السلام عليكم و رحمة الله و بركاته
بنات حالي مايعلم بها الا ربنا
الله يخليكم ساعدوني بدي شغالات
و أسألكم بالله العلي العظيم واللي يتقبل صيامكم بهالشهر الفضيل لاتردوني
والله حالتي بالويل خاصة مع التوأم ماني ملحقة لهم ولا ني ملحقة للطبخ في المطبخ انهلكت و انا ادور كلهم يبغو 1500 و 1600 وانا بيتي شقة و ابغى 2 مو وحدة لانها ماتكفيني مع شغل رمضان و تنظيفات قبل العيد
شغالاتي خرجو ال2 من كم يوم و انا محتاسة لحالي و انتو عارفين الا الفطور مرة صعب نفطر اكل من برا لانه لازم الشوربة و السمبوسة و الفول و الفتوش و انا كمان لازم كل عيد انظف البيت و اعمل له تعزيلة محترمة انزل النجف و الستاير و الشبابيك كله يتنظف و الشراشف اللي عندي في البيت كلها تتجدد و الكنب كله افك الكوفرات حقته و اغسله و اكويه و ارجعه و اليف الباقي بالليفة و الصابون والجدران كلها تتليف مع الارض و خاصة عاد الروبة اللي بين السيراميك و الرخام في الحمامات هادي بفرشاة الاسنان اقعد افرك فيها بالصابون و الكلوركس لحد ما يرجع لونها ابيض و ارضية البيت أليفها بالليفة والفانيش عشان اذا فيها بقع مو راضية تروحو ما اقدر اعمل كل هادا لحالي الا لازم شغالتين هم يشتغلو وانا بس امسك اولادي فوقت الشغل عالاقل
فياليت لو تشوفو لي شغالات من شغالاتكم اسالوهم او لو احد تعرفوه يجيب شغالات
الله يحفظ لكم اولادكم و يتقبل صيامكم والله ماحد يعرف الحال اللي انا فيه خاصة انه عندي دوالي في رجولي و مرة تعبانة والله انهديت بس من الجري ورا اولادي الله يحميهم و اللملمة من كراكيبهم
انا دحين قلت بدي اجيب وحدة اندنوسية و التانية حبشية عشان لاينسجمو لاني لما جبت ال2 من نفس الجنس وحدة خربت لي القديمة كانت مرة كويسة وصارو بس اكلمهم يردو علي جوابات و لسان طويل و انا مرة ما اتحمل كدا
يعني بقللهم ليش كدا الابواب مابتمسحوها لما بتنظفو البيت يعني كل يوم امسكو لكم غرفة نظفوها من - إلى............. قالو لي انتي بس امسكي بزورتك و احنا ننظف لك كويس تخيلو قلة الحيا و اصلا هم بيشتغلو في الصباح وقت ما اكون انا و بزورتي نايمين ومايصحو الا للساعة وحدة
و دحين شوفوني من الساعة 10 صاحية ارتب و انظف قبل لايصحو اولادي الله يهديهم
اسألكم بالله لا تردوني يابنات و ياليت تلاقولي اليوم قبل بكرة الله يحفظكم لاهاليكم و لازواجكم و يعطيكم ماتتمنو يارب
نونةالمجنونة @nonalmgnon
كبيرة محررات
يلزم عليك تسجيل الدخول أولًا لكتابة تعليق.
خليك أول من تشارك برأيها 💁🏻♀️