الله يجزاكم الجنة تكفون اقرو موضوعي لعل وحدة فيكم تنفعني

بسم الله الرحمن الرحيم
اخواتي انا ماادري موضوعي المفروض بأي قسم
بس ابي منكم تقرونه واللي عندها علم تفيدني
مدري كيف ابدأ؟
انا عمري 30 سنة وعندي طفلين ولله الحمد وانسانة قنوعة جدا اللهم لك الحمد
وضعنا المادي ضعيف نوعا ما لكن راضية
المجتمع اللي دخلت عليه يوم تزوجت غير مجتمعي بكثير
ناس يحبون الفشخرة الكذابة وكل وحدة عندي وعندي وسويت وجاب لي وسافرت ومدري ايش؟
ومافيه ولا بيت منهم ماعندهم خدامةوالا 2
انا الوحيدة اللي ماعندي بس انا اللي ماأبي بصراحة مااحب الخدم
المشكلة اني محطوطة دائما تحت المجهر الكل يتدخل في خصوصياتي
وين رحتي ووش شريتي وش طبختي؟
زوجك وش فطرتيه وبيتك متى يمديك نظفتيه؟
وكيف تطلعين وبزرانك معك كيف تستحملين ازعاجهم<<<مدري اتبرا منهم عشان يستانسون
طبعا صرت بالنسبة لهم معجزة والمرأة الحديدية لأني ماسافرت وصابرة على الفقر وشغل البيت قايمة فيه من غير خدامة ولا أشتكي وغير كذا صار مشاكل كثير مع اهل زوجي بسبب خدامتهم لاني مااطلب منها شي
وهي تبي الكل يحتاجلها وسوت كثير مشاكل بيني وبينهم وصارو مايبوني ولا يحترموني وهي سالفتها سالفة ماعلينا منها
وانا تربيت على كذا امي الله يجزاها الجنة ماعمرها جابت خدامة وهذي حياة اغلب المجتمع اللي تربيت فيه الحريم صبورات
ولا يشتكن ولا عندهم فشخرة ومظاهر كلن عايش ببساطه
اللي بوصله لكم ان الاختلاف بين البيئتين هو سبب مشاكلي
المهم اللي ابيكم تساعدوني فيه
اني احس اني مو طبيعية بالفترة الاخيرة يعني من 7 شهور تقريبا احس بهم وش كبرة بصدري وضيقة وبيتي ودي افجرة من كرهي له
دائما معصبه وان انفليت يوم واحد بالكثير وبعدين انغمت اسبوع
هذا غير اني ماعاد استحمل زوجي واحس تجاهه بنفور وهو ملاحظ
انا ماكنت كذا كنت اموت على تراب رجليه والحين ودي اتركه واروح لاهلي
كذا من غير سبب والله والله مرررررررررررررة ضايق صدري ومن الناحية الزوجية صار فيه نفور مني واضح وصار يسبب لي مشاكل مع زوجي
واعذروني لو تكلمت بهالموضوع بس مدري اقول لمين والا اشاور مين
بديت احس بآلام اثناء الواجب الزوجي لدرجة نزول دم وصرت اتهرب من هالسالفة ولما رحت للدكتورة
وكشفت علي وسوت لي تحاليل وسونار قالت مافيك ولاشي
الغريب اني من فترة صرت احس بحركة برحمي زي حركة الجنين
عرفتو؟ تجي وتروح وهذا اللي خوفني وخلاني اكتب لكم لأني موحامل وهذا الاحساس ماتحسه الا الحامل
فياليت اللي عندها علم باللي قاعد يصير لي تعلمني تكفون واللي تقدر تفيدني بأي احد برا المنتدى يفيدني
ارجوