الله كريم يا بدوي

السلام عليكم ورحمة الله و بركاته

في الحقيقة يا خواتي هذي أول مشاركة لي بموضوع في هذا المنتدى الرائع:23:
واتمنى من الله ان تعجبكم القصه اللي كتبتها باذن الله


طبعا هذي القصه واقعية قالها لي ابوي على لسان جدي



احنا نسمع وايد عن أمثال يقولونها ابوانا واحنا نرددها و ساعات بدون ما نعرف قصتها...السالفه و ما فيها اني كنت قاعده بالصاله مع الأهل و صار موقف اللي خلى ابوي يقول( الله كريم يا بدوي , الله يعطي خبز و لحم )

أنا على طول لفت انتباهي هذا المثل و سألت ابوي : هذا المثل واضح ان له قصة

قال لي ابوي : اي نعم

قلت له وانا متشوقه : شنو اهي القصة ؟؟

قال : هذي القصة قالها لي ابوي عن رجال درويش

قلت له شنو يعني الدرويش؟؟

قال لي الدراويش هو اسم كانوا يطلقونه اهل الجزيره علي الأفغانيين , كانواالأفغانيين يمرون مسافرين على جزيرة العرب متوجهين لمكه طبعا هذي الرحله كلها مشي على اقدامهم لأنهم كانوا بسيطين و فقراء من جذي يسمونهم دراويش و كانوا اتقياء , واللي حصل ان هذا الدرويش كان مسفر رايح مكه , و بالطريق حس بالجوع , فلقى بيت شعر في البر توجه له و سلم على صاحب البيت اللي هو البدوي و طلب منه أكل , فقام هذا البدوي و عطى الدرويش تمر , وأكل الدرويش بس حس انه ما شبع فقال حق البدوي : ماكو شي ثاني آكله.رد البدوي: ماكو هذا الموجود.فقال الدرويش : الله كريم يا بدوي , الله يعطي خبز و لحم .و يوم خلص الدرويش حط راسه و نام , و بعد فتره قصيرة من الزمن , نزل عند البدوي ضيف فلان الفلاني و قام البدوي و ذبح ذبيحة تليق بمقام الضيف و قدمها للضيف.....
المهم
يوم قلط الضيف و المفطحة جدامه والتفت و شاف الدرويش نايم.
قال الضيف: منو هذا ؟؟
قال البدوي : يا طويل العمر ما عليك منه هذا درويش خله نايم.
قال الضيف: الأكل واجد خله يقوم و يقلط معانا. و نادوه علشان ياكل معاهم , قام الدرويش و قلط و قام ياكل خبز و لحم على كيف كيفه , والتفت على البدوي و قال له : انا قلت لك الله كريم يا بدوي , الله يعطي خبز و لحم.
و هذي كل القصة يا بنيتي....

قلت لأبوي: الصراحه هذي القصة اللي يسمعها يفرح , تخلي الواحد يحس ان الله معاه مادام قلبه متعلق فيه
قال ابوي: صحيح كلامج, وانا بعد عندي سالفه ثانيه تأكد هذا الكلام.
قلت: اي يبه قولها.قال: هذي السالفه بعد صارت من زمان, عن درويش كان مار مسافر طبعا ليقصد مكه , و هو بالطرق مر على راعي غنم.
قال راعي الغنم للدرويش : يا درويش لا تروح من هذا الطريق ترى فيه ذيب كبير ياكل الرجاجيل , و هذا الطريق صار له سنين محد يمره.
قال الدرويش: الله كريم و مشى يكمل طريقه ... بس ناداه الراعي مره ثانيه.
الراعي : يا درويش أقول لك ان هذا الطريق فيه ذيب كبيييييييييييييير ,ما تفهم انت ؟؟!!؟
قال الدرويش: و انا قلت الله كريم .قال الراعي: روح .. كيفك ... الحين انا احذرك أقول لك رجاجيل ما قدروا للذيب .. انت مهبول !!!؟
و مشى الدرويش يكمل طريقه و هو مار طلع له ذاك الذيب الضخم يركض و أغبرته شايله وراه مجبل على الدرويش, أما الدرويش قعد على الأرض مثل قعدت التشهد الأخير في الصلاة و قابل الذيب و مسك بيده الثنتين طبر (ساطور) ونزل ايده.
و كان قاعد بكل هدوء و سكون , والراعي يراقب من بعيد و يشوف الذيب يقرب و يقرب و يقرب والعجب ان الدرويش قاعد و ساكن ينطر الذيب و بعدها هجم الذيب و صار الغبار شايل بالجو و الراعي يطالع ما يشوف الا الغبره , و بعد فتره صار هدوء و حاول الراعي يقرب من المكان يبي يعرف شنو صار ,, فشاف الدرويش يصلي صلاة شكر لله و الذيب طايح وراه و الطبر راكز على دماغه .
و يوم خلص من صلاته
قال الراعي للدرويش: انت اشلون قدرت تسوي جذي ؟؟ ! و محد قدر يذبح الذيب قبلك؟؟!!
قال الدرويش: انا قلت لك الله كريم ... و شال اغراضه و راح يكمل طريق .

قلت لأبوي: والله هالسوالف حلوه الواحد ما يمل منها , يبه عندك بعد سالف عفيه قولها لي

قال ابوي: عندي سوالف لو نقعد لين باجر ما تخلص

قلت : قول لي بعد سالفه
و بهذي اللحظه رن تلفون ابوي و شاله : ألو .... يا هلا بو محمد.... شخبارك .... اشلون الوالد... بخير الله يسلمك...
و انا اراقبه انطره يخلص من المكالمه لكن اشر لي بيده قصده انه راح يكمل لي السوالف في وقت ثاني .......... واثناء هذي اللحظه خطر في بالي اني اكتب هذي القصص و انشرها علشان الناس تستفيد و خصوصا انها قصص حقيقيه حدثت في زمن جدي أو يمكن قبله.


واتمني انها اعجبتكم :23: