كوبونات الراقية تسجيل الدخول

*(*بصمه*)*

*(*بصمه*)* @bsmh_37

عضوة جديدة

اللهم يا مقلب القلوب و الابصار ثبت قلوبنا على دينك

ملتقى الإيمان •

بسم الله الرحمن الرحيم
وبه نستعين
ونصلي ونسلم ونبارك على اشرف البشر وسيد المرسلين سيدنا محمد عليه الصلاة والسلام وعلى اله وصحبه الطيبين الطاهرين
السلام عليكم ورحمة الله وبركاته



بداية سأبتعد كل البعد عن الاسلوب الدعوي المعتاد .. فلن أأخذ دور المعلمه او الموجهه ...بل سآخذ دور الاخت المحبه العاشقه اللي تخاف على خواتها من كل شر و مكروه >> عسى ربي يحفظكم انتوا ومن يعز عليكم من كل شر وسوء

اللي خلاني اكتب هالموضوع ان في بنت اهي اختي وحبيبتي في الله تبي الخير وتبي الصحبه الصالحه واشوفها تدخل قسم اسلاميات ..وتبحث بالمواضيع يمكن تقرا موضوع يلمس قلبها >>ليش؟؟؟
لان فطرتها سليمه ملت من اتباع الدنيا ..لم تجد السعاده في الحريه المزعومه ..
فأشوفها واهي بقسم الاسلاميات فرحانه بالحملات اللي موجوده فيه وتستانس .. (بارك الله في مقيمين القروبات والحملات التي تدعو لطاعة الله ) .. ومن تسجل انها بتشارك وتفرح

تشوفين أسئلتها بإستغراب شلون تقرون البقره يومياً !!! ... شلون تستغفرون اكثر من 1000 مره باليوم !!!! شلون تقومون الليل !!!! >>>> تكثر علامة التعجب في راسها وتكثر التساؤولات الى ان يوسوس لها الشيطان بأن انتي غير قادره على تطبيق ماهم يطبقونه انتي ملوله وانتي وانتي وانتي ................ الخ لين يقنعها بالعدول عن هذه الحمله

بنتي هذي حبيبتي وهالملاحظات اللي قلتها عنها ...ذكرتني بنفسي قبل

قبل ايام الثانويه كنت بنت اهم ماعلي رفيجاتي والموضه والطلعه والسوالف ... في فتره من الفترات صار في شهر كامل المدرسه يستضيفون داعيات يلقون علينا محاضرات في مسجد المدرسه .. بصراحه بالبدايه ما كنت عارفه قيمة المحاضره ادور بس رفيجاتي وين قاعدين بس عشان اقعد يمهم ونسولف ونعلق ونضحك .. لين زفتنا الابله وقعدت يمنا ..وغصب علي الحين استمع للمحاضره .. شوي شوي بدا يشدني كلامهم استناست فرحت قلت اي ابي اصير مثلهم (فجأه) ما خليت شريط الا شريته ما خليت كتيب الا قريته (وتأثرت فعلا) ومن بعد ما كنت سفور تحجبت وتنقبت ولبست عباية راس (كله مره وحده) والتزمت بالصلاه والصيام والقرآن وقيام الليل .. بس بعد فتره .. صار في فترو .. في ملل اشتقت لرفيجاتي .. اشتقت لضحك معاهم حسيت ان لي زمان ماضحكت .. (كنت ماخذه فكره غلط بما اني صرت ملتزمه لازم احافظ على واري بأني ما اضحك !!!!!) ..بعد فتره من التذبذب.. ردت ريما لعادتها القديمه .. فصخت العباة والنقاب ورديت على الاغاني ..

وتميت على هالحال فتره طوووووويله .. لين شوي شوي تدريجي قلبي يقرصني على الصلاه .. صليت والتزمت بالصلاه فقط ..وتميت على هالحال .. بعدين بحثت عن اذكار الصباح والمساء صرت الاقي راحه فيهم سبحان الله .. قمت اقرا القرآن مره وحده بالاسبوع سورة الكهف يوم الجمعه ..( طبعاً هالتطور بطيء جداً ) .. قمت ما أغير لما اشوف الشيخ نبيل العوضي بالتلفزيون .. بديت احب الوضع اللي انا فيه .. (لأني نضجت اكثر وانتهت فترة التذبذب مالت سن المراهقه ..وقمت اعرف ان الدين مو معناه العبوس بالعكس وربي دينا ابتسامه عريضه سبحان الله ) يعني مسكت الزين من الدنيا وتركت الشين والحمدالله رب العالمين
وسمعت عن قيمة الاستغفار بديت ارطب لساني بذكر الله ..ودايم اي شي اتمنى اني التزم فيه اي نوع من العبادات ادعي الله بصلاتي اني يعيني عليها (ليش؟؟) لانها بتوصلني لمرضاته سبحانه ..

وبعدين حسيت اني هاجره القرآن وما افتحه الا بالاسبوع مره .. قلت شوفي يا بنيه اذا ابليس يوسوس لج ان انتي وين وختم القرآن وين .. اذا السوره الاولى من القرآن اهي البقره وفيها ثلاث اجزاء ووين ووين على ماتخلصينها .. شلون بتختمينه ؟؟؟ لا يبا ماتقدرين انسي !!! خلج على الكهف وان ماقدرتي بعد عادي .. انتي زينه مافيج شي حافظه المعوذات والاخلاص والفاتحه لا والكرسي بعد !!!!!!!!!!!!

قمت شنو اقرا الفهرس مال المصحف واقرا من الايات القصيره ..حبيتها وحبيت المعاني وارتحت ..بدا الفضول يدخل قلبي ..انا بجم سوره من المصحف فرحت شلون لو بحثت بين صفحات هالكتاب الكريم ..اكيد بفهمم ربي اكثر وبقرب من ربي اكثر ..(طبعاً مع دعائي الدايم بالصلاه بأن الله يهديني ويربط على قلبي ما صار هالشي ولله الحمد) ..اهني حبيت البقر وآل عمران .......... الخ وصار عندي القرآن من اجمل ما يكون بعيداً عن وساوس الشيطان هذي طويله هذي اتعبج ..

القصد يا حبيبتي يا بنتي يا قلبي انتي .. البنات اللي تشوفينهم يقرون البقره يومياً ويستغفرون اكثر من 1000 مره باليوم هم ما قاموا من النوم الصبح ولقوا نفسهم عندهم هالقدره العجيبه ولا تحولوا بعصا سحريه ..لا والله بل بدوا تدريجياً وأول خطوه واهمها الصلاه في وقتها ..

التمسك بالصلاه ينهى عن الفحشاء والمنكر سبحان الله يخليج تكرهين كل الذنوب او الاقبال عليها ..تدرين شلون ؟؟؟ .. تلاقين نفسج توج مصليه وتفكرين مثلاً تسمعين اغنيه تقولين لا وي استغفر الله توني مصليه حرام اخرب على نفسي .. خل انطر شوي بعدين اسمع ..نطرتي شوي ..الا قرب وقت الصلاه الثانيه تقولين لا حرام بدال لا اتوضا واقعد على سجادتي انتظر صلاتي والملائكه تستغفرلي اسمع اغنيه لا اعوذ بالله ..وجذي طول اليوم سبحان الله لين انتي من داخل تلاقين نفسج بيوم يطري على بالج تقولين سبحان اللي صرف قلبي عن الاغاني ... تدرين لين لان الصلاه تخليج تتركين الذنوب وان تركتي الذنوب قربتي من ربج ..وان قربتي من ربج اكرمج بطاعته وحسن عبادته


عشان جذي يا الغاليه

لا اوصيج بصلاتج ..وادعي ربج باللي تبينه ..تبين تقرين البق ه يومياً مثل البنات ادعي ربج قولي يارب عيني على قراية البقره والقرآن ربي لا تحرمني فضلها ..اللهم اعني على ذكرك وشكرك وحسن عبادتك .. ..والاستغفار ابدي خفيف يلاا 100 الفجر والمغرب ولا وزعيهم بطريقه اللي تريحج لا تضغطين على نفسج

اللي حبيت اوصله لج يا الغلا ..ان الدين ما يستقر بنفس المؤمن فجأه وبين يوم وليله ..لا يا حبيبتي ..جاهدي نفسج أشد الجهاد جهاد الهوى .. ولازم تبلشين بالجهاد الاول انج تقومين لصلاة الفجر وتصلينها بوقتها وبتشوفين شلون الله بيكرمج بقيام الليل .. دوم دوم جاهدي نفسج ..

في مره من المرات قريت حديث عن الرسول عليه الصلاة والسلام بما معناه .. ان القلوب متقلبه فإن ادبرت فإلزموها (يعني اذا حسيتي قلبج راح صوب الدنيا الزميه بالطاعات والعبادات واهم شي الصلاه بوقتها) وان اقبلت زيدوها (ان شفتي نفسج حابه الدين غذيها بس لا تجينها لج عشاننفسج لا تمل


وبالنهايه سبحان الله حتى رسولنا الكريم كان يدعي دعاء اللهم يا مقلب القلوب والابصار ثبت قلوبنا على دينك ..يعني شوفي اطهر البشر والشافع للعباد بإذن الله ..يدعو بهالدعاء شلون احنا يا الضعفاء الله السمتعان


نقلت لكم هالموضوع للفائده
لداعية شابه مازالت في اول خطواتها للدعوه
ترجو التشجيع
12
1K

يلزم عليك تسجيل الدخول أولًا لكتابة تعليق.

تسجيل دخول

استغفروه
استغفروه •
جزاك الله خير وبارك الله فيك
*(*بصمه*)*
*(*بصمه*)* •
وياج حبيبتي
حياج الرحمن :)
nouna2006
nouna2006 •
جزاك الله خير
نقل جميل بوركت
*(*بصمه*)*
*(*بصمه*)* •
حياج الرحمن حبيبتي:)