ازيك يا ام احمد وكل عام وانتى بخير لأ دى مش فتة الكوارع دى فتة لحمة وعموما انا حكتبلك فتة الكوارع من عنيا وما بيبقاش فوقها لبن دى غير يا ام احمد ياريت تعمليها دى مشهورة جدا واكله جميلة ودى الفتة اللى بنفطر بيها فى عيد الاضحى بعد ما بندبح بنعمل باللحمة على طول الفتة
وبالنسبة طبعا بالنسبة للارز حسب العدد اللى حياكل يعنى ممكن كوبايتين وممكن ثلاثة وممكن خمسة وبالنسبة للحم برضة حسب العدد اللى حياكل ممكن تعملى لكل فرد قطعتين او ثلاثة وبالنسبة للصلصة حطى مثلا معلقتين كلى كوب ماء

تسلمى يا تينة ربنا يخليكى وتوقبعك جميل على فكرة :)

فتة الكوارع
كورع ( نظيف ومقطع )
ملح - فلفل أسود - فصين مستكه - حبهان
2 بصله كبيره مقطعه
الفته
عيش ناشف محمص ( بلدي - سن - شامي )
3 كوب رزابيض مصرى مستوي بالزبده
ملعقه كبيره توم مفروم
ربع كوب خل
أول حاجه نغسل الكوارع كويس وندعكها بالملح وشوية دقيق وليمونه وشوية خل
ونتركها حوالي ساعه .. وبعدين نشطفها
نضعها في حله بها ماء علي النار وتاخد غلوتين .. وبعدها نغسلها تاني
نحط في حله ملعقة سمنه ولما تسخن نضع المستكه ولما تسيح نضيف قطع الكوارع ونقلب
وبعد كده البصل مقطع والحبهان والملح والفلفل .. وعلي طول نغطيها بماء مغلي
ونتركها لتستوي

عمل الفته لعمل الرز الأبيض .. يفضل نقعه نص ساعه ولتسويته في هذه الحاله ننقص الماء
3 كوب رز عليهم أقل من 3 كوب ماء + ملعقة زبده وملح
نحمص العيش في الفرن ونكسره في طبق غويط ونسقيه بالشوربه
في مقلايه نضع ملعقة سمن وملعقة ثوم مفروم
وأول ما يبقي لون الثوم مصفر نضيف الخل وياخد غلوه .. علي طول نوزعه علي الفته
نفرد الرز علي وش طبق الفته .. والكوارع في سلطانيه مع الشوربه
وبالهنا و الشفا

متشكرة أوي يا حبيبتي
أنا بحب الفتة أوي وناوية اعملها

بس بالنسبة لي صعبة أوي أعمل الأكلة على البركة ..
يعني أنا أول مرة اعملها ومعمريش دقتها .. فصعبة احط المقادير من نفسي ...
ممكن تقولي لي المقادير بالزبط لو كنت حعمل كبايتين رز ؟

وتسلمي لي يا حبيبتي

من عنيا يا ام احمد
كوبيتين ارز مطهيين عادى
ومثلا كيلو لحم او 2 كيلو لحم ضانى بالعظم ( الرقبة )
2 رغيف خبز لكن لو كان الخبز العربى الكبير بتاعكم يبقى كفاية واحد
وبالنسبة للصلصة نفس المقدار المكتوب وبالهنا والشفا وبرضة اى سؤال انا حاضرة يا ام احمد
بعد ماتعملى اول مرة الفتة وتعرفيها حتعرفى قصدى كان اية ؟ان الفتة بتتعمل بمقادير تقديرية يعنى بالظبط كدة هى عيش متقطع ممكن يزيد وناس بتحبه اكتر من الارز والارز ممكن يزيد وممكن يقل مش مشكله يعنى طبقة عيش عليها طبقة ارز عليها الصلصة مغطية وش الطبق ثم قطع اللحمة وبالهنا والشفا