الــنــفــاق الاجـتـمــــاعــــي (ينهش مجتمعنا فهل نقف له؟؟)

وهذه وصلتني في الايميل وتوافق كلامي وتزيد جزاها الله خيرا
7

(( بقلم فتاة تحكي واقع المجتمع))





خلاص.. يععععع.. وشو ذاااا.. ملينا .. ما صارت




ما كتبت هذا الموضوع إلا من بعد ما حامت كبدي من اللي أشوفه قدامي ... ليه المجتمع الحين صاير سطحي بكل ما تعنيه الكلمه ؟؟ أنا أعمم هالكلام على الحريم والرجال بعد بس بعلمكم أو أقصد بذكركم (لأني متأكده انه الكل ملاحظ هالشيء) باللي يصير بمجتمع الحريم بما إني عايشة بمجتمع ستاتي ... لا يقعد ينط على واحد ويقول يا مصلكم يالحريم .. تراكم انتم لاحقينا بعد



ليه الناس صاروا يتكلفون بكل شي .. عزايم .. زيارات .. زواجات .. كل شي بمعنى كل شي؟؟ لو الوحده بيجيها أي أحد يزورها أول شي تفكر فيه وش بنحط ووش بنجيب ... لازم الحلى من المكان الفلاني ... والفطاير من المحل العلاني ... والسكر شكله كذا .. والصينية مدري وشي قايله كل ماهب و دب محطوط فيها ما بقي الا ينثرون على الأكل قليتر من الزبرقه الزايده .. ذاك اليوم أقول لأختي بجيب فطاير من المحل ( ....... ) اللي جمبنا قالت لا وع قروي ... من متى صار الأكل فيه قروي و مب قروي .. سلاماااااااات !! يازين أيام أمي كانت الدنيا بساطة كلن يزور الثاني والعشاء نواشف وان تحمسوا جابوا فول وتميس ... السالفة مب سالفة فقير وغني السالفة سالفة بساطة وتكلف ... وكلش كوم وإذا قال لك أحد والله الناس تقاطعوا هالأيام !!! كل هذا وما تبون يتقاطعون !؟




ليه إذا ولدت الوحده صاروا الناس يتنافسون من يجيب الأغلى مب الأحلى ... تلقون إذا الوحده يجيها مدري كم طعش سله من باتشي واللي مثله وسعر السله الوحده ما يقل عن 500 طيب سله سلتين بتفتحهم والباقي حراام وش تسوي فيه ؟؟ .. ليه ما نسوي بيبي شور زي الأجانب وكل وحده تكتب قائمة بالحاجات اللي تحتاجها وتسوي زي الحفله البسيطه يجون فيها الناس منها انها ماراح يجيها هدايا إلا الحاجات اللي تحتاجها ومنها انه تجمع الناس مره وحده وما تقعد استقبل وودع طول فترة النفاس .. أكيد الناس بيستصعبونها بالبداية بس بعدين عادي بيتعودون عليها زي الحاجات الكثيرة اللي استنكرناها بالبداية بعدين صارت عادي


ليه البنات صايرين ماصلين وسوالفهم مره ماصله ؟؟ أكبر همهم فلانه وش لبست .. والمحل الفلاني وش نزل .. يااي مره حلو التان عليك ... كلنا بنات ونحب هالسواليف بس مب عاد تصير اكبر همنا !! من متى الوحده حتى لو لابسه شي يحوم الكبد بس عليه اللوقو حق الماركه يصير كشخه كننا مشفح

ولو وحده لابسه مرتب وألوانه حلوه بس مب ماركه تطلع قرقر .. ما أتذكر قبل 10 سنين كنا نفكر كذا أبدا .. وأكبر دليل على هالشي ان السعودية إذا جت تشتري شي ماركه معينه أهم شي عندها ان اسم الماركه مبين و وش كبره يعني مو شاريته علشانه حلو بس علشانه الماركه الفلانيه ... حتى الصغار صاروا لازم يلبسون ماركات لو سمحتوا والمشكله الأعظم انه تلقين البزر توه ما فقش من البيضه ويقول ترى البولو حقي من رالف لورين!؟



ليه البنات بايعين صورهم بتراب .. نت لوق .. فيس بوك ... تاقد .. وغيره وغيره .. يعني خلاص إذا حطيتي صورتك صرتي مودرن وكول ؟ وإلا كلش كوم وإذا جت وصورت يدها ولا رجلها ولو سمحتوا لازم تكون ماسكه بيدها شنطه ماركه .. هو الأساس بالصوره إنك تورينا يدك ولا الشنطه؟ ما أدري نضحك على تطليع اليد ولا الشنطه !؟




ليه البنات بالمنتديات سبحان الله أكثرهم مصيفين بباريس وعندهم كلب ( لو سمحتوا ترى البسه موضه قديمه) وسياراتهم مرسيدس وينادون أبوهم وأمهم بابي ومامي ؟؟ ترى مره صدقناكم !!


ليه الحريم صاروا يحطون ميك أب بالعزاء وشو ذا استغفر الله ... حطي بشفايفك مرطب ورتبي نفسك شوي ما أقول لا بس تجين بروج فوشي ولا مناكير أحمر ... استحوووو خييييييييير


ليه الوحده تقعد الليل كله لميييييين تطلع الشمس عالنت وتستخسر انها تصلي 10 دقايق قبل الفجر تدعي ربها فيها ؟؟


ليه الوحده صارت كل ما كبرت تكشيرتها وناظرت الناس بطرف خشمها صارت رزه و واو .. والوحده اللي تسلم على اللي ما تعرف ولا عالأقل تبتسم قدامه مخفه ولا معجبه باللي قدامها ... الرسول نفسه اللهم صلي وسلم عليه قال وتبسمك في وجه أخيك صدقه .... بس فيه أحد يسمع ؟؟




ليه الوحده إذا انعزمت على زواج صديقة صديقة صديقتها تدفع 500 1000 أو أكثر بعد على تسريحه بتقعد ثلاث ساعات هذا إن طولت بالزواج وتستخسر تدفع 100 ولا 200 على صدقة ؟؟ الناس قاعدين يموتون جوع وحنا قاعدين نضيع فلوسنا على حاجات سخيفة



ليه بالزواجات كل وحده تناظر الثانية من بعديد وتقول ماني قايمه أسلم ليه ما هي تجي تسلم علي ؟؟




المشكله لو تسألون أي أحد عن للي صاير بيقول انه مو عاجبه الوضع بس كلن يجاري الثاني ويقول مابي الناس يصيرون احسن مني انا وش ناقصني بعد. لازم أحد يبدا ويسوي شي لأن الوضع صاير من سيء لأسوأ


متى بنغير اللي قاعد يصير إذا كان الكل ساكت ؟؟
______________________________ ____


عيـــــــــن العقل .. والله كلامها درر
حبيت أضيف سطر واحد بس لكلامها ..
وموجه للبنات والشباب
علماء النفس يقولون : كل ماقلت ثقتك بنفسك زاد تقديرك للاشياء الماديه



صح لســــــــــــــــــــانك بس ماحولك أحــــد

صدقتوا بكل كلمه قلتوها والله ..
قسم بالله صرت أكره ادخل أقسام الأزياء "الفاشن " في بعض المنتديات لأنه كله كذب في كذب يجيبون صور فنانات هوليود وهذي شوزها حلو وهذي الباغ حبيته عليها وهي حلقها حلو .. بنات بليز دلوني على موقع أقدر أشتري منه نفس شوزها !! وتدفه بالألوف على جزمه أو صندل مايفرق اللي يشوفها عن جزم الهرم !!
مظاهر كذاااابه .. في كل مجالات الحياة ..
أما النفاق فحدثي ولاحرج ..
أصحاب المظاهر كل الناس تزورهم وفي المناسبات يهدونهم ويتوددون لهم ويوجبونهم لو كشختهم بالأقساط بس مايهم !!!
أما الناس البسيطين الطيبين واللي على طبيعتهم غير متكلفين ويكرمون ضيوفهم بكل شي بدون مبالغه وإسراف محد يعطيهم وجه .. يمكن تصير عندهم مناسبة ولايلقون إلا القليل يشاركونهم فرحتهم !!

النفاق صار يغطي أكثر تعاملات الناس في هالزمن مع كل أسف ..
نادراً مانلقى حد على طبيعته ): صرنا نجلس مع الناس يقابلونا بوجه .. ويروحون عنا بوجه ثاني .. ماصرنا نعرف الطيب من غيره !!
وتعدى الناس مرحلة المجاملات ووصلوا للنفاق ..
وتقسيم الناس حسب قدرتهم المادية .. أو حسب المظاهر ..

والله صاااااااااااااااااااااااااااااااااااادقين تعبت نفسيآ في الكليه مااقدر اسولف ابدآ كله وش موديلها وش لابسه وماركه واصلي حتى والله وحده من البنات تقولي {عندكم مشاكل بيتكم} ماتدري اني متقرفه من وضعهم وكل سنه اقول كم سنه واخلص !!
وتخيلوا خطبتني وحده من هذي النوعيه والله رفضتهم عشان كذا ولا سألت عن ولدهم ولا شئ ....
وكل يوم يأنبني ضميري علشاني اخاف على نفسي ماتزوجت واقول ليش ارفضهم ومررررررررره ضااااااااااااايق صدري ؟؟؟؟؟
وش رايكم غلط انا ولاصح؟؟؟؟؟؟؟؟؟؟

لي عودة مع ردودكم

ياة كنت احسب هذا الشي صاير بس عندنا لكن احنا
الفرق ان هذي الاشياء تقدم للناس الهاي على قولتهم
واذا كانوا اهل الزوج من هذي الطبقة تقدم لهم اما اذا كانوا عاديين فياليت احد يقولهم كلمة حلوة بس
لكن احنا زيادة على كذا حتى اطقم تقديم القهوة والشاهي تختلف باختلاف الضيوف