السلام عليكم ورحمة الله وبركاته
كيفكم يا حلوات
من زمان ما طليت عقسم الطبخ اشتأتلكم
طبعا اكيد اغلبكم بإجازة هلا الله يرجعكم بالسلامة وان شاء الله بتقضوا
اجازة طيبة وسعيدة
اليوم طبختنا فول باللبن وهي اكلة طيبة كتيييييييييييييييييير
وسهلة ما فيها تعقيدات
والفول طبعا بيكون فول اخضر مفرز مع قشره لانه بيطلع اطيب.
خلينا نشوف الطريقة مع المقادير
المقادير
فول اخضر
لحم غنم قطع وممكن تستعملي لحم راس عصفور ازا حبيتي
توم مفروم ناعم
زيت زيتون
لبن
نشا
ملح وفلفل
الطريقة
اول شي بعد ما نغسل اللحم بنحطه بالطنجرة مع شوية زيت عادي مو زيت زيتون
وبنقلبه على نار عالية حتى تنزل كل المية اللي باللحمة وتنشف
نغمر اللحم بالماء وبنحط عليه بصلة مقطعة ارباع ,هيل حب,قرفة عيدان,ورق غار
اي شي بتستعمليه حتى تروح زنخة اللحم,طبعا احنا بدنا نستوي اللحم نص استواء
عشان تكمل باقي السوا مع الفول يعني بس تغلي خففي النار عالاخر وغطيها
وخليها نص المدة اللي بتحطيها فيها بالعادة
بس تستوي اللحمة نص استواء ضيفي الملح عالمرق وبعدين صفي اللحم من المرق وخلي
المرق على جنب
جيبي طنجرة تانية وحطي زيت زيتون كمية منيحة وبعدين حطي توم مهروس او مفروم ناعم وقلبيه
شوي وانتبهي ما تحرقي التوم لانه بيعطي طعمة سيئة لو انحرق
هلا ضيفي الفول ازا كان اخضر بتكوني شلتي الخيط على اطرافه وغسلتيه منيح
وازا عملتي هالخطوات وفرزتيه بس نزليه وحطيه في الطنجرة فوق التوم على طول
ما في داعي تخليه يفك وبعدين قلبيه مع التوم وزيت الزيتون
الافضل تقلبيه مدة من الزمن حتى تحسي انه الفول طري من الزيت
ضيفي اللحم عالفول وقلبيهم مع بعض
حطي رشة فلفل اسود وقلبي
هلا اغمريهم بمرق اللحم وما تحطي مرق كتير بس غمرتهم واتركيهم على النار حتى
يغلي المرق غطي الطنجرة وخليها عنار هادية حتى يستوي الفول واللحم
بتلاحظي انه فيه زيت زيتون على وجه المرق لو بتتدايقي من طعمه
بامكانك تتخلصي منه بهالمرحلة
حبيباتي لاتردوا ليكمل الموضوع
بنيجي للبن والصراحة كل اللبن بالخليج بيفرط لو ما حطيتي نشا لازم النشا ضروري
بالنسبة الي بفضل اللبن يكون حامض للطبخ وانواع قليلة جدا اللي بتعطي الطعم الحامض بالطبخ
لكل كيلو لبن حطي ملعقة نشا
اخلطيهم بواسطة الخلاط الرأسي (البراون)
حطي طنجرة اللبن عالنار وطبعا بدك تضلي تحركي لحتى يغلي اللبن
لا تتركي التحريك ابدا والا بيفرط معك وهيك غلي معنا اللبن
واستوى الفول مع اللحم
هلا ضيفي اللبن عالفول وحركي بشويش
بمقلاية حطي كمية من التوم المهروس مع شوية زيت زيتون وقليها
وما تحرقيها
في ناس بتضيف كزبرة خضرا مفرومة مع التوم بهالمرحلة انا ما جربتها
مع الفول بلبن بس مع اغلب طبخات اللبن بحطها لتقلية التوم وبتطلع روعة
ترى مو الكل بيحب نكهة الكزبرة الخضرا فانتي براحتك تستعمليها او لا
ضيفي تقلية التوم للبن وحركي
واضبطي الملح زي ما بتحبي
قدمي الفول بلبن مع الرز الابيض او الرز الابيض بالشعيرية
ان شاء الله يكون عجبكم وتجربوه
دعواتكم بالذرية الصالحة
وصحتين وعافية