اللهم اجرني في مصيبتي واخلفني خيرا منها

السلام عليكم ورحمة الله وبركاته 
اكتب لكم قصة حملي واستعدادي له
بعد سنوات ورحلة علاج كلفني الكثير من المال والسفر والصحه
اراد الله عزوجل ان احمل فرحت بحملي ولم اخبر الا القليل ممن احبهم 
الا ان دخلت شهري السادس عرف الجميع بحملي وكنت انتضره بفارغ الصبر
عملت سونار واخبرتني الدكتوره بانه ولد فرحتي لاتوصف به 
دخلت الشهر التاسع  وبدات اجهز لطفلي  ولي واشتريت علب للاعشاب
والخلطات وحفظت بدفتر عندي  اعشاب للنفاس واخرى للخلطات 
وكنت اقول لاختي راح اعمل واعمل ابخرج من الاربعين بلوك جديد 
اخترت اسم جميل لطفلي وكنت لما احس بحركته اقول لزوجي من السعاده
جهزت بيتي وغرفه استقبال الضيوف وحطيت سريري وسرير مولودي 
جهزت شنطتي بها ملابسي ولصغيري لوقت الولاده 
كنت ببدايه التاسع جاني الم خفيف  وحسيت شي انكب رحت الحمام الله يكرمكم
وجدت دم بغزاره ع المستشفى ع طول والدم غرق ملابسي وعبايتي مرا
ودخلوني كشك الولاده عملت لي تصوير بكشك الولاده سريع بعد ان قاست نبضه 
وكانت الصاعقه لي لايوجد نبض بكيت بحرقه حسيت كل احلامي تبخرت 
ولدته اللهم اجرني في مصيبتي واخلفني خير منه 
انا الان جسد بلاروح لا اكل ولا اشرب والله ماجوع  وساكته ولا لي نفس بالزيارات
دموعي ماتتوقف واحاسب نفسي كثير لو ماتعبت نفسي ماحصل النزيف 
ولو ماخرجت للزياره الفلانيه  
ولو ولو   
تعبانه الى اقصى حد 
دموعي لاتفارقني دايم سرحانه بعالم ثاني ماعرف كيف اوصف لكم 
ماحسني عايشه مع الناس 
اخت زوجي حامل بالسادس ارسلت لي تتحمد لي بالسلامه وانها تعبانه ماتقدر تجيني 
وبعده بيومين جاتني قريبه لها وقالت كنت ابجيك بس جاتني فلانه تقصد اخت زوجي 
وعرفت انها خايفه مني ع حملها 
سلفتي جاتني ولاجابت الصغير ماكمل شهرين مع العلم انها قريبتي جدا 
ودايم تجيب اخوه الكبير اذا فكرت بزياره او سوق  واستغربت فين تركته 
وعرفت انه مع ابوه بالسياره ساعه كامله 
اسالكم بالله كيف اعيش مع هالعالم راح تزيد همي 
وكيف انسى اللي حصل لي  والله اني بهم مايعلمه الا الله 
ودايم ابكي حسره ع ضناي 
حالتي الان لابسه طرحه وشعري 4 ايام مامشطته  بس المه من الهم
عيوني من البكاء داخله جوا ومتورمه 
وجهي شاحب 
معي دوخه والم بصدري والله كل الالم يهون عندي عند الم الفراق
مابغا احد يزورني اسيب الحرمه وابكي بغرفتي وارجع 
ماتحمل زيارات 
زوجي ترك البيت طفش من البكاءاللي فيه  وصار ينام وياكل عند امه 
ومادري لو رجع لخياناته لان الجو صافي له
اسالكم بالله ادعولي بالعوض   
وقولوا لي كيف اعيش عادي وانا ببالي ضناي ولحضه ولادته ماتفارقني
دعواتكم لي الله يسعدكم يارب الهم ذابحني احسني تعبت مرا ماقدر اتحمل 
احيانا اقول لو مت معه احسن من هالحاله 
 يارب تعوضني