قبل كم يوم سويت كشري بس اخذت طريقته من مصريه صراحه طعمه جنان من جد من جد طريقه مصريه كنت بنزله لكم بنفس اليوم بس مركز التحميل يرفع الضغط
نبدأ بالمقادير :
زبدية عدس بني + 3 زبديات رز مصري + كورتين شعيريه + 3 بصلات تقطع شرائح + كوب مكرونه
المقادير تقدرين تزيدينها او تنقصينها بس العدس يكون دايما نص كمية الرز
تسلقين العدس نصف استواء
تغسلين الرز وتنقعينه 5 دقائق
تسلقين المكرونه بزيت وملح
تقلين البصل بكمية زيت مناسبه ماتكثرين الزيت ولا تقللينه
تكسرين الشعيريه وتحمسينها بزيت
وبعد كذا تحطين العدس والرز والشعيريه بقدر وتحطين ملح و شوي من زيت البصل عشان تبان فيه نكهة الكشري مضبوط
وتخلطينها مع بعض
وتصبين فوقهم ماء مغلي ولما تبان حبات الرز قصري عليه وخليه يستوي
وقت التقديم حطي شوي زيت وفلفل اسود في قدر وشوحي المكرونه فيه وبعد كذا حطي بصحن التقديم الرز وفوقه المكرونه وفوقهم البصل المقلي
نجي للصوص:
4 فصوص ثوم مفرومه + 4 حبات طماطم + ملعقة معجون طماطم + ثلاث ارباع فنجان شاي خل ابيض +ملح + فلفل احمر
تطحنين الطماطم بالخلاط
تحمسين الثوم بشوي زيت لما يصير لونه اصفر وتحطين عصير الطماطم فوق الثوم وتحركيهم
تحطين معجون الطماطم والخل والملح والفلفل على الطماطم وتحركينها وتخلينها على نار هادئه لما يتسبك
نجي للدقه :
عشان تاكلين كشري مصر لازم لازم لازم تسوي الدقه
8 فصوص ثوم مفرومه + عصير ليمونتين + نص كوب خل + ملح + 3 ملاعق كمون + 3 ملاعق فلفل احمر + قليل ماء
تخلطين المواد الناشفه مع بعض وبعدين تخلطينها مع المواد السائله وتحطينها على النار لما تفور وتطلع ريحتها واذا احتاجة ماء زيديها شوي
وهذي صورة الصوص والدقه ( لاتقولين ان الدقه شويه لأن طعمها قوي وملعقه بصحنك من الدقه بتكفيك )
اخليكم مع الصور ويارب يعجبكم
يارب عجبتكم الصور لكم ودي وحبي
تبارك الله
تسلم الايادي