حساسة كتير من الميك اب عشان هيك ما لازم نتسرع ونحط اي شي عليها طبعا بقصد المواد الكيماوية مو الطبيعية قبل اختبار ملائمتها للجلد
النوع الثالث
اذا لاحظتي انه بشرتك دهنية في مناطق وجافة في مناطق اخرى
الاشراف
××× الصوره مخالفه ×××
معناها انت بشرتك مركبة يعني
دهنية بمنطقة التي زون يلي هي الجبهة الانف والذقن وجافة في الخدين
اما النوع الرابع فهو البشرة العادية متل بشرتي انا
بتتميز بانها معتدلة في افراز الدهون يعني بكون الجلد طري ما اله ملمس خشن ولا منظر زيتي ما فيها رؤؤس سودا ابدا ولا حتى مسام واسعة ونادرا جدا جدا ما يصيبها حب شباب (انا الحمد لله بحياتي ما طلعت بوجهي حبة)
اخر شي بدي احكي عنه اساسيات العناية
طبعا بتتراكم على بشرتنا افرازات وعرق ودهون وبقايا ميك اب وغبار واتربة
ولما تبقى فترة طويلة بتعمل على سد مسامات البشرة وبتكثر الجراثيم عليها وبتختل وظيفتها وبتبلش تظهر شوائب متل الحبوب والزيوان
لهيك لازم نهتم بتنظيف بشرتنا ونعتني فيها
يعني بنظف الوجه منيح وبنغسله مرتين باليوم ع الاقل وبنشيل المكياج قبل النوم عشان تتنشط عملية تجديد الخلايا يلي بتكون بقمة نشاطها وقت النوم
وكمان لازم ننظف بشرتنا الصبح عشان نشيل افرازات الليل واثار الكريم الليلي اذا كنتي بتستعمليه
وان شاء الله موضوعي الجاي راح احكيلكن فيه عن شو يلي بتحتاجه كل بشرة والمستحضرات يلي لازم تعرفيها وتستخدميها
هيك انتهى موضوعي بتمنى تكونوا استفتدوا واستمتعوا
ولا تنسوا تقيموني اذا بستاهل واي سؤال انا جاهزة
يعطيكي العافيه ع الموضوع الاكثر من رائع
انا بشرتي مختلطه يعني استعمل كريم للبشره الجافه ع الخدود والجبهه والذقن كريم للبشره الدهنيه<< عليها تفكير