نورتي..🌹

كثيير اقرا عن عدم استهلاك اقل من ١٢٠٠ سعره وما اقتنع صراحه احسن كذا بسمن !! او يثبت وزني
لاني جربت اكل ١٤٠٠ سعره لمدة ٣ اسابيع ووزني ثابت وحتى المقاس ماتغيير ☹️☹️


مجهودك مميز جعله الله بميزان حسناتك

عزيزتي كل شخص له عدد سعرات معينة مناسبة لاحتياجات جسمه كمصدر للطاقة
تعتمد على جنسـه وعمره ووزنه وطوله ومعدل نشاطه البدني والرياضي.

وعلميًا الشخص البالغ ما تقل عدد السعرات الحرارية عن 1200 سعرة
لأن لها أضرار كثيرة بدايةً من الوزن المفقود راح يكون من الكتلة العضلية والعظمية
وبرضو يثبط عملية التمثيل الغذائي دون المستوى الطبيعي كحالة دفاع
غير الأضرار الصحية من نفسية وعصبية وهرمونية وجسدية.

ولو قلنا اتبعتي حمية الـ 1200 سعرة خلال أسبوع لأسبوعين يتأقلم عليها جسمك
فيثبت وزنك..
فتضطرين تقللين السعرات لـ1000سعرة وبتتكرر معك نفس الحالة وبعدها لـ 800 سعرة..إلخ
متخيله كيف بيصير وضعك الصحي مستقبلًا ..!!

ولو فكرتي تزيدين عدد السعرات الحرارية موقتًا ككسر لثبات الوزن وبعدها ترجعين للعدد السابق
جسمك بعد المجاعة للي مر فيها ماراح ينقص ولا جرام وبيتمسك بالدهون قد ما يقدر..
وأسلحتك اللي كانت تعينك خسرتيهم اللي هم مستوى الأيض والكتلة العضلية
وأكيد بتنقص نسب الفيتامينات والمعادن وهالشيء له تأثير سلبي ومباشر في إنقاص الوزن.

ومن ناحية 1400 سعرة هل هذا عدد مناسب لك شخصيًا وملتزمة فيهم صح
ومع ذلك ثبت وزنك ..
إذا إجابتك بنعم..
لك هذي الحلول لكسر ثبات الوزن
يا أنك ترفعين عدد السعرات الحرارية لـ 1700 سعرة من 3 أيام لأسبوع فقط
أو تنقصينهم لـ1200 سعرة من 3 أيام لأسبوع فقط.
أو تزيدين مستوى مجهودك الرياضي "مو الوقت" بتمارين الكارديو
وتحاولين تزيدين من نشاطك البدني.

وبعد ما تكسرين ثبات وزنك ارجعي للـ1400 سعرة..
لكن لا تثبتين على هذا العدد يوميًا
يوم زيدي على الـ 1400 من 100 لـ200 سعرة
واليوم اللي بعده نقصي من الـ1400 من 100 لـ 200 سعرة

اليوم اللي تزيدين فيه بعدد السعرات يكون نشاطك الرياضي مرتفع
واليوم اللي تنقصين فيه بعدد السعرات يكون نشاطك الرياضي منخفض


بهالطريقة يصعب على جسمك أنه يتأقلم على عدد معين فتقل نوبات ثبات الوزن.