أخواتي ...ربي يفك عنكم ويسهل ولادتكم بخير ...اللهم آمين
طيلة فترة حمل أختي الصغرى كنت هنا معاكم ...فرحت للي
ولدوا بخير وقلقت معكم على كل مين تأخرت وحزنت وبكيت
عيوني على كل مين اختارها الله وامتحنها بصبرها وبفراق
طفلها أو جنينها .
حمل أختي الوحيدة هو الأول بالعيلة طبعا فرحتنا ماكانت
بتتقدر بثمن ..ومن البداية كنت بداوم هون بالقسم
بحاول أجيبلها كل المعلومات اللي بتفيدها بالحمل .
بس المشاكل كلها بلشت وقت خلص الوحام ببداية الرابع
انفتحت شهية أختي وماعادت حرمت نفسها من شي
...طبعا ببداية الحمل كانت دايما متعبة ومرهقة
ومابتشبع نوم خالص ....نحن انا وماما فكرنا أنه وقت
بيخلص الوحام حتنتهي هالحالة من الكسل بس للأسف
أختي الله يصلحها عجبتها وضلت على أكل ونوم
(معذورة هي الدلولة بالعيلة وبكرية ) وبلش جسمها
يتعود على قلة الحركة ووقفت المشي .
المصيبة أنو كان وحامها على الحلويات ..الطبيب اللي
كان متابعها كان هو نفسه اللي ولدها ...
كان خايف بسبب ضغطها المنخفض واستمرت كل الحمل
على دوا الضغط ...
الله المستعان كانت كتير تعبانة آخر شهرين بحيث
ماكانت بتقدر تطبخ ولاتدير بالها على البيت ...وزاد
وزنها حوالي 25كيلو وهون الطامة . والله يابنات الصحة
زينة بس مو بالحمل ...اتصوروا أديش الوزن تقيل على
الجسم والقلب والله حتى عظامها يوجعوها واتحملت آلام
مرعبة ورفضت تاخد مسكن موصوف من الطبيب كانت
خايفة على الجنين بالشهر التاسع بات الموضوع واضح أكتر
...عملية قيصرية بسبب الضغط اللي مو راضي يطلع
وبسبب وزن البيبي اللي اتجاوز الأربعة بسم الله ماشاء الله .
راس البيبي رفض ينزل الحوض ومع أنو أختي وافقت تستنى
لنهاية الأسبوع 39 إلا أنها كانت مجهزة حالها للعملية
كانت مستحيل فكرة ولادة طبيعية أبدا . واتحدد الموعد
أخيرا ....وهي الوحيدة اللي راحت المشفى وهي تضحك
ومستعجلة مو مصدقة أنها حترتاح أخيرا.
آآآآه يابنات الله لايدوقكم صعوبة الانتظار ...والله انها مرعبة
...الماما قعدت بالغرفة وجهها شاحب مو قادرة تتحرك من
الخوف ولسانها يذكر الله وأنا مشيت مع أختي حتى دخلوها
على السرير للمصعد ...همست بدانها :ضلي عم تصلي
على النبي صلوات الله وسلامه عليه لوقت التخدير .
كيف مسكت حالي من البكي مابعرف ...حسيت قلبي وقف .
بعد عشر دقايق جابولنا خبر أنو لو حابين نشوف البيبي
ونشرف على عملية تحميمه ..قامت ماما وحماة أختي وأنا
ضليت ناطرة بقلق ورايحة جاية بالغرفة مو قادرة أقعد
...وقت رجعت ماما شفت وجهها أصفر وعيونها زايغة بينما حماة
أختي ضحكتها شبر فرحانة بالبيبي ...بكلمة وحدة ماما قالتلي
بهمس : البيبي ماعم يبكي ساكت .
انا هون جمدت وبلشت الأفكار السود ...ياربي دخيلك
بعد كل هالتعب ... للعلم ماما كانت تشتغل ممرضة لفترة
وعندها خبرة لهيك كلامها كان موثق عندي وماجادلتها
أبدا .... وقت اجى حبيبي وروح قلبي أخدتوا من ايدين أبوه
بحجة بدي أشوفه أنا كمان وفورا عرفت أنو في شي مو
زابط ....يابنات وجهه كله مخدوش ودانه مجروحة ورقبته
والطفل ياقلبي عليه صحته بتجنن الله يحميه تقريبا
وزنه 4 كيلو وشوي ...بس تنفسه مو صحيح وعم يئن بوجع
انا طار عقلي وقلتله لصهري : الطفل مو بخير ...لازم
اخصائي أطفال يفحصوا فورا .....
