الكوم + الفقس معلومة تهمك ماسمعتها جربتها بنفسي ...

صباح الخير ....


كثير منا يسوي خلطات وتفشل لكن مو عارفين وش السبب ومن وين

يمكن الخلطه كويسه بس من كثر مكوناتها ماندري وش اللي نفعنا ووش اللي ضرنا

انا بقولكم عن تجربتي لمرهم الكوم ( المرهم موب الكريم للامانه )


انا ماستخدمه للتبيض بس شفته يدخل بخلطات كثير تسوونها انتم وقريت عنها وفيه من يمدح وفيه من يذم

المهم

انا فيني بهق وعطاني الدكتور الكوم كعلاج بس قالي خليك حذرررررره باستخدامه لانه يجيب تشققات وحنا موب ناقصين

حتى اول ماسالني بالمراجعه قال عسى ماطلع لك تشققات والحمدلله ماطلع فيني لان المكان اللي احط فيه موب معرض للتشققات


بس اللي لاحظته اني بالبدايه تفتحت حتى ايديني صارت حلوة وفاتحه وحوالين البقع بعد تفتح وكان لي اقل من شهر حتى اني استخدمته على ركبي واكواعي وفتحت مررة وفرحت بالنتيجه ونويت استخدمه لجسمي كله بس ربي ستر

لان كل البياض قلب سواااااااااااد يفشللل صار جسمي الوان كنه حروق وايديني انواااع السواد واكواعي وركبي حدث ولا حرج ووقفته برمضان عل وعسى يخف بس مافي فايده الشكوى لله

بس للامانه البهق تقريبا راح والحمدلله وبرجع اكمل عليه والله يعين

الزبده اللي تستخدم خلطه فيها الكوم تحاول تستبدله بكريم حساسية ثاني او ماتطول اكثر من شهر يمكن الاستخدام الطويل هو اللي يحرق الجلد والله اعلم ....


وشغله ثانية خاااااااصه للي يعانون من البهاق بس << ركزوا عليها

انتبهوا من الفقس صح يبيض ونفرح بالنتيجه بس تراه يثير البهق عندك وعن تجربه بعد :09:


اتمنى اني قدرت افيدكم لو بمعلومه بسيطه مقابل كل اللي استفدته واتعلمته منكم الله يجزاكم عني خير الجزاء

ويجعل مانكتبه شاهدا لنا لا علينا ويشفيني ومرضى المسلمين ويبعد عنكم كل مكروووه ....


اللهم اغفر لامي وابي واجمعنا واياهم في جنات النعيم .....