💝 الغيرة المرضية 💝

الغيرة المرضية

*الشخصية البارونية الشكاكة والشخصية الكحولية والشخصيات التي لديها تجارب جنسية كثيرة سابقة وفاشلة إبان الصبا مع الجنس المغاير والناس اللي عاشو في بيئة كان نظام التربية فيها اكثر صرامة واكثر تحفظا ....والترسبات النفسبة واحداث طفولية سيئة عاشها الفرد ايام نعومة الاظافر كلها عوامل تجعل الشخص مرشح انو يصاب بالغيرة المرضية
*والغيرة المرضية ذي الورم الخبيث في النفس البشرية وتدفع العلاقة الزوجية للخلف بدل تسحبها للامام ومنتشرة اكثر بين الرجال
بتحول دائما حاجات جميلة للنقيض
تحول الحب للكره
تحول الحنان للقسوة
تحول التفاهم لصرامة
تحول الحوار لعدم المناقشة
تحول النفس الحلو بين الازواج للنفس الساخن
والصوت الرقيق للغلظة
تحول اي شي للاشئ
*وعشان نقول فلان غيرتو هذي مرضية لازم سلوكو وانفعالاتو وتصرفاتو الغيورة دي تكون خارج المألوف وتكون بغيضة ومؤزية للطرف الاخر
في الغالب نلاحظ انه شخص عابس كذا وتوطيبات الغضب ظاهرة بين حواجبه ودائما اخلاقه في طرف انفه تحس بيه مامرتاح نفسيا دائم التوجس والتوتر وحساسية مفرطة والانشغال االدائم والمستمر بتفسير تصرفات الزوجه من والي..... وشك دائم بدون مبرر
علاقاته الاجتماعية فقيرة او تكاد معدومة السبب مابثق في االزمالة او الصحبة اطلاقاً...والعزلة الاجتماعية في حد ذاته مشكلة تانية
علي فكرة الغيرة المرضية ممكن تتطور اكتر وتصل للضلالة التشككلية كعرض من اعراض الفصام في الاضطرابات الذهانية
ويعتبر بتاع الغيرة المرضية برج مراقب لزوجته اكتر من مراقبة ناس ابراج الملاحة الجوية لسير حركة الطيران الهابط وصاعد في المطار
وطوالي ليل نهار مادي اصبعو في وجه زوجته وفي حالة ور ورة وتهديد وتوعيد وتحزير من ديل
بتاع الدكان لا
بتاع الخضار لا
الجزار لا
بتاع الصيدلية لا
بتاع اللبن لا
بتاع الفرن لا
المكوجي لا
ود الجيران لا
خالي لا
عمي لا
ابوي لا
اخوي لا
مابثق في اي مخلوق احتك بزوجته حتي لو اقرب الاقربين
وتحقيق مستمر واكثر الجمل ترددا
منو هذا ? وعاوز شنو ? وقلتي ليه شنو ? وقال ليك شنو?ومتريحة ليه ? ولابسه ليه كذا ?والمرتبة دي معفصة كدا مالا ?
ولو جو ضيوف او لمه اسرية بكون مراغب لحركات اي فرد تجاه زوجته
ولو قال اي واحد من افراد العيلة لزوجته بحسن نية . لزوجتو فقدناكم ياخ او ماظاهرين ليه ولا وحشتونا والله ولا مشتاقين ولا ابقوا اظهروا ...خلاص الدم حيغلي في عروقوا وممكن اشاكل واحول القعدة الظريفة هذه لكارثة واعكننا عليهم .
ودائما شغلو الشاغل بفتش لخيط اودليل علي زوجته
ممكن اتفحص الملابس الداخلية لزوجته او المرتبة او الملايات اشوف لو في اثار .... او افتش علي اثار اقدام داخلة او خارجه من البيت.
ولو كان في الشغل ممكن اتصل 100 مرة في اليوم بس اتأكد ايش بتسوي ومرات بقطع شغلو يجي البيت مباغته.
وفي العلاقة الحميمية زوجته لو ماتفاعلت معاه ممكن افسر دا انو الزولة دي الا كان فعلتها مع واحد تاني.
وعادي ممكن اشك انه اولاده ما اولاده وممكن اطالب بفحصDNAبتاعهم هل هو الابو البيولوجي ول لا
يمكن يصحى نص الليل يمشيياحوم حول البيت في بالو امكن شخص لابد بهنا ولا هنا عاوز ينيل من زوجته
وكون زوجته تدخل الفيس ول االواتس والقروبات دا بالنسبة ليه من امر صعب يتقبله
ويوميا ممكن يفتش تلفونها ويحقق في اي اسم واي مكالمة صادرة واي مكالمة واردة ....
ودائما هو بالطريقة دي معذب نفسه ومعذب الزوجة والاطفال والناس من حولو
طبعا العلاج نفسي في المقام الاول ومتاح لكن الصعوبة انه ناس الغيرة المرضية ماشيفين نفسهم
عندهم اشكال نفسي محتاج للتدخل العلاجي.
عافاكم الله ولو في العمر بقية نتناول علاج هذه الشخصية هذا عن الغيرة المرضية
دمتم طيبين يارب
🍃💞💝💖💓💘💗🍃