المهم اول مايفتح التلفزيون نركض ونسنتر قباله من اول مايجي السلام الملكي وحنا نردد معاه الين يطل علينا المذيع بطلته البهيه ويقدم الافتتاحيه بالقرآن الكريم ,,
وكنا نتسمّر على القرآن الكريم ولا نتحرك حركه لان القارئ محمد الطوخي كان يقرأ هالايه قبل مايبدأ في قراءه القرآن :
{وَ اِذَا قُرِأَ القُرْآنْ فَاسْتَمِعِوا لَهْ وَ اْنصِتوْا لَعَلكُمْ تُرْحَمُون }
ونسمع الكلام وننصت ..
ولما يخلص القرآن يجي بعده تفسير القران .. عاد كان يطوول التفسير وكنا نتعب من الشوق والانتظار لما بعده ..
طبعا التلفزيون القديم كنا نسميه ( الي يطقطق ) نظرا لصوته المزعج اثناء تغيير القنوات وماكان له ريموت كنترول , ويالله كل شوي يارايحين ياراجعين تغيير في هالقنوات ( من كثرهم عاد كلها قناتين )
وكان مصدر بث هالقنوات الارضيه هو جهاز رشيق طويل عريض المنكبين يرتز رافعا هامته في سطوح خلق الله ويقف في وجه الرياح والبرد والامطار ويتحدى حراره شمسنا المشاكسه بكل ثقه , وهو ذو ساق حديده واحده وغالبا يكون لونه <-- فز قلبها
وله مهمه انسانيه ونبيله اخرى وهي انه مدرج للحمام الذين يصطفون على اكتافه ( ماقولكم سيلفر؟ ) يصطفون وكأنهم يتفرجون على احدى مباريات دوري زين الممتع << ايه هين
هذا الجهاز يسمى الارياال او الانتل الي هو .. هالجهاز مرتبط بسلك ينزل من اعلى السطوح الى ان يدخل من نافذه احدى الغرف وهذا السلك يرتبط بجهاز مربع صغير فيه حلقه تدور وكأنها بوصله ( حتى هي صوتها مزعج ).. وهذا الجهاز يخرج منه سلك للتلفزيون ولما نغير اتجاه هالبوصله تبدأ القنوات تصير صافيه شوي شوي ويبدأ التشويش يقل عن القناه الي نبيها <-- ياليل مطولك
احيانا كنا نحط معلاق الملابس في فتحه التلفزيون بدل الانتل حق التلفزيون الي غالبا يكون مكسور هههههههههههههههههههه الله على هذاك الزمان
كانت الاخبار زمان كلها استقبل وودع وتقعد اربع ساعات تشوف جمع غفير من الناس وطوابير تسلم على سموه وطول الوقت وموسيقى موزارت وبيتهوفن شغاله على هالمنظر ,, بس تدرون ؟؟ ليت الاخبار ما عاد نشوف فيها الا استقبل وودع ارحم على قلوبنا بكثييير من مناظر التفجير والقتل الي يحصد المئات شهريا
فيه حركه كان يسويها التلفزيون ياليتها ترجع .. وهي ( نتوقف لاداء الصلاه )
ليت التلفزيون يرجع يسويها
اتذكر يوم كنت صغيره حتى قبل دخولي الابتدائي اكره المصارعه كره الموت
بس اجلس اتابعها مع ابوي لاني احب اجلس معاه واحب اشوفه لما يتحمس ولما يضحك عليهم ولما يعيد بعض كلمات المبدع المعلق ابراهيم الراشد رحمة الله عليه
كانت زمان العايله بكل دفئ تجتمع على تلفزيون واحد .. الاب والام والعيال والجد والجده
