صلوا على الحبيب المصطفى
هذي سالفه جميلة جداً حدثت في عهد ابو بكر الصديق رضي الله عنه
عن الفيل اللي راح المدينة واهل المدينة اول مره يشوفونه بحياتهم
لكن ايش اللي جاب الفيل للمدينة ؟
كالعاده ما احب النسخ واللصق لذلك راح اذكر القصة بطريقتي واظهر مشاعري بالموضوع ..
بطل القصة هو خالد بن الوليد رضي الله عنه
اكيد بتقولون وش دخل خالد ..
لان خالد رضي الله عنه مسخر هرمز قائد الفرس وجيشه لمن قال بس
وكان من ضمن الغنائم فيل
وانا فيني حماس وودي اقولكم عن سواة خالد الرائعه بالفرس قبل ما اتكلم عن الفيل
سلمكم الله القصة لها احداث قبل .. بس ماودي اذكرها عشان مايطول الموضوع
لكن الزبده ان ابو بكر رضي الله عنه كان يبغى يفتح العراق لانها كانت بيد الفرس
وعلشان ابو بكر يسوي منافسه شريفه ويفتحون العراق بسرعه امر رضي الله عنه خالد ان يهجم على العراق من ناحية الجنوب
وامر قائد ثاني اسمه عياض الفهري انه يهجم على العراق من ناحية الشمال>>عياض كان لا يقل خبره عن خالد
وقال لهم: ( من وصل منكما أولاً إلى 'الحيرة' واحتلها فهو الأمير على كل الجيوش بالعراق)
وطبعاً اللي يفتح الحيره قد فتح العراق .. فصار في تنافس شريف بينهم
المهم
نجي للبطل خالد رضي الله عنه وجيشه
كانت الأبلة اول مكان حطها خالد في باله .. واذا احتلها راح تسهل عليه فتح العراق
والابله بيد قائد اسمه ( هرمز ) >> ترى مضيق هرمز على اسمه
هرمز كان متكبر ومعروف بخبثه وحقده وكرهه للعرب والاسلام
وكان هرمز يلبس تاج مرصع بالمجوهرات والذهب >> يعني غالي
ارسل خالد رضي الله عنه رسالة صغيره الى هرمز>>هالرساله كل ما اقراها انتعش
قال خالد رضي الله عنه بالرسالة:
( أما بعد فأسلم تسلم، أو اعتقد لنفسك ولقومك الذمة، وأقرر بالجزية، وإلا فلا تلومن إلا نفسك، فلقد جئتك بقوم يحبون الموت كما تحبون الحياة)
>> تعجبنييييييييييييييييي ايوه كذا الشغل احلى شي قد جئتك بقوم يحبون الموت كما تحبون الحياة
يوم قراها هرمز عصب انه كيف عربي يتجرأ يقولي هالكلام وطبعاً وصله اخبار ان خالد وجيشه بمدينة كاظمه
وعلى طول جهز جيشه الكبير والدروع والسلاسل والزحمه الله المستعان
وامر ان كل عشره جنود يربطون انفسهم بالسلاسل عشان محد يهرب >> الظاهر رسالة خالد دبت الرعب بقلبهم
مو الظاهر الا صدق خافوا
بعكس جيش المسلمين اللي كان لبسهم بسيط >> وه بس
شوفوا اللي يعشقون الموت من اجل الشهادة واعلاء كلمة الله يوم سمع خالد عن سواة هرمز وانهم بدروعهم وسلاسلهم وزحمتهم حب يهبل فيهم شوية ويخليهم يندمون على الزحمه اللي مسوينها >> على بالهم يوم جهزوا انفسهم بالدروع والسلاسل والجيوش انهم بينتفون المسلمين
الظاهر مايعرفون مين خالد ومين هم جيش المسلمين
فأيش سوى حبيبنا خالد رضي الله عنه
أمر خالد رضي الله عنه جيشه انهم يتوجهون لمنطقة الحفير
اول ماوصل هرمز وجيشه لكاظمه مالقى خالد .. ووصل له خبر ان خالد وجيشه بمنطقه الحفير
وبسرعة انطلقوا للحفير يبغون يسبقون خالد وجيشه >> تخيلوهم يراكضون وهم بدروعهم وسلاسلهم
خالد رضي الله عنه وصل له خبر ان هرمز وجيشه المدرعين رايحين الحفير.. فقام ورجع للكاظمه >> الييييييمه
وعاد يالله ياهرمز اذا انت وجيشك وصلتم الحفير ومالقيتونا
فالحقونا انتم ودروعكم وسلاسلكم لكاظمه هههههههه
يوم وصل هرمز للحفير مالقى خالد ووصل له خبر ان خالد وجيشه رجعوا لكاظمه
هرمز عصب ان كيف هالعربي يلعب فيني >> ودي اشوف وجه هرمز وقتها
خالد رضي الله عنه ليش سوى هالحركه الأليمه ؟!
