اللهم لك الحمد.. قصة حملي وولادتي

بسم الله الرحمن الرحيم


بداية لا احل لاحد نقل قصتي الى منتديات اخرى... وارجو منكم عزيزاتي الدعاء لي ولزوجي بالعوض والصبر وبالطفل السليم المعافى ان شاء الله


قصة حملي

في شهر 4 - 2008 كنت مسافرة مع زوجي وكنت احس بتعب شديد اسفل الظهر وانا اتمشى وطبعا ماجا على بالي اني اكون حامل مع اني احب الاطفال موت بس كنت مأجلة موضوع الحمل بسبب ظروف زوجي وسفره المتواصل

بعد كم يوم سويت تحليل منزلي وكانت المفاجأة اني حامل واستمر الحمل 6 اسابيع وبدأت الافرازات البنية والدم بالنزول وسلمت امري لله اني سأجهض وفعلا حدث اجهاض في الاسبوع السادس

حسيت بضيق شديد وتعلق بذاك الجنين واتفقت مع زوجي ان بعد السفر نحاول احمل ثاني اذا رب العالمين كتب لي ذالك

بعد مارجعنا صارت المحاولات وماحدث حمل بعدين قررت اروح الطبيب ورحت لاخصائية وكشفت وسوت تحاليل وقالت فيك قرحة في عنق الرحم والتهابات وهي الا تعيق الحمل وعطتني علاج وتحاميل وقالت لا تستعجلي في الحمل لحد ما تتشافي تماما

اخدت العلاج شهر 7 وحسيت بتحسن وشهر 8 كمان ماصار حمل وقلت بتوكل على ربي ولا بفكر في الموضوع لان ربي اذا اراد لي الحمل بيصير

شهر 9 كان شهر رمضان وانشغلت بالشهر الفضيل والاهل والزيارات والعبادات وجا العيد وزوجي كان بسافر الخارج دورة تبع شغله وكنت متضايقة مررة واحس بتعب وخمول وتذكرت ان موعد دورتي قرب قلت ما ادري اسوي تحليل ولا اصبر تتأخر لان كل مرة اسوي تحليل ويطلع لي خط واتضايق

سألت زوجي قال اصبري اذا حامل ماراح تجيك فما بيتغير شي بتعرفي بتعرفي قلت طيب ... شوي جلس هو عالكمبيوتر وانا رحت الحمام تكرمون وشفت اختبار الحمل وايدي مو قادرة تمسك نفسهاااا قلت يالله باقي يومين عليها خليني اجرب... واذا طلعت حامل ابشر زوجي قبل لايسافر بكرة.... سويت الاختبار ودرت وجهي ماودي اشوف انتظرت دقيقتين فتحت عين شوي شوي كأني اشوف خط ثاني

قربت بسرعة مسكته اي والله خطين دمعت عيني ...على طول فتحت الباب وواقفة والتحليل بأيدي وزوجي شافني قال ايش؟؟ سويتيه؟؟؟ هزيت راسي ......قال حامل؟؟؟؟؟ حسيت لساني مربوط فهزيت راسي ثاني

ترك الي في ايده وجا وضمني لصدره وبكا معاي وصلينا شكر لله على هالنعمة ...الله يرزق كل محروم يارب

وقلت بتابع بدري علشان اتحاشى الاجهاض مرة ثانية ورحت سويت تحليل دم وعطتني الدكتورة فولك اسد ومثبت وقالت استمري عليهم ال3 شهور

وانا بطبيعتي ما احب اخد ادوية بس قلت يالله الدكتورة تفهم اكثر مني ....
موعدي الثاني كان في الاسبوع ال7 سوو لي الترا ساوند وسمعت قلب الجنين وطار قلبي معاه ... اقول سبحان الله في شي عايش جوا فيني الله يسلمه ويحفظه لي يارب
بعدين قالت لي الدكتورة كل شي سليم تعالي الاسبوع ال12 قلت طيب
طبعا بدأت معاناة الوحم ما اقدر اكل شي ابدا ابدا حتى البسكوت ما اقدر اكمل قطعة ولا اشتهي شي ابدااا
وكرهت زوجي وريحته والشقة وجتني حالة اكتئاب طول اليوم ايدي على خدي لا اضحك لا اسولف وزوجي مسكين مو عارف ايش يسوي عشان يطلعني من هالحالة... للعلم ان اهلي ساكنين بالشرقية وانا مع زوجي لوحدنا بالرياض...
وماكان عندي احد اعرفه فلا ازور احد ولا احد يزورني ولا اكلم احد غير اهلي وصديقتي المقربة مرررة واشكي لها الحال وسبحان الله ربي رزقها الحمل معاي بنفس الشهر فكنا نفضفض لبعض ونهون على بعض لان وحامها كان اشد مني...

