الفراغ العاطفي بحياتي

الفراغ العاطفي بيذبحني 
مادري كيف اقولكم بس انا اهلي معي جدا كويسين ويحنون علي ويسامحوني اذا غلطت 
ويعطوني اذا طلبت ، وامي ايام الدوام ماتخلينا نشتغل وتقول اهتمو بدراستكم 
وهي تسوي كل شيء ومرات ابوي يساعدها 
عطوفين علي انا واخواتي ، يسولفون معنا يوميا ويسالونا وش سويتو وايش صار معكم بالدراسه ، ومن هالقبيل 
نامي ارتاحي تغدي صلي 
ويقدرون خصوصياتنا بشكل كبير ، 
وشخصياتهم جميله معنا ومايهاوشون الا اذا الموضوع يستاهل ، وامي تتناقش معنا وتفهمنا ، وابوي يستشيرنا ويحكي لنا عن اي شيء يضايقه .. 
يعني اهلي الحمد لله فيهم اشياء جدا جدا جميله معنا .. 
لكن انا مدري ليه احس بفراغ عاطفي بهالشكل ومادري ليه احس انه ودي يكون فيه احد يحبني ، والله اتمنى يكون فيه شاب يحبني ويهتم فيني وانا ما ادري عنه ،، كذا من وراي . مثل ما انا مهتمه لشخص معين وسبق وكتبت موضوع عنه 
واتمنى لما اداوم للجامعه يكون فيه شخص يدق علي ويقول هاه وصلتي هاه طلعتي انتبهي لنفسك 
مع انه امي تقولها لي كل صبااااحح ، 
بس مادري ليه ابيها من شاب 
اتمنى احد يهتم لي يحبني يخاف علي 
يجيب لي هدايا يدلعني ووالخ 
مارح اقولكم اني مثاليه لكن بعد الثانووي ربي بلاني وتعرفت ع شباب وكذا لفتره ولله الحمد قصيره ابدااا مانبسطت فيها وماعجبتني التجربه كنت احس بتأنيب الضمير ومو مرتاحه ومتضايقه وبعدين ابتعدت تماما عن هالشيء بكل سهوله سحبت ع الموضوع وماعاد رجعت له ( انا من النوع اللي اذا قررت شيء اسويه ومايهمني النتائج خصوصا بالمواضيع اللي ضررها اكثر من نفعها ، عشان كذا تركت العلاقات المحرمه بسهوله ) وماتأثرت بالعكس ارتحت 




بس محتاجه كلام حلو !!! 
ومحتاجه ومحتاجه كلكم عارفين ايش انا محتاجه لانكم بنات مثلي وفاهمين الشعور 
وانا ادري ان للزواج برضو مو حل ، لان ممكن اتزوج شخص مايكون مثل مابي
خصوصا الرجال بالزواج عندهم ان الحياه مو احضان وكلام حلو والزواج بنظرهم مسؤوليه بس ، عشان كذا انا ابدا مو جالسه اعلق امالي بالزواج 




والله مرات ابكي واقول ابي اهتمام 
عندي اخو فديته ربي يخليه لنا اصغر مني بستنين ويجيب لنا هدايا ومايقصر معنا بشيء اذا سولفنا يسمع لنا واذا طلبناه يحن علينا 
لدرجة اذا رفع صوته علي ابكي واتضايق لاني استغرب واقول غريبه عصب علي !! 
الله يخليه لي ويخلي اهلي 




بس اخواتي علاقتي معهم شبه بارده 
هم مراهقات بالثانوي ، يتحسسون مني واي شيء اسويه لهم يشيلون بخاطرهم وماينسون بذات اللي بثالث ثانوي 
مره صدمتني بشيء ، وقالت يمه لما كنا صغار وبزواج بنت خالتي ليه نوسه طردتنا من غرفة العروسه هي دايما تطردنا 
( الموقف هذا وقتها اختي يمكن عمرها 11 سنه ،) والحين عمرها 18 وباقي تذكره ؟! 
وانا يوم قلت لهم اطلعو قصدي مصلحتهم مابيهم ينطردون باسلوب وقح من احد ثاني ومابي اهل العرس يتضايقون منهم 
خصوصا بغرفة العروسه ؟؟؟ فهمتو علي 
وربي يوم قالت كذا تضايقت 
وحسيت فيه حاجز بيني وبينهم وانه انا السبب بهالشيء وانه خليتهم بعيدات عني 
ماعرف شيء عنهم ولا عن صديقاتهم 
وانا وربي كل البيت يعرفون صديقاتي ويعرفون كل شيء خصوصا اخواتي وامي 
بس انا ماعرف شيء عنهم ، واتضايق لما اشوف صديقاتي يتكلمون عن اخواتهم وانه قالو وسوو وحطو 
- يمكن هذا الشيء بعد مخليني احس بالفراغ ، احاول اسألهم واناقشهم وافتح مواضيع بس مايتجاوبون معي لدرجة انه نتهاوش بدال ماننبسط خصوصا اختي اللس عمرها 18 اللي عمرها 16 اممم بس غامضه وهذا عيبها بس اذا تكلمت معها تسلك لي شوي وتعطيني وجه .. 
احنا بغرفه وحده وكل شيء مع بعض 
والله لو يبون عيوني عطيتهم مره احبهم واخاف عليهم واهتم فيهم بس احس مايقدرون 




- وعندي صديقات كثير ولله الحمد وعلاقاتي حلوه جدا معهم 
ادرس بالجامعه وماعندي وقت فراغ ايام الدراسه بس مع هذا الفراغ العاطفي كل كا اكبر يزيد عندي للمعلوميه عمري 24 




وحالتي الدينيه الحمد لله كويسه 
- ما اسمع اغاني 
- ما اشوف افلام رومنسيه وحركات حب وخرابيط 
- بتويتر والانستقرام ما اتابع شباب ابدا ولا حتى شيوخ بس اتابع بنات واي شيء للتغذيه وللصحه والبشره والشعر والاخبار 
- احاول اغض بصري ولله الحمد ، واذا شفت شاب اصد وانزل عيوني 




ذكرت هالاشياء عشان ماتكون ردودكم لي بهالمنطق اللي انا فعلا اطبقه 




والله والله اتمنى اسمع كلمة ( احبك ) 
اتمنااااااها من كل قلبي صح تنقال لي من صديقاتي واختي الصغيره ، صح احس فيها من اهتمام امي وابوي واخوي .. 
بس ماعرف ليه اتمنى اسمعها بصوت ثااااني 
فاهمين علي يابنات ؟ 
ولاتخافون باذن ربي الحرام مابروح له ولابكون علاقات مافيها لذه ومالها طعم 
بس ليه احتاج هالشيء ، وش اسوي ؟! 
انا ما افكر فيها بس لما اسمع سالفه ولا اشوف موقف احس بحاجتي ، 
محتاجه افضفض مو لامي ولا ابوي ولا صديقه لان فيه اشياء ماتنقال لهم ممكن بس تضايقهم ، 




سؤالي ليه احنا نحتاج الجنس الأخر ؟ 
كيف نشبع حاجتنا لهم بدون وجودهم بحياتنا ؟