عشان يتعب جيوش الفرس ومايعطيهم فرصه يرتاحون ويرتبون الجيش >> عبقري
رجع هرمز والجيش لكاظمه وكان خالد وجيشه هناك
اول ما اجتمعوا .. وطبعاً معروف بالمعارك ان قبل ما تبدأ المعركه
يطلع فارس من كل جيش ويتبارزون >> نوع من استعراض القوة
بعدها تبدأ المعركة
طلع هرمز وطلب مبارزة خالد >> قائد لقائد
وهرمز الخائن اتفق من بعض جيوشه ان بنص مبارزته مع خالد يجون ويمزقون خالد >> خونه
يوم التقى خالد بهرمز تبارزوا وبنص مبارزتهم هجموا مجموعه من الفرس على خالد بيقتلونه
وبفضل الله تدخل البطل القعقاع بن عمروا التميمي رضي الله عنه >> القعقاع كان عن الف رجل
وبارز اللي هجموا
وخالد رضي الله عنه ما اشغلته حركتهم الخبيثه عن قتل هرمز فظل يقاتل حتى قتل هرمز
ومعروف عن خالد رضي الله عنه ان يقدر يقاتل بسيفين في وقت واحد >> شفتوا الرجوله
المهم ان المعركه انتهت بانتصار المسلمين وكانت خسائر المسلمين لا تذكر من قلتها
بعكس جيوش فارس اللي خسائرهم كانت فادحه
انا قلت لكم ببداية الموضوع ان كان من ضمن الغنائم فيل
ارسل خالد بن الوليد رضي الله عنه الفيل مع تاج هرمز والغنائم الى ابوبكر الصديق بالمدينة
الناس اول ماشافوا الفيل اندهشوا لان بحياتهم ماشافوا فيل وطافوا بالفيل بارجاء المدينه
حتى ان النساء اول ماشافوا الفيل استغربوا من شكله وقالوا: ( أمن خلق الله هذا ام انه من صنع البشر! )
>>يعني هذا من مخلوقات الله ولا البشر صنعوه >> يابعد عمري
بعدها امر ابو بكر رضي الله عنه ان الفيل يرجع لخالد مع تاج هرمز لانها من حق قاتله
يقولكم ان في ناس اختاروا مجموعه من القادة يبغون يقيسون مستوى ذكائهم (IQ )
واختاروا مجموعة من القادة من بينهم خالد رضي الله عنه .. هذي هي الدرجات
درجة ذكاء اقل من الحد العام للذكاء : 58 - 68
الحد العام للذكاء في حدوده الاولى : 68 - 80
درجة ذكاء جيدة , الحد العام : 80 - 115
درجة ذكاء جيدة جداً, اعلى من الحد العام : 115 - 125
درجة ذكاء ممتازة جداً و يقترب من حدود العبقرية : 125 - 135
درجة ذكاء ممتازة جداً و موهوب يكاد يكون عبقرياً : 135 - 145
ذكاء في درجة العبقرية : 145 - 165
عبقري بدرجة عالية : 165 - 185
عبقري بدرجة عالية جداً و نادرة جداً : 185 - 200
شوفوا كم حصل خالد رضي الله عنه بين باقي القادة :
بيل كلينتون ( رئيس اميركي سابق ) .. نسبة ذكاؤه : 137
>> ممتازة جداً وموهوب يكاد يكون عبقري
ادولف هتلر ( قائد الماني نازي ).. نسبة ذكاؤه : 140
>> ممتازة جداً و موهوب يكاد يكون عبقرياً
نابليون بونابرت ( امبراطور فرنسي ) .. نسبة ذكاؤه : 145
>>ذكاء في درجة العبقرية
تدرون كم حصل خالد رضي الله عنه
خالد بن الوليد ( قائد عربي ) .. نسبة ذكاؤه : 175 >> عبقري بدرجه عاااااااااااااااااااااااااليه
رضي الله عنه سيف الله المسلول .. صدق صدق صدق ( عقمت النساء أن يلدن مثل خالد )
والحمدلله ماعندنا خالد بس .. عندنا صحابة كثير لايهابون الموت ابداً
صدقوا الله على ماعاهدوا عليه همهم اعلاء كلمة الله واظهار الاسلام رضوان الله عليهم وجمعنا الله بهم بالجنة
منهم عكرمة بن ابي جهل رضي الله عنه .. الله يجمعنا فيك بالجنة وصحابة رضوان الله عليهم
>> لا تقولون ايش معنى هو ذكرته بعد خالد رضي الله عنه وحطيت عنده قلوب عشان ما اصنها على جبهتها
ختاماً
ماتحسر اهل الجنة على شي مثل ماتحسوا على ساعة مرت ولم يذكروا فيها اسم الله
(فاذكروا الله )
ملاحظه للأخوات :
اخترت كتابة الموضوع باللهجة العاميه لانها اسهل علي من الفصحى واقدر اعبر فيها
ومو انا اللي اتكلم عن صحابة رسول الله صلى الله عليه وسلم بأسلوب هزلي يقلل من قيمتهم رضي الله عنهم
ويشهد الله علي من فوق سبع سماوات اني اعشق الصحابه جميعاً عشق مو طبيعي
علشان كذا لمن اتكلم عنهم اطلع مشاعري بالموضوع واحط القلوب وعبارات من عندي وبأسلوبي
لو بخلي الموضوع جدي كان نسخت القصص من قوقل ولصقتها والسلام
بس انا ما احب النسخ واللصق
احب اعبر عن مشاعري اتجاههم وهذا مو عيب
وانا حبيت تكون اغلب مواضيعي عنهم وراح تكون عنهم وعن الانبياء عليهم السلام
انا مازعلت منكم .. بالعكس احب اللي تنقدني لصالحي
اذكر بموضوعي الاول عن خالد وعمار رضي الله عنهما وحده طلبت مني اغير العنوان وغيرته
وبهذا الموضوع بعد سويت تعديلات عشان خاطركم :26:
وجزاكم الله خير
والسلام عليكم ورحمة الله وبركاته :26: