الفتيات المدللات

السلام عليكم ورحمة الله وبركاته

راح أكتب سطور تعبر عن بعض مما يخالج نفسي قد أكون مصيبة أو مخطئة ولكنها تظل قناعة شخصية

الفتيات المدللات ياااه حتى بالوصف نسرح ههه المهم بنات بتكلم بلهجتنا جد جد وش رأيكم بالبنات

المددلات مو المدلعات دلع ماصخ واللي وهي تتكلم يجيني ألم في الفك السفلي لا لا أقصد الفتاة

المدللة دلال راقي لائق بالأنثى الفتاة التي قضت عمرها في البحث عن أسرار الجمال وتفننت في

ذلك فلم يكن هناك من يمنعها منه بحجة (عيييييب اصبري لين تكبرين 😭😭) وتكبر ولا عاد تدل

عيونها عند رسم الكحلة 😢😢 المهم بصراحة البنات أنواع ((مدللة دلال راقي-دلوعة دلع ماصخ -مكروف خير خيرها عشان تطلع سنعة وتبيض الوجه إذا فتحت بيت ))

المدلله دلال راقي << ابتسامتها ماتفارق شفايفها سعيدة بحياتها عارفة ومحددة مسبقا وش تبي لها ذوق خاص ومميز لسانها عذب وهي تتكلم في بيت أهلها تدللت لين شبعت وأخلاقها فووق ماشاء الله شغل البيت تتعلمه وتعرفه لكن ماتنجبر من قبل أهلها عليه متى مابغت تشمر عن كفيها
وتقوم بالواجب وغالبا يكون عند هالفئة خدامة فشغلها يكون تعلم طبخ وأشياء بسيطة ولما تتزوج أبدااا ما يعيبها هالشيء لأنها تعودت تكون متميزة فتلاقين لمساتها المميزة في كل ركن في بيتهاوشغلها على أحسن مايكون وعالغالب هالفئة من البنات تدخل القلب ويمون الواحد عليها ويتكلم معها بأريحية لأن فيها تواضع عالي جدا وهالنوع تلاقينه ينقل الدلال لبيت الزوجية فتلاقينها بعد طفل أو اثنين معها خدامتها وسي السيد مايقدر يردها لأني شخصيا وأنا بنت أخق مع كلامها ونعومتها ودلالها فكيف بالرجل المهم الله يسعدها ويهنيها وتمنيت أكون من هالفئة بكل صراحة 😄😄😍😍

الفئة الثانية الدلوعة دلع ماصخ
هذي فيها كبر أعوذ بالله منه تحسين ماعلى الدنيا مثلها غير مريحة نفسيا للي يتكلم معها يعني تناظر الناس أنهم أقل منها غالبا دلعوها أهلها وخذت مقلب وصارت تبي كلن يدلعها غصب طيب تعلي صوتها ومو عااجبهاا شيء ولما تتزوج تنقل الدلع بس بطريقة غير صحيحة وصح نسيت هذي لو تقطيعنها مااشتغلت ولا شالت شيء ومانستبعد كون الخدامة شرط من شروط الزواج المهم هذي حسب زوجها اذا يحب هالدلع فهي يابختها واذا جلف ماراح تقدر عليه لأنها بتطول لسانها وبتجيب العيد بسبب أنها ماتشوف الناس شيء.

الفئة الثالثة

هذي سلمكم الله تبي الزين وتحبه وودها بالدلع والدلال لكن بيئتها ماتهيء لهالشيء يعني عندهم العيب فوق كل شيء وعندهم الحرمة لبيتها وزوجها ولازم تتعلم السنع والسنننع فقططط في شغل البييت من طبخ ونفخ وغسيل وكوي وتنظيف والذي منه وإذا عندها أخوان صغار فهم مسؤوليتها بعد من لبس وتغييرات وأغلب الأشياء اللي تخصه الكحل والروج للبنات البزّع اللي مايستحن وش عجلات عليه يبن الرجل <<طبعا تدور هالأحاديث بين أهالي هالنوع من البنات وبعد كل مناسبة تحضر فيها إحدى المدللات أو المدلعات مايطلعن مع الباب الا وهاتك يا سب فيهن وفي أهلهن من بااب إياك أعني واسمعي ياجارة <<تكتييك ههههههه المهم غالبا هالنوع من البنات يصير شايل هم الدنيا يعني بينما المدللة والمدلعة تفكر في مناكيرها تلاقين هالبنت تفكر في غسل المواعين 😢😢وبينما المدللة والمدلعة يمارسن مواهبهن في هدوء سواء رسم أو مكياج أو أو تلاقين الأخيرة تفكر في مذاكرة أخوها أو تغييرة أختها أو أي شيء من أشغال البيت المرهقة
حلو تعاون أمها بس بعد لازم تعيش متطلبات جيلها عموما هالفئة عالغالب إذا تزوجت تصير كارهة شيء اسمه شغل بيت وماالة جداا عكس اللي قبلها متحمسات لمملكتهن ويخططن لأعمالهن فيها

شكلي كثرت هرج عموما هذا شيء مما جال في خاطري أحببت مشاركة حوائياتي به 😘😘

والنقاش مفتوح ...