المهم انا مع هالتعب كنت انتظر الاسبوع 12 بفارغ الصبر نفسي اسمع نبض جنيني ثاني واشوفه وقلت لزوجي لازم تكون معاي بهالموعد عشان تسمع نبض ولي العهد قال طيب
الاسبوع 12 كلمت اسوي موعد قالو ان الدكتورة الا اتابع معاها في مستشفى ثاني وماراح تكون موجودة هالاسبوع طبعا انا الحماس ذابحني قلت عادي اي دكتورة قالو تعالي ونخليك عالانتظار
رحت ودخلوني على استشارية باكستانية قالت يالله الترا ساوند فرحت ودخلت انا وزوجي وجت اخصائية الاشعة وقامت تحوس تحوس شوي تقول نامي على ظهرك وشوي على جنبك وتضغط بشكل مو طبيعي قلت لها عورتيني قالت انتي جاية والمثانة فاضية قلت لها حرام عليك صار لي 5 ساعات ماسكة نفسي اروح الحمام وانتي تقولي المثانة فاضية؟؟ شوي وقامت تحوس ثاني وسمعتنا النبض وزوجي فرحاااااان حتى يقول لها يبان جنس الجنين؟ قالت بدري مرررة قلت صحيح فاضي
قالت شوفي انا من كثر ماضغطت عليك صار عندك تكتل وتجمع دم قومي امشي شوي واشربي موية وبناديك ثاني قلت حسبي الله عليك بطني صار احمر واتاريك بترجعيني؟؟
طلت امشي شوي ونادوني بعد خمس دقايق رحت اشوف ودوني غرفة ثانية وجهاز كبير وجو دكتورتين بدل الدكتورة ونفس الحوسة انا خفت وزوجي كمان قال لهم في شي؟؟ قالو لااا بس نتأكد .. رجعت انا سألتها في شي؟ قالت لا لا مافي خلاص قومي وارجعي للدكتورة لما ينادونك قلت اوك

طلعت وايدي على قلبي شفتهم مطلعين صور الالترا ساوند وراحت اخصائية الاشعة تناظر في الصور وفتحت كتاب وتنشر تنشر وتكتب اشياء ورى الصور وانا اقول ***** الله خير

نادوني ودخلت للدكتورة قالت كل شي اوك النبض اوك البيبي اوك قلت الحمد لله وقمت عن الكرسي بطلع الا الدكتورة تبتسم وتقول بس انتي في ورم ........؟؟؟ نعم؟ ورم ايش؟ وكذا الا بقول لشخص عندك ورم
قالت ورم ليفي عادي فوق الرحم مايأثر على الحمل بس لازم علاج بعد ولادة
انا اقول لها اكيييد؟ هزت لي راسها قلت اوك ودرت ظهري بمشي الا تقول وبيبي في شي مو كويس
حسيت قلبي وقف.. يعني ايش توك تقولي مافي شي كل شي سليم قالت ايوة في سمك ورى رقبة البيبي وهذا شي مو طبيعي زوجك يقرب لك قلت لها لا
قالت كم عمرك قلت 24
قالت امممممم قلت لها مافهمت ايش فيه البيبي وسوت روحها تشرح مافهمت شي وطبعا تقول وهي فرحانة وانا شوي وانفجر بكا وزوجي برا مايدري بالدنيا
الي فهمته منها بس ان البيبي راح يكون منغولي ... قلت ليها مافي امل يكون طبيعي؟ قالت بدون نفس ***** الله

طلعت محطمة ورجولي موشايلتني قلت لزوجي يالله مشينا قال شفيك؟ قلت له الي صار جمد مكانه وقال استغفر الله الله لايقوله ماعليك منها روحي مستشفى ثاني ***** الله يطمنوناا
قلت له مابروح مكان خلاص كل شي بارادة الله قال بكيفك ... رجعت البيت وعلى طول الكمبيوتر وادور في القوقل عن سمك رقبة الجنين ومن الي شفته ان احتمال 70% يكون منغولي.. قلت الحمد لله على كل حال

رميت نفسي على السرير وانفجرت بكاااا ليش؟ ليش انا؟ ليش يصير كذا .. استغفر الله الانسان في لحظة ضعف يقول اي شي وزوجي يهدي فيني وهو اصلا مو مصدق يقول صدقيني مافيه شي البيبي صدقيني

طبعا مانمت طول الليل استنا بكرة يجي وقلت لزوجي وديني اسوي الترا ساوند ثاني في مكان ثاني ورحنا طبعا وسويت وقالت الدكتورة انا موباين شي عندي لان البيبي صغير مرررة واحنا مانسوي في هالفترة الترا ساوند اساسا

طلعت قلت لزوجي وديني لاهلي نفسي اغير جو ما ابغى اجلس هنا واتأزم ونفسيتي تتعب كفاية اني لا اكل لا شرب زي الناس ووزني نازل 5 كيلو

نزلت الشرقية عند اهلي وطبعا انا من نوع الي ما احب ابين لاحد اني متضايقة وخاصة الوالدة الله يخليها لانها تتأثر بسرعة

