الفوركس؟ التداول؟ الاسهم؟

مواقع الفوركس اللي تشوفينها منتشره تزين لك الثراء الفاحش والارباح العاليه كلها كذب
مجرد ماتشوفينها اهربي منها ولا تفكرين فيها اطلاقاً
وسبق قرأت تجارب كثير بالنت لناس جربوا اكثر من شركة فوركس وكلها نصابه بلا استثناء
بل ان بعضها يوهمك ان شغلهم تداول واسهم وفي الحقيقه هم بس ياخذون منك فلوس ويوهمونك ان فلوسك حاطينها بالاسهم وهي داخل جيوبهم ويقولون لك ربحتي هذا الشهر مثلاً 100 دولار وطبعاً يحولونها لك عشان تقتنعين انه فعلاً في ربح وهي اساساً جزء من المبلغ اللي دفعتيه والشهر الثاني يقولون ربحتي والثالث خسرتي وخلال هذي الفتره يحاولون يقنعونك تحولين مبلغ اضافي عشان تحققين ارباح ثم بالنهايه تطعلين منها خسرانه
وفي شخص كويتي كشفهم وفضحهم باليوتيوب لانه لما رفع قضيه وطلب العقود الرسميه طلع اسم الشركه وهمي واكتشف انهم مو مسجلينه في التداول والاسهم وان المنصه حقت التداول اللي يحطونها له بموقعهم وهميه
وترى مثل هذي المواقع ماراح تقبل انك تبدأين مبلغ صغير بيحطون لك مبلغ معين كحد ادنى عشان يمديهم ياكلون نصه والنص الثاني يضحكون فيه عليك كأرباح
وثقي تمام الثقه لو ان الفوركس والاسهم فيها ارباح عاليه كان لقيتي كل الناس مسجلين فيها وعايشين ثراء
كان لقيتينا كلنا جمعنا لنا كم ألف بكل سهوله وطلعنا بمليارات ارباح لكن الواقع ان كل هذا نصب وكذب


حتى الاسهم اللي معروفه وقانونيه والناس يستخدمونها عن طريق البنوك مافيها ارباح قويه ومايستفيد منها الا الهوامير الاغنياء اللي معهم رأس مال كبير ربع مليون او ملايين هذول اللي لو ارتفع السهم هلله وحده بيطلعون كسبانين اما اللي يدخلون بملغ صغير بالالوف ماراح يستفيدون لان الربح بيكون قليل وجزء منه بيروح كعموله للبنك


يعني الخلاصه ابعدي عن الاسهم والفوركس وخذيها قاعده شي ماتعرفين تفاصيله وكيف يشتغل ولا عندك ادنى فكره عنه لا تجازفين ولا حتى تفكرين تدخلين فيه