ابي أكمل مع اني كثرت بالمعلومات لكن ودي يكون الموضوع كامل ومرجع للباحثين تمام
الله يرزقني وياكم ، دعواتكم للمسلمين يوم تدعون لأنفسكم ، ترى الرسول صلى الله عليه وسلم أوصى بالتكاثر فتكاثروا ان كنتم قادرين عالتربية والمصاريف

🔹يانورة وش افضل دكتور ؟؟
هنا لابد من البحث عن مستشفى او مركز مجهز تجهيزات حديثة ، لأنه ياطويلات العمر نجاح العملية له اربع شروط بعد ارادة الله
١/وجود عينة سليمة من الزوجين وعدد بويضات مناسب
٢/مركز متطور ومختبر بفريق وامكانيات عالية
٣/دكتور شاطر قادر على اعطاء خطة علاجية مناسبة وعمل التحاليل المطلوبة ، واللي مكررة العملية بتعرف انه الدكتور مجرد سبب
٤/القدرة المادية والانتظام على الخطة .
.
.
🔹طيب لمين أروح ؟ ابي دكتور ثقة ؟
الحمد لله بالنسبة للسعودية أغلب مراكزنا المعروفة دكاترتهم ممتازين لأن امكانياتهم بالمستشفى زينه وخبراتهم عالية بالعلاج ، يعني لو بتروحين صلي ركعتين استخارة وادعي الله وشوفي لك دكتور بخبرة زينه واطلبي ربك البركة ..
للأمانة جربت دكاترة كثار ولكن كان يسعدني ان الدكتور يعطيني شوي وجه لأن بعض الدكاترة الله يهديهم وينفع بهم ويبارك لنا ولهم مايعطون المريض حقه بالوقت ، تلاقينه بسرعه بس يعطيك الخطة العلاجية ويطلع ، طيب اصبر شوي ابي اكلمك ، لالا مايصبر تلاقينه مستعجل وأغلب تواصلك مع المنسقة ..
.
لهالسبب احب الدكتور اللي يعطيني من وقته شوي والا بالنسبة للخبرات كلهم متقاربين ..
.
وشي مهم مرة لازم تكونين فطينة مرة (مركزه وفامه) ، تعرفين وش بلاك وعلتك وتعرفين لو انك ماخذة هالشهر دوا وماناسبك تطلبين المرة الجاية دوا مختلف ، فتحي مخك وعيونك تراك انت مسئولة عن نفسك ..
سجلي كل شي بالايام .
وبعد الانتهاء من الكورس احفظي الاوراق بملف ، لأنه ممكن تحتاجين كورس ثاني وثالث ويكون لو تروحين طبيب ثاني ومعك أوراقك بيشوف الخطة العلاجية والنتايج القديمة ويقدر يقرر لك الأفضل بالخطة الجديدة .(اطلبي الاوراق وخذيها معك للبيت ضروري واثلا هم بيعطونك ياها)
احفظي حتى اسامي الادوية .
.
سجلي الأسعار
وكم يوم اخذت الأبر وكم مقاس الجرعه
.
.
🔹طيب ياجميلات الله يحفظكم
نجي الحين للأسعار
كم سعر عملية الانابيب ، الحقن المجهري ، التلقيح الصناعي؟
بحط لكم الاسعار تقريبي لأن التسعيرات مو أنا اللي اخترعها أو أقدر أخمنها لهالسبب بحطها تقريبا وليس بالضبط
.
.
.
مثل ماقلنا التلقيح الصناعي اجراء سهل جدا ومافيه عملية لهالسبب تراه رخيص ، وقيمته مع الأدوية يمكن ماتتجاوز ٣٠٠٠ الى ٤٠٠٠ ريال (ثلاثة الاف ريال الى اربعة الاف ) موزعه كالتالي (بالتقريب)
عملية حقن السائل ٢٠٠٠ ريال (ألفين)
وعندك كشفية وألتراساوند وادوية ممكن من ١٠٠٠ الى ٢٠٠٠ مدري وش يطلبون منك للأمانه ووش الادوية المطلوبة لهالسبب حطيت السعر تقريبي.
.
.
🔹طيب واسعار الحقن المجهري؟؟
الاسعار مع الكشفيات والأدوية
حطي ببالك من ٢٠،٠٠٠ الى ٣٥٠٠٠ من عشرين الف الى خمس وثلاثين الف
وحطيت هالسعر لأني مدري عن اسعار بعض المراكز

