العين حق .. تعالوا وش صار فيني

السلام عليكم


الحمد لله على كل حال ونعوذ بالله من حال اهل النار

الحمد لله على نعمه العظيمه حمدا كثيرا مباركا يليق بجلال وجه وعظيم سلطانه ..


اول شي وقبل اقول وش صار لي ابي انبه كل اخت تبالغ بزينتها وتظهر محاسنها وجمالها انها تخفف هالشي وتقتصره على زوجها فقط


مشكلتي اني من النوع اللي يحب الاناقه جداا وبكل شي والحمدلله الله معطيني الجمال

للاسف عندي جاره عاديه جدا وطيبه .. عزمتها عندي الاسبوع الماضي وحسيت من كلامها انها معجبه جدا بكل شي فيني وحتى ببيتي وعالي وتتكلم كلام وحده كأنها محرومه من شي الله يرزقنا واياها كل خير ويعطيها ويعطيكم ويعطينا كل ما نتمناه من صالح لنا بالدارين


انا ما ارتحت لنظراتها بصراحه وخصوصا انه قبل كذا كان شعري مرررره يجنن طول وغزاره وجاته عين وطاح وصارت تقولي يا حسافة الشعر يمكنها عيني << تقصد نفسها

المهم كنت هذاك اليوم وكالعاده متزينه ع الآخر وحتى لبسي الله يهديني لابسه لبس مو محتشم مره يعني على اساس اني ببيتي ولا جاء ببالي اني ممكن يصير لي شي

راحت من هنا وانا قارصني قلبي منها وخايفه من عينها .. ويوم جاء اليوم واطيح على وجهي طيحه الحمد لله على كل حال وكان فيه شي قدامي حديدي بالجدار واطيح بوجهي عليه وتصير الارض كلها دم

انا قمت وانا ماسكه عيني واقول يارب اجرني في مصيبتي واخلف علي خيرا منها وان لله وانا اليه راجعون

والدم ينزف بقوه واناظر المرايه وطلعت الضربه من فضل ربي فوق العين وبالانف والدم غزير

الحمد لله الحمد لله هنا انا سجدت لله وشكرته بنفس الوقت يوم شفت عيني طيبه ما شاء الله

وربي حسيت اني بنعيم من ربي اللي جات بمنطقه غير العين الحمد لله

الآن وجهي الحمد لله على كل حال متورم وفيه خدوش اماكن الضربه لكن الحمدلله

وربي اول ما طحت تذكرت جارتنا جات ببالي بنفس الوقت انه عينها لاني حسيت من جد انه نفسها مرره فيني يعني اصابتني هالمره بوجهي الحمدلله عل كل حال


يا بنات عثمان بن عفان قال لولد صغير يوم اعجبه دسموا له نونته حتى لا تصيبه العين يعني حطوا شي بدقنه سواد عشان يبعد عنه العين

يعني زين نقرأ على انفسنا الاذكار ولا نبالغ بالزينه لغير الزوج

انا اخذت درس ما انساه ابداااا


العين حق ..

ادعوا لي ان ربي يخفف عني ويشفيني لاني حاسه انه جسمي مكسر ووجهي الحمد لله على كل حال كأنه صاير لي حادث ..


الحمد لله الحمد لله الحمد لله


اعتبروا يا اولي الالباب