انا الحقيقه ماسوي شي خاص لرمضان لان قناعتي انه شهر صوم مو لازم سفر منوعه وحركات كل يوم اسوي شي مثلا شاورما دجاج بالكريمه ورز ابيض شوربه كذا شي خفيف وخلاص حتى نصلي خفيفين

وااااه ياحلو رمضان وسيرته الله يبلغنا والمسلميين لافاقدين ولامفقودين يارب

اناابتدي شغلي من نص شعبان اشتغل لي ولاميمتي حبيبتي لانها فيه شغلات ماتعرفها وتحب تراسل الجيران الله لايحرمها الاجر وبنفس الوقت هي لحالها ماعندها بنات غيري المهم نبتدي شغلنا بنص شهر شعبان بالبهارات نشتريها وننقيها ونغسلها ونحمسها ونوديها الطاحون يطحنها ونفس الشي البن للقهوه تنقيه وغسل وحمس وطحن وبعدها يبتدي مشروع الفرزنه
الف ورق عنب بصواني قصدير انااسويه زي حق البروستداعبي طبقتين وخلاص بس يصير احط بعدين المويه والبهارات وعالفرن
والف سنبوسة لحم ودجاج واجبان مشكله
والف اصابع جبن ومثلثات سميد بعد
واسوي الكبه باللحم والبرغل
وبعد اسوي افخاذ الدجاج بالبف باستري
واجيب كنافه وافرمها كلها واخلطها بالزيت واقسمها في اكياس جاهزه تكون بس اطلعها عالصينيه والحشوه ثم الفرن
اجيب ذبيحة رمضان وافرم منها لحم للسنبوسه واقطع منها للشوربه واوزعها باكياس على قد الطبخه
ونفس الشي الدجاج اجيبه طازج وافرم منه واقطع للشوربه بعد والمكرونات والايدامات
واسوي كيستين ثلاث دجاج مبهر بالخلطه للشاورما او للشيش طاووق بس اطلعه يذوب شوي وعالصينيه والفرن
واقضي اللي ناقصني من الخضار واللي يتقطع ويتفرزن واللي يتنقى والفه بمناديل المطبخ زي الورقيات واحطه تحت بحافظه
واسوي الشيره بجيك كبير وبالثلاجه تحت
وافرم مكسرات واحطها بعلب بالثلاجه
واطحن بسكوت للحلا واحمس حليب مجفف بعد للحلويات والسكر اطحنه ناعم
وطبعاً انزل اشتري المقاضي الناقصه للمطبخ
هذي اهم استعدادتي المطبخيه
اما البيت فاكيد امسكه بالدور تنظيف عميق مع المطبخ له الجانب الاكبر طبعاً
واغسل شراشف الصلاة مع السجاجيد واطيبها وابخرها
واذا فيه بالبيت سجاد وسخان اوديه للمغسله تتنظف
وممكن اغير شغلات بالبيت لكسر الروتين
واجهز البخور والفحم لازم يومياً ادخن البيت بعد صلاة التراويح
وطبعاً اغلب اغراض العيد اكون شاريتها من شعبان لي ولعيالي يعني بالكثير اول رمضان نزله او نزلتين للسوق واكون خالصه
وطبعاً قبل اي شي استغل وقتي بقراءة القران وماافرط في صلاة التراويح اما بالمسجد او بالبيت واحرص عيالي عليها والتلفزيون لله الحمد ملغي عندي من زمان مااعترف الا باذاعة القران ربي يثبتنا والمسلميين بس زيادة حرص هالشهر بالذات استغله بالترفيه الحلال اجلس مع عيالي نسولف ونضحك او اروح لاهلي ونسهر عندهم واحب اعزم اهلي واهل زوجي لازم برمضان من باب حب الاجر والصله وارسل لجيراني اللي ربي يقدرني عليه وهم نفس الشي واحب اتواصل معاهم لو مره نجتمع بهالشهر نسولف ونونس بعض
وطبعاً ليلة رمضان اول مايعلن بالتلفزيون امسك جوالي واتصل على اغلب قرابتي امي وابوي وعمتي وخالتي وام زوجي لابد اهنيهم بدخول الشهر الفضيل والدعاء لهم
واغلب معارفي من صديقات ارسل لهم بطاقة تهنئه مع الدعاء لهم بصالح الاعمال
وهذي هي اغلب اعمالي بشهر رمضان بلغنا الله واياكم واحنا بصحه وسلامه وامان احنا والامه الاسلاميه يارب العالمين .........

موضوع حلو ****الله يكتمل ونستفيد كلنا والجر للجميع

يــــــــــازين هالطاري :)


الله يبلغنا اياه لافاقدين ولامفقودين


اللي عندها مشاغل وكذا تفرزن مع اني احسه بدري وفيه احد بيسافر بالاجازه
اهم شي الوحده قبل ماتبدا تنظف فريزهاا
وسمبوسه لاضبطتها تحطهم بصحن وتبعدهن عن بعض وتجمدهم ساعه بفريز
بعدين تكيسهم بااكياس ومن هنا مايتلزقون

دعواتكم

موضووع رووعه ويفتح النفس..♡
الله يبلغنا رمضان والجمييع في صحه وعافييه يارب
انا إن شاءالله ببدأ من نص شعبان،،اهم شي عندي السمبوسه لازم افرزن لعشرة ايام على الاقل وباقي الاشياء افضلها في يومها
وياريت ترفعوا الموضوع ولو بدعوه♡♥♡