الكتوم اللي تعود مايفضفض لأمتلى ضيقات وش ممكن يسوي .. فضفضه :(

مساء الخير
موضوعي هذا فضفضه فقط ..
حابه اتكلم عن شي شي بخاطري ماودي اقوله لـ أي شخص يعرفني
بس بفضفض هنا دام ما احد يعرفني
انا بخاطري اتزوج
مرره بخاطرري واتمنى
انا عمري 28 سنه و مطلقه
انا تطلقت من عمري 19
طبعا قصه زواجي وطلاقي مؤلمه والله وكل مااتذكر وش صار لي ابككي لين يصدع راسي و انام ..
لان زواجي كله مده ثلاث ايام ولاهي متواصله يعني ماعشت عنده ولا صار بيني و بينه شي ابدا ابدا و لسى انا بكر
ماادري ايش صار لي هو سحر او عين وقريت عند شيوخ الاكيد اني رجعت من الموت و الحمدلله على كل حال طبعا طلع كلام علي جعل ربي يجعله بميزان حسناتي و يهدي من تكلم علي طبعا انا ماتكلمت مع الناس و لاشرحت لا أحد قصه طلاقي و لا احد اللهم صديقاتي ثنتين بس عقبها التزمت الصمت و سطحت علاقتي بالناس
حتى اهلي ماتكلموا ولاشرحوا و لاقالوا ايش صار او اني بكر ماصار شي بيننا .. كلمتهم للناس نصيب و ربي ماكتب بينهم توفيق هو بالبدايه شي كويس انهم ماتكلموا لكن اللحين احس انه ضرني مانفعني
لان طليقي و اهله تكلموا وحطوا فيني اشياء كثيره مثل ام طليقي لما كنت عند اهلي بعد الزواج كانت تقول اني حامل وتعبانه و هو تكلم وقال اني مجنونه وفيني حاله نفسيه و فيني وفيني الله يسامحهم و الحمدلله ربي فكني منه
انا من تطلقت لي حوالي عشر سنوات ماانخطبت و لااحد فكر فيني دايم ادعي واتحرى اوقات الاجابه .. و اشوف اللي حولي كلهم يجونهم خطاب الا انا كأن العالم ماتشوفني او اني منبوذه مع ان مو ناقصني شي لا من شكل ولااخلاق و لاغيره
انا كل يوم اشوف في التاريخ اقول هذا من عمري يروح .. ادعي الله يبارك لي فيه و يعوضني ويرزقني


بس بالنهايه اظل انثى اشتاق ان يكون لي بيت و زوج و اطفال حالي حال بنات حواء
تعبت من كلام الحريم اللي ينقال بدون مراعاة للشعور
مثل مره كنا في مجلس وحده تتكلم عن ولدها وتقول والله فرفرت بيوت كثير وخطبت مااحد عطاني قالت وحده اسم بنت وهي مطلقه هالبنت قالت اخطبيها له قالت : يووه مو لهالدرجه عايب اخطب له وحده مطلقه .. مرره قهرتني هالكلمه ليه شفيهم المطلقات
ودايم اشوف تحقير لهم بوسائل التواصل الاجتماعي كأاننا بائعات هوى ماكأننا بنات ناس ومحترمات
مجتمعاتنا تقهر وتفكيرهم يقهرر
احنا في البيت الحمدلله ماعندنا كذا لان اروح واجي و الحمدلله بعد طلاقي ماضعفت كملت دراستي و توظفت وطورت حالي واروح مناسبات وجمعات بس تلاحظين بالمجتمع غمز ولمز وكلام ماله طعم
يعني مثل وحده بمناسبه كنت مع امي و حده تسلم علي ع بالها انا اختي الاصغر قالت هاذي فلانه قالت لا هاذي بنتي الكبيره(وقالت اسمي
قالت اييه بنتك المطلقه !! بالله ايش فيها يعني ليه قالتها كذا وكأن الطلاق عياره
وكذا موقف غثيث بس مااني حابه اذكرها
بس بقول اني حاليا
اشتاق احمل و اولد و اشيل لي طفل بحضني .. اشتري له ملابس و اضمه و احضنه
اشتاق له يناديني ماما و اشتاق اشوف امي وابوي الله يخليهم لي شايلينه
اشتاق يكون عندي زوج يشاركني الحياه و الغرفه و السرير .. مليت من الوحده والله العظيم
كل رمضان اقول رمضان الجاي في بيت زوجي
كل عيد اقول العيد الجاي مع زوجي وتروح الايام والسنين و لااتحقق
لعلها خيره و بيعوضني بالافضل
طبعا انا قدام العالم حتى اهلي مافي مثل ضحكي وهبالي و عايشه اسعد شي حتى اغلب الناس اللي يعرفوني بالدوام و صديقاتي يسموني طاقه ايجابيه لان دايم اونسهم وانكت عليهم لان مااحب ابين ضعفي قدام احد حتى قدام اهلي ، لان مرات اذا جا طاري الزواج اقلب الموضوع ضحك ومزح
لاأحد يقولي انشغلي في مستقبلك انا توظفت من فتره وخلص عقدي و حاليا بتوظف وظيفه ثانيه بدايه السنه الدراسيه الجديده ومخلصه دراستي الجامعيه
او يقولي كلمي خطابات حنا مستحيل نتزوج ناس مانعرفهم او نعرف اهلهم

دعواتكم لي لعل فيكم شخص لو اقسم على الله لأبره


يارب حقق لي حلماً يرونه مستحيلا و أراه بحسن ظني بك قريباً