الحمد لله استجاب صهري فورا وبلشوا الاتصالات وكل
طبيب مو فاضي وبده وقت ليجي ...ضليت مصرة حتى وافق
تالت طبيب يجي والحمد لله كان الطبيب قديم
وصاحب خبرة كبيرة كان بطريقه للمسجد وأصرت عليه الممرضة أنو
يجي . وقت فحص البيبي انتبهنا لجسمه المزرق ...ياقلبي
كله كدمات ورجوله مزرقة وأطراف أصابيعه ...أنا بقلبي
قلت خلاص هاد معو مرض القلب ...بس وقت الطبيب
حط اصبعتو بتم البيبي هداك بلش يمص بقوة رهيبة (المسكين
جوعان على أساس أمه وقفت الأكل 12 ساعة
عشان التخدير ) هون الطبيب تنفس براحة وقالنا
أن القلب مافي شي وممكن هاد تعب ولادة ...
ومع هيك ماكان مطمن لأنو البيبي مابكي خالص حتى
وقت الطبيب قرصو من قدمو وضل
يئن ومايبكي .حطولوا أوكسجين وضليت قاعدة معه
ماسكة الكمامة حتى ماتوقع منه ياعمري .
طلعت أختي بعد ساعة من العملية طمنا الطبيب عنها
وضلت ساعة حتى صحيت وبلشت الآلام وبلشت تبكي وتطلب
ماما قطعتلي قلبي ...وقت صحيت مزبوط بعد كم ساعة
كنا الحمد لله شلنا الأوكسجين عن البيبي بعد مافحصوا
الطبيب من جديد ولاأول مرة بحياتي بنبسط وقت
بسمع بكاء طفل ....
شكتلنا أختي عن سوء تصرف الممرضات الله
يسامحهون ...كشفوها تماما وما اهتموا لعورتها وحطولها القسطرة
بدون احساس ... ووقت اجى طبيب التخدير أختي كانت
منهكة تماما حتى ماقدرت تقول أو تطلب أنوا يغطوها على
الأقل لحتى وحدة منون انتبهت وغطت بطنها ...طبعا التخدير كان كامل ...ووحدة من القابلات اللي حضرت العملية
اعترفت إلنا أنون اتعذبوا كتير وقت طالعوا البيبي من
الرحم على أد حجموا مو كبير وماكانوا حابين يكبروا الجرح لهيك
البيبي شرب من مية الراس واجى مجروح ومخدوش ....
لاحول ولاقوة الا بالله والله يابنات ماكتبت هالموضوع
إلا لتاخدوا احتياطاتكم انتبهوا للوزن ....والله أختي كانت حتموت
رعبة وقت شافتوا مخدوش طبعا ماقلنالها أنو كان تعبان
خفنا عليها ... سهرت معها هديك الليلة وماغمضتلي عين ..
كانت داني وقلبي مع البيبي وكل ماطالع صوت غريب كنت
أقوم وأنط بسرعة لعنده ...بسبب المي اللي بلعها كان
الريق عنده كثيف مخاطي وكان مابقدر يتقيء
ولايبلعه ..فكان يختنق لهيك كان لازم كل شوي
أطمن أنه بخير وأنو بيتنفس منيح وأنو مو نايم على
ظهره ... الحمد لله على كل حال ...
هالىء مشكلتنا الوحيدة أنو ناطرين الحليب صحيح الطفل
رضع الصمغة بس هالطفل بيضل جوعان ..الله يبعتله رزقته
بسرعة يارب ... بالنهاية يابنات إذكروا اسم الله على ابن أختي
والله إنه قرة عين أبويه وجديه وخاله وأنا ...الله يخليه
ويحميه ويحفظه من العين وييبلغنا نفرح فيه اللهم آمين .
وعلى كل اللي حيهنوني ويدعوا لفارس ابن أختي بقلهم الله
يفرح قلوبكم زي مافرح قلبي فيه ويهنيكم ويحفظلكم
أولادكم ويبلغكم شوفتهم بسعادة ويعوضكم خير عن كل
مافقدتموه ...ولايحرم مسلم ولامسلمة من هالفرحة ومن
الذرية اللهم آمين يارب العالمين .