اخواتى العزاز النهاردة حشترك معاكو باول موضوع ليا هنا بالمنتدى ويارب يعجبكم وهو القلقاس
ويعتبر من الاكلات الجميلة ع السفرة بالعزومات بجانب اللحم او الدجاج نبتدى بسم الله:----
تعالو نشوف القلقاس قبل التحضير
نقشرة ومعلش تقشيرة صعب شوية ولازم تكون ايدك ناشفة مفيهاش ماية ونقطعة بالشكل دة مربعات صغيرة
نغسلة كويس اوى عشان نزيل المادة النشوية الغير مرغوبة
لغاية ما تلاقى الماية بتاعة الشطف رايقة من غير نشا
ودة بيخلى قوامة حلو ف الطبخ وغير غليظ
نسيب القلقاس شوية ونحضر السلق وهو نوع خضرة ملازم للقاس وضرورى ف طبخة وهو شكلة كدة
حنغسلة ولو عروقة كبيرة اوى نشيل منها ونغلى ماء ع النار ونضع فية السلق امدة 2دقيقة يغلى بس عشان يلين شوية ويدبل
نشيلة من الماء ونضعة ف مصفاة
نرجع للقلقاس حضرى مرقة تكون عندك (طبيعية)سواء كنتى سلقة لحمة او فراخوحطيها ع النار وحطى القلقاس فيها عشان يستوى طبعا الشتوى يفضل لانة مبيخدش ع النار اكتر من 10دقايق لكن اصيفى صعب ف سواة وبيسود مع كثرة الغلى
نسيبة ع النار يستوى وقبل سواة ما يكمل هاتى السلق الى حضرناة من شوية وحطية ف اناء الخلاط ومعاة شوية مرقة من الى بيستوى فيها القلقاس واضربيهم لغاية ما يتفرمو وحطيهم ع القلقاس يكمل سواة وطفى النار بعد ما تلاقية استوى
نيجى للطشة او الدقة الى ريحتها بتقلب الدنيا زى الملوخية بالظبط وحتلاقى الجيران جاية تجرى ع الريحة الجميلة
وهى التوم والكسبرة الخضرا
حندقهم ناعم مع بعض ونحطهم يتحمرو ع النار ف شوية سمنة ويا سلام لو سمنة بلدى
اول ما تتحمر نضيفها ع القلقاس ونغطى بسرعة
وبكدة يكون خلص القلقاس لو عندك لحمة ممكن تحطيها جواة ولو ممكن تقدمية جنب الفراخ
ودة طبق للى حيشجعونى دة لو عجبكم الموضوع
يارب الموضوع يعجبكم واكون عرفت اقدمة بشكل يرضيكم وموصيكوش ع التشجيييييييييييييييع
استودعكم الله
