الغربه !!! أيش غيرت فيكي ؟؟؟؟

السلام عليكم ورحم الله وبركاته،
أخواتي المغتربات حبيت أبتدي وياكم بموضوع الغربه أيش اللي غيرت فيكي ؟؟؟ وأيش هي الطباع الحلوه والشينه اللي اكتسبتيها بالغربه؟؟ شلي تغير فيكي وشلي أكتسبتيه وأنتي بالغربه؟؟ أيش عطتك الغربه وأيش أخذت منك ؟؟
وياليت توضوحون لنا هالأمور في نقاط عسى الله أن ينفع بها غيرنا من الأخوات اللاتي سيتغربون أو يفكرون بالغربه جزاكم الله كل خير ..:26::26::26:
وسأبدأ بنفسي وسأسرد لكم بعض الطباع اللتي اكتسبتها في الغربه والفوائد والمميزات الحلوه والشينه من الغربه :
كنت في الديره معتمده اعتماد كلي على الخدم وما أسوي ألا الشي البسيط * تعلمت بالغربه كيف أعتني ببيتي وتعرفت على أحسن الطرق الصحية لتنظيف البيت وترتيبه والبركه بمنتدانا الغالي وتجارب الأخوات الله يحفظهم.
كنت في الديره ما اعرف اطبخ الطبخ اللي على أصوله وكنت اسوي الحلويات بس* تعلمت بالغربه الطبخ وصرت أتفنن بألذ الطبخات وصرت أفهم بالمقادير وطريقه تزين الطعام والبركه أيضا في منتدانا الغالي وللأخوات العضوات.
كنت بالديره ما أجلس مع عيالي كثير لأنهم دايما يا مع أصحابهم يلعبون بالحديقه أو ببيت أمي مع عيال أختي أو طبعا بالمدرسه وأذا أجلس معاهم يكون بالمجمع وأماكن التسلية والترفيه * بالغربه صرت أجلس أكثر معاهم وأتكلم وأتناقش وأكتشفت مواهب حلوه عند بنتي وأنها تحب التلوين وولدي يحب القراءة خصوصا قرآة قصص الصحابه والغزوات وصرت أشاركهم في هواياتهم.
كنت بالديره أبالغ بالصرف على أغراض البيت والأثاث وأطقم الصحون وأغراض الضيوف وحتى الأغراض الشخصيه من عطور ولبس لي ولعيالي * بالغربه تعلمت الأقتصاد نوعا ما مثلا بدل 3 أو 4 عطور أشتر 1 واذا جرب يخلص أشتر غيره وبدل ما أصرف الكثير على أثاث البيت وأغراض الضيوف – اصلا بالغربه مافي ضيوف - صرت أميل للبساطه أكثر وما أكدس الأغراض الين ما تقدم وتصير قديمه وانا ما استخدمتها اصلا .
بالديره أحب بعد الصلاة قراءة آيات مما تيسر لي من القرآن الكريم وما اطول كثير نظرا للعيال ومشاغل البيت * بالغربه صرت الحمدلله أخلص السوره والسورتين ويكون عندي وقت بعد بس هذي مب معناه أن بالدير ما نقدر نكثر من الطاعات ولكن قصدت اني صرت أستغل وقت الفراغ اللي عندي بالطاعات .
كنت بالديره أزور بيت أمي الله يحفظها كل يوم بعد صلاة العصر ونجلس عندها كلنا مع العيال والأخوات الين وقت العشاء * طبعا بالغربه مافي تجمعات أهل ولا البيت الكبير اللي يجمعنا كلنا حوالين الوالده والوالد الله يخليهم. :44:
كنت بالديره لما استخدم الهاتف مع صديقاتي وخواتي وبنات خالتي كان الوقت يضيع على سوالف تافه مثل هموم العيال والبيت والخدم * الحمدلله بالغربه المكالمات غاليه وماعادوا يتصلون لي ألا قليل وصحيح اني أشتقت لهم ولسواليفهم بس أعتقد أن الوحده لازم تقضي الوقت مع صديقاتها وخواتها بالشيئ المفيد والكلام الهادف لأننا محاسبون على كل دقيقه في حياتنا.
كنت بالديره علاقتي مع أبو العيال عاديه وهادئه نوعا ما وشاغلتنا الحياه بمشاغلها * بالغربه صارت فيه بعض النقاشات والمناوشات بسبب ضغوط الغربه والضغوط النفسيه المترتبه عنها وعن الدراسه والحمدلله على كل حال.
كان أبو العيال في الديره أجتماعي ويحب العزايم وكان عضو ببعض الجمعيات * بالغربه صار أنعزالي وماله خلق حق شي ودايما يايقرا قرآن بعد الصلاة أو بالدراسه أو يقرا كتاب وهو جالس بينا.
بالديره عيالي كانو يذهبون بعد المدرسه لمركز تحفيظ القرآن ويروحون المسجد مع أبوهم وكانوا يسمعون الأذان في كل صلاة وكانوا يتربون على الخلق الأسلامي السليم بدون تعب ولا مجهود نظرا الى كوننا بلد أسلامي * بالغربه أتعب أنا وأبوهم ونحاول جاهدين الى ترسيخ القيم الأسلاميه عندهم خصوصا وان حوالينهم كل انواع الفساد والمناكر والعياذ بالله والله يعينا على تثبيتهم بمشيئته سبحانه.
أعذروني أني طولت عليكم بس حبيت أني أسرد لكم تجربتي الشخصيه بالغربه وأعرف أن ليست كل الأخوات لديهم نفس الأنطباعات عن الغربه لذا أحب أن أسمع منكن ..
تقبلوا تحياتي ..