انا بالحقن المجهري يكلفني مايقارب( ٢٥ الى ٢٨ ) الف ، لانه مرات يطلبون مني تحاليل ومرات لا ومرات عدد الادوية يكون أقل ،، وفبه مراكز اغلى يمكن …
.
تقسيم السعر كالتالي
١/كشفية
٢/التراساوند
٣/ادوية
٤/العملية للسحب
٥/عملية الارجاع
٦/المثبتات وضرب الابر اليومي للتنشيط
.
بقول لكم شي ، الخطة العلاجية يعطونك منشطات خوذي العدد حق عدد الأيام الى يوم الاشعه ، ثم وقت الاشعه بيقرر الدكتور لو يزيد جرعه او لا ، فلو زاد لك الجرعه تشترين دوا زيادة وسجلي السعر ، يعني محد مننا كم يحتاج من دوا ، فاللي يحدد كمية الادوية هو استجابة المبيض
.
.
يتبع

🔹طيب يانورة وش مقاس البويضات المناسب للحقن المجهري ؟
وهل ممكن اجيب توأم ؟؟
فيه كثير حريم سليمات والا ماعندهم اطفال وخاطرهم بتوأم لأن
حب الانجاب فطرة سبحان الله .
.
.
🔹فالله يعطي كل من تتمنى ماتتمناه .يارب ترزق اللي مشتهية الولد بولد صالح بار واللي مشتهية بنت ببنت صالح بارة واللي مشتهية توم بتوم معافى صالح بار
.
.
🔹يلله اجاوبكم
.
هههههههه ولله تعبت وأنا اكتب ولا راجعت الحكي فإن أصبت فمن الله وإن أخطأت فمن نفسي والشيطان الله ياخذه

.

وش يعني مقاس بويضات ؟
مقاس البويضات مثل اعمار الحريم ، لهم اعمار مناسبة للانجاب ، العمر الصغير مرة مايناسب والعمر الكبير برضو مايناسب وان حصل فيه شواذ بعض الايام ..
.
🔹البويضة الله حاميها بالجريب ، فمتى ماتكبر ويصير حجمها مناسب يفك جريبها وتلقح بالمنوي ، وهالشي يساعد فيه الابرة التفجيرية .
مقاس البويضات المناسب للتلقيح يتراوح بين ١٧ الى ٢٢
.
أكثر من ٢٢ بعد الابرة التفجيرية ممكن تصير كبيرة بزيادة وماتضبط ، مع العلم ان فيه بويضات مقاس ١٦ وحتى يمكن ١٥ تضبط ولكن نتكلم عالأغلبية لهالسبب تلاقون الدكتور يوم يشوف المقاس صار ١٥ مثلا يقول يلله نزيد يوم ابرة وثم ناخذ التفجيرية ..
.

لهالسبب حابة أنبه البعض من البنات الله يهديهم اللي ياخذون منشطات ولايتابعون لأن المتابعه ضرورية عشان يتحدد موعد الابرة التفجيرية ..لأجل نوثل للحجم المطلوب ..
.
.
طيب هل ممكن أحمل بتوأم من ثلاث بويضات ؟ ممكن لكن ترى الاحتمال مو كبير مرة ..
طيب انا رجعت اجنه بدرجة اولى وثانية ، هل ممكن احمل فيهم بتوأم ، ايوه نعم ممكن والنسبة اعلى باذن الله اذا كلش تمام وخاصة اجنة الدرجة الخامسة

عفوا خاصة اجنة اليوم الخامس هههه

الى هنا بوقف احس اني احتاج اتقهوى ، بختبركم بكرة 😂😂😂 ياريل اللي تغلط عقب هالشرح ، بعطيها f ..
..
.
يلله انتظركم لاتزعلوني ، خل الملف مرجع ، واتمنى من اللي حملت قبل او ( اختها او صديقتها ) تكتب لنا الاجوبة التاليه
١/الاجراء المتبع
٢/نوع المنشط (الاسم)
٣/هل تم تحديد جنس
٤/كم بويضة طلع لك
٥/كم جنين تلقح
٦/كم جنين صالح وقت الارجاع
٧/سبب الاجراء هل هو رغبة بتحديد جنس او خلل عندك او عند زوجك