الله لايجعلكم تحســــــون باللي احســـــــــه ؟؟؟

السلام عليكم ورحمة الله وبركاته
اخواتي الغاليات قبل كل شي وقبل مااقول اللي عندي والله ثم والله اني ادعي للكل انهم لايمرون ولايحسون بالشي هذا اللي احسه لاني مدري ايش هو وايش سببه واتعبني ولاودي يعيشه غيري بس الحمدلله على كل حال

باختصار يابنات اغلى منتدى انا ينتابني صداع ومدري كيف اوصفه هو مهو صداع بالزبط زي الدوخه عدم تركيز كذا احس اني في مووج كان في راسي موج يتحرك يروح ويجي مع كل شهيق وزفير وان وقفت وان قعدت وان اكلت وان شربت والله يابنات انه تقريبا 24 ساعه واول مااصحى منالنوم يرجع لي على طول مايختفي طول اليوم عذبني يابنات احس اني مو مركزه احس ان راسي يتحرك والله اني حتى اقول لامي انتي تشوفين راسي يتحرك وتضحك علي المهم ياحلوين هالحاله تجيني تقريبا كل رمضان ومن يمكن كذا سنه بس انا قبل ماكنت معطيه الموضوع حقه كنت اتوقع انه كذا من التعب او الارهاق ويجيني بنص رمضان مو من بدايته يعني بذيك الايام نكون صرنا بمكه لان كل سنه نسافر فانا توقعت انه من الارهاق او الزحمه والازعاج بس بمجرد ماينتهي رمضان او نرجع من السفر يختفي هالصدااع بالمره ولاعاد احس به ابدا

فعشان كذا كنت اطنش السنه ذي جاني بدري يعني باقي ماسافرنا وين الزحمة والازعاج؟ وصح يمكن انه ارهاق بس والله اني قاعده لاشغله ولامشغله حتى المطبخ ماادلخه

المهم والله لي يمكن 5 او 6 ايام وهو ماسكني هالموووج والله موووووج يابنات كني قد سبحت سبحت الين مادخت والله اني اكتب الحين ويالله يالله اشوف عذاب والله العظيم

وغير كذا يابنات انا رحت للدكتور من يوم او يومين وشرحت له الوضع وقال انتي ضعيفه ونحيفه لازم تاكلين وسوالي تحليل قال يمكن فقر دم وفعلا طلع عندي بس نسبه بسيطه مااتوقع هذا السبب وعطاني حبووب وقال حبه وحده بس وراح يخف الالم نهائيا ووالله اني اخذت حبه وحبيتين على وصفه الصداع صح خف بس الموووووج باقي والله احترت انا فيني

ماني عارفه ارجع للدكتور مره ثانيه واسوي اشعه او اصبر واضغط على نفسي او اروح لشيخ والله تعبت اهلي وهم خايفين علي بس مااحد حاس او مستوعب هالمووج اللي مايختفي 24 ساعه يحسبوني اتوهم

ورحلتنا لمكه قريب والله والله اني خايفه مااقدر اتحمل اخذ العمره وانا بهالموج وعدم التركيز احس اني باطيح باي وقت

بنااااااات حبيبااتي تكفون الله لايحرمكم الجنه ولايجعلكم تحسون بهالشي انا داريه اني طولت عليكم وطفشتكم بس تكفون ردوا علي اللي سبق وسمعت عن شي زي كذا ولو اني مااتوقع او اللي عندها فكره عنه تكفون لاتحرموني من ردوودكم واقل شي اطلبه دعوه لي في ظهر الغيب الله يبلغكم ماتتمنوون والله اني محتاجه لدعواتكم واللي تقرا موضوعي وتفهم منه شي اتمنى ترد الحين لاني والله ضايقه وودي ارتاح شوي قبل ماانام ولكم خااااالص شكري واحترامي وتقديري...


ريمته