وصار الاسبوع 14 وحسيت باول حركة للبيبي وجلست ابكي واح ايدي على بطني وادعي ان مايكون كلامهم صحيح

وسويت لي موعد مع استشاري قالو لي عنه ناس انه كويس وشاطر في الالترا ساوند وقلت بتابع في الشرقية خلاص ورحت في الاسبوع ال16 لعنده وانا ارجف خايفه بس ماقلت له ولا شي قلت بشوف هو ايش يقول

حط الجهاز وقال انتي متأكدة في الاسبوع 16 ؟ مبين عندي 18؟ قلت ايوة متأكدة دورتي كانت شهر 9 قال طيب وجلس يقول اليوم بنشوف الجنس قال لي ايش نفسك فيه؟ قلت والله اي شي اهم شي تمام الخلقة والصحة بس انا احب البنات اكثر ونفسي بكري تكون بنت قال ايوة بنوتة
فرحت فرحة ناقصة لاني كنت انتظر اي شي كويس يقول لي عنهاا .. قال شوفي هذا القلب وهذا الدماغ ووووو

قلت له كل شي اوك؟ قال ماخلصنا بس اوك للحين قلت لان قالولي ان البيبي يمكن فيه عيب خلقي قال استغفر الله مين قال لك قلت له القصة قال ***** الله مو صحيح شوي وقال في عرض في حوض احدى كليتين البيبي قلت يعني ايش؟ قال يمكن ارتجاع ابوال قلت له خطير قال لا يتعالج بعد الولادة

شوي قال والامعاء ما ادري شفيها بعد لاكن شوفي انصحك بما ان انوجدت اعراض مو اوك في البيبي تسوي تحليل السائل الامينوسي علشان تقطعي الشك باليقين.. لاكن حتى لو عرفتي ماراح تستفيدي شي لان ماراح تقدري تنزليه لان خلاص عدى فترة مايجيز الشرع فيها الاجهاض

وسوا لي الترا ساوند ملون وشفت بنوتتي ياقلبي حسيت ان فيها شبه من ابوها قلت الي مصابين بمتلازمة داون مايشبهو اهلهم بس يمكن لان لسا صغيرة فانا اتهيأ انها تشبه له

طلعت من الدكتور كلمني زوجي بشري قلت له الحمد لله قال قالو لك الجنس قلت ايوة انت وش نفسك فيه قال اي شي كل شي من الله حلو ونعمة قلت له بنوتة طار من الفرح قال الله يجيبها بالسلامة وكيف صحتها قلت له بعدين اقول لك

رجعت البيت افكر اسوي التحليل او لا؟ يمكن اعرف افضل لي علشان اقدر اتأقلم لحد الولادة ولما تنولد اتقبلها واربيها كويس ويمكن ما اعرف افضل عشن لا اجلس ابكي طول الحمل وتتأثر نفسيتي وتتأثر البنت

زوجي قال لاتسويه انا متأكد ان مافيها شي وانا اقول لا اسويه احسن والدكتور عطاني مهلة للاسبوع 18 لان افضل وقت لعمله بين 14-20 قال زوجي انا بروح بتكلم مع الدكتور وبشوف ايش لنا وايش علينا من ورى هالتحليل وفعلا رحنا وشرح لنا ان تحليل بسيط ينوخد من خلال ابرة صغيرة من البطن الى سائل الجنين وهم يسو الترا ساوند وتنأخد كمية صغيرة من السائل ويجرى عليها التحاليل وتبين اذا كان في خلل كروموسومي وهي دقيقة بنسبة 99% ولكن مكلفة يمكن توصل 14 الف ريال ويمكن تسبب اجهاض اذا الرحم ماعجبه موضوع ان شي يدخل فيه او يمكن يموت الجنين اذا ماكانت الابرة معقمة كويس

قلنا اوك راح نسويه بس راح نسأل شركة التأمين اذا تغطيه او لا وبكرة موعد التحليل
نفس اليوم جتنا الموافقة من قبل الشركة والحمد لله ويوم ثاني من الصباح رحت الموعد كنت الاسبوع 18 حينها
وشفت العدة والمعقمات وغمضت عيني قلت مابشوف شي والدكتور يقول عادي ماراح تحسي بشي طبعا حط الابرة حسيت بوخز صغير اقل من ابرة سحب الدم حتى وقال لي خلاص خلصنا
شوفي البيبي سليم لسا يتحرك وبما ان ماصار شي لاتتوقعي راح يصير شي للبيبي بعدين الحمد لله

اشوفك بعد شهر ***** الله والتحاليل بعد اسبوعين النتيجة تظهر وان شاء الله خير



اكمل لكم بعدين لاني تعبت من الكتابة وان لسا والدة....... رجاء بنات الي ما تحب القصص المقطعة لاتكتب لي عبارات