العيد (( يالمتزوجات))

سامحوني يابنات على هذي الملافظ بس ياحول ماني قادره أستهضم العيد ..
أقولكم قصتي
تبون أقولها تراها مهيب شيء بس أتوقع فيه أحد مر فيها يمكن يفيدني ويفيد أخواتنا إلي بيمرون في ها التجربه ..
هذا ياطويلات الأعمار .. مثل كل بنت تحلم أنها تقضي العيد مع زوجها تهديه هدية العيد ويفاجأها هو بهديتهه .. ليلة العيد تكون مميزه وفيها شيء من الرومنسيه ..ترتب البيت وتبخره أستعداداً للعيد وتحط حلاو العيد في صواني أستقبالاً للضيوف والمهنئين ..وبعدين يزورون الأهل يوم العيد ثمن يخرجوا مع بعض يتفرجون في مظاهر العيد .. ( هذي أفكار أي بنت قبل ما تتنيل وتتكوز).
يعني بالعربي المشبرح تستمتع بالعيد مع زوجها .:icon33:

أول عيد قضيته بعد زواجي كان في بيت أهلي لأن زوجي كان مستلم ..
ولما فك أستلامه نقز لبيت أهله في مدينه ثانيه ولا شفت رقعت وجهه إلا خامس العيد ..
العيد إلي بعده قلت لا والله ما فكه رجلي على رجله ..( وعندي خطط جهنميه لليلة العيد ) طبعاً جينا قبل العيد بإسبوع عند أهله ونمنا في (((( مجلس الحريم )))) بما أن أهله ما عندهم غرف زياده ..
الطفش طقني قبل لآيجي العيد ... الزهق حاسني بغيت أشقق ثيابي ..وطبعاً هما ناس لا يخرجون ولا يجون بما أنهم في مدينه صغيره والحياة فيها أكثر من هاديه ..
تصبرنا كله عشان أقضي العيد مع قوزي حبة عيني ..:mouse: مالت علي
يوم جات ليلة العيــــــــــــــــــــــــد ..
ضبطت الغرفه (( إلي هي المجلس حق الحريم ))) وخليتها كأنها غرفة نوم وحطيت الوسايد والمفارش وفليت الشعر وتمرطست في العطر وجهزت كمن موضوع مضحك وجبت العصير وليلتنا فل بأه ..
وجلست أنطر طويل العمر ... ياشوي يجي .. ياشوي .. يابعد شوي .. إلا جات الساعه 3 الفجر .. (( طبعاً حنا في عيد الأضحى وثلاث الفجر تعني ثلاث الفجر )))..
ياخيبه ..:29: (
وأقوم وأضف عفشي وألم شعري وأشرب عصيري ودمعاتي على خدي .. وأرسل له رساله أذكره فيها أن هاذي أول ليلة عيد أقضيها معك بس للأسف أنت في مكان وأنا في مكان ..
وأخش في فراشي وأحاول أنام .. وتجيني الأفكار السوداء تكافخني وأكافخها ..
إلين دخل علي .. وقمت يعنني بصلي الفجر وغاطسه في النوم مادريت عنك ولا عن تأخيرك.. وأنا ودي:024:
قام الرجال يتعذر أنا مسكوني الربع تعرفين ليلة عيد وشباب وناسه ..
عادي عادي أقوله وأنا وجهي متفقع من الصياح ..
والله لأعوضك يقوللي .. وأختفي يوم العيد ماشفته إلا المساء ..قال إيش مع الوالد نعايد ..
وألحين ياعزيزاتي قررت إن عيد السنه هذي راح أقضيها عند أهلي وهو عند أهله.. وكل الأعياد بإذن الله لن أكلف نفسي فوق طاقتها وراح أستمتع بالعيد لنفسي وإلي يبي يشاركني حياه الله ..
آسفه أخواتي إني طولت عليكم بس ياريت كل وحده تحكي لنا قصتها مع العيد وكيف تقضيها مع زوجها ولا مع أهلها .. ولو كانت تقضيها مع أهلها إيش بتعمل بالضبط (( خصوصا بنات الرياض )) فين بتروح .. وكيف تنبسط ..لأني بصراحه مرتفع ضغطي وأحاول أخففه .. وسلامتكم