الله قادر على كل شي لاتيأسون من رحمته وراح تحملون إن شاءلله

مرحبا ياأمهات المستقبل بإذن الله ,


بصراحة سمعت قصة عن وحده من العائلة وانا للامانه ماعرف ليش هي شنو قصتها يعني من بعيد شوي لانهم ,
المهم شفناهم امس بعزيمة وماشاءلله تبارك الله عندها عيال 3 فوق بعض جايين , وهي قاعده من هذا الى هذا
وابدا ماتشوفون عليها علامه انها متمللة بالعكس عادي تسولف وتضحك ولاكأنهم طفشوها , اسولف مع امي وخالتي
واحنا راجعين ان ماشاءلله فلانه كيف متحمله وعيالها صغار وعادي عندها , قالت خالتي لان ماتدرين هي كيف جابتهم
قلت لها ليش , انا اذكر طولت بالحمل يمكن 9 سنوات وهي تزوجت صغيره يعني كانت تدرس , قالت خالتي بعد الزواج
البنت ماحملت واهل زوجها واهلها كانوا يقولون صغيرة بعدين للحين تدرس ولما تخرجت من الثانوية , قالوا لهم لازم
تفحصون , بعد كل شي طلع ان زوجها فيه المشكلة (صفر حيوانات منوية) , طبعا البنت كانت عايشه ببيت اهل زوجها بغرفة
ولما كبرت شوي شوي صارت تتمملل وماتتحمل من زوجها شي متضايقه تبي تطلع شقه لحالها , تبي وتبي وتبي وتبي ,
وكان زوجها يتعالج بالعسكري , بأخر مرحلة قالوا له بنرسل اوراقك لألمانيا وهنا القرار الاخير بعد كل شي سويناه ومانفعت ,
طبعا بعدها جاهم التقرير ان هذا الانسان ماينجبببب مستحيييييل للأببببد ماينجب خلاص عقيم , بعدها خلاص مايبي يروح يسوي
تعبت نفسيته وصار عصبي وحالته المادية بعد مو كثير , يوم صارت مشكلة بينه وبين زوجته وطفشت وقالت لا بروح بيت اهلي خلاص
انا تحملت كثير وانت مامنك فايدة ولا تبي حتى تكمل علاج ولا تبي تسوي شي , وراحت بيت اهلها وقعدت فترة يعني البنت ماتعرف متى تجيها
الدورة وكانت قاعده هناك شهر والجميع يحاول فيها ترجع وهي خلاص ماتبي بس تبي ورقتها حتى ام زوجها تموت فيها وجات تبكي ارجعي يابنت الحلال
قالت لا ماارجع , المهم الام تسولف تقول لخواتها ماتبون فوط صحية خلصت اللي عندكم عشان هي تقضي للبيت وتشتري هالشغلات معاها قالوا لها لا مافيه جيبي لنا
البنت هنا قامت تنتبه ان ماجاتها الدورة طول هالفترة لانها ماتحسبها , وقالت لأمها جيبي لي معاك انا ماجاتني من دخلت بيتكم يمكن بتجيني قريب ولا شي ,
الام هنا قالت لها طيب وليش ساكته طول هالمدة صار لك شهر وشوي عندنا وماجاتك ليش هي ماتتأخر عليك صح قالت لها اي يمه مستحيل ماتجيني شهر
بس ماجاتني هالمرة , قالت لها طيب شرايك اجيب لك تحليل وانا راجعه قالت يمه لاتستهبلين , قالت لها امها نجرب ماتدرين يمكن ويمكن البنت مااقتنعت
وراحت الام وجابت معاها وهي راجعة البيت وقالت لها بكره الصباح تسوينه , وعلمتها الطريقة كيف , اليوم الثاني البنت سوت التحليل وعطته امها تشوف
تخيلووا طلع خطيين والام تقول قامت تناقززز مو البنت والبنت تطالع امها ان يمكن غلط او مستحيل , قالت لها امشي المستشفى الحين وودوها المستشفى
ولما حللت قالوا لها مبرروك انتي حامل ..... وقامت الام بشرت ام زوجها وجا زوجها يبكي ويضمهاااااا وكان منهارررر مرره , تخيلوا لما ولدت الاول راحت بيتها
بعد الاربعين وحملت على طوووووول بالثاني وولدت , وبعد الثاني قعدت خمس شهور طلعت حامل وسقطت , وحملت بعد التسقيط بالثالث والحين عندها ولدين
وبنت الاخير وعمرها يمكن 3 شهور ,, طبعا خالتي تعرف قصتهم لانهم اهل زوجها وقريبه من الام ولااحد يعرف بهالسالفة الا المقربين مررره ...


عشان كذا يابنات الامل في الله سبحانه موجود , وربي ماراح ينساكم دامكم رفعتوا ايدكم وطلبتوه , ولاتنسون قصة المرأة العقيم وراح اذكرها لكم
جاءت امرأة الى سيدنا موسى عليه السلام (كليم الله) وقالت له
يا نبي الله ادعو لي ربك ان يرزقني بولد صالح يفرح قلبي
فدعا سيدنا موسى عليه السلام ربه ان يرزق تلك المرأة طفلا
فاجابه الله عز وجل:اني كتبتها عقيم
فقال سيدنا موسى عليه السلام يقول الله عز وجل:اني كتبتها عقيم
فذهبت المرأة وعادت بعد سنة فقالت يانبي الله ادعو ربك ان يرزقني بطفل صالح
مرة اخرى دعا سيدنا موسى عليه السلام ربه ان يرزقها بولد
فقال له عز وجل:اني كتبتها عقيم
فقال لها نبي الله موسى عليه السلام:يقول الله عز وجل اني كتبتها عقيم
وبعد سنة رأى سيدنا موسى عليه السلام تلك المرأة وهية تحمل طفل في ذراعيها
فقال لها:من هذا الطفل قالت:هوة ابني
فكلم سيدنا موسى عليه السلام ربه وقال له
كيف يكون لهذه المرأة طفل وانت كتبتها عقيم
فقال له تعالى:كلما قلت عقيم هية تقول رحيم

فطغت رحمتي على قدرتي ,,


(القصة حقيقية وانا اللي كاتبة هذا الكلام مو منقول او شي , انا مثلكم زوجي صفر ولكن عندي امل في الله سبحانه انه راح يعطيني ,
يعن لاتقولون لا مستحيل ومااراح يصير لاءء راح يصيررررر وراح تكونون كلكم امهاااات وراح تشوفون عيالكم وراح تسمعون كلمة ماما
تعرفون ليش لاني ربي رحيم لان ربي اكرم الاكرمين لان ربي الرازق لان ربي المعطي لان ربي المجيب لمن دعاه ..)

ربي لاتذرني فردا وانت خير الوارثين ..
(ادعوا لي معاكم بالذرية الصالحة)