الكل يحبها ويتلزق فيها وصلت يلزقون بزرانهم فيها هالبنت مختلفه عن الكل

صباح الخير
اليوم بنات باقولكم سالفه وعطونا رايكم
السالفه وحده من قريباتي البعيدين يعني انا البنت شخصيتها ماعرفها الا بالمناسبات
بس كل مره اقول هالبنت فيها شي غير عن الكل والله والله يابنات اتمنى احتك فيها احس اني انتمي لهالبنت احس ودي اتعرف عليها سبحان الله راحه نفسيه عجيبه من اول نظره
مرت الايام ونسولف بفلانه وعلانه والله يابنات الاغلب اجمع على حبها اقل شي اللي ماتكلمت عنها ماسبتها واقول ياربي هالبنت وش تسوي
مرت الايام واجتمعنا باستراحه الاسبوع اللي طاف والله العظيم يابنات حلفت باسم الله العظيم عشان اوصل لكم الصوره عنها بالضبط اول شي اذ صارت سالفه يوجهون الكلام والنظرات لها والمشوره لها حتى يوم جت الطلبيه اول وحده شاوروها هي
والثانيه تخيلوا امهات الصغار يتلزقون فيها يقولون فلانه ترى ولدي يحبك والثانيه تقول بنتي تقول متى تجي فلانه انا صرت كذا 😦
اللي خلاني اتحمس اني اعرف وش سر هالتلزق فيها قلت اكييد البنت فيها شي ماحد يوصل الى المرحله ذي الا محبه من قلب
يوم طلعت سالت البنات عنها لانهم يعرفونها مرره قلتها كذا على بلاطه ماشالله يافلانه تحبونها وش سر المحبه ذي وسولفوا لي عنها
ااااااااه بس يابنات تمنيت انها اختي لاني افتقد هالشي باللي حولي
تخيلوا طلعت البنت زينا تزعل وتعصب وتهاوش عادي
بس عمرها ماستفزت احد او غلطت على احد وعندها قدره الهيه بجبر الخواطر تجبر خاطر كل قلب تشوفه مكسور
باقولكم اللي قالوه عنها
لو شافت وحده متهاوشه مع زوجها تتكلم معها لين تقنعها ان الحياه كلها مشاكل لو شافت وحده بس جايبه بنات وحزينه وتتحلطم تعلمها ان البنات بيقومون فيها اذ كبرت وان غيرها محروم
عارفين الانسانه اللي تجبر كسرك على طول وتحسسك بالنعم اللي عندك هذي هي بالضبط
واذ جت تسولف تعطي كلن وجوه ( وهالشي لاحظته من اول جلسه لها معنا )
مثلا ناس يحبون يهرجون بالمطبخ تسولف عن هالشي مستحيل تشطح بموضوع تتحس منه فلانه وعلانه عنده شي عجيب على ادارات المواضيع
سبحان الله جبرها بس للخواطر طالع على شكلها الخارجي كل شي فيها حلو ملامحها عاديه ومع هذا نشوفها جميله والحب والراحه لها من اول جلسه
ومع هذا كله ثقيله تسسولف بدون ماحسها خفيفه لاتسالوني كيف
والاهم من هذا كله ثقيييله وماحد مستخف فيها وشلون جمعت كل هالشي مدري هي عشانها اجتماعيه مره صارت عندها خبره بالناس ومشاعرها مدري كذا من ربي مدري
انتم قولوا رايكم هل هالشي تتوقعون اقدر اغير من نفسي واصير مثلها او هي هبه من الله يعطيها ناس عن ناس المهم هالبنت حبيتها اكثر يوم عرفت مواقفها عجزت انساها البنت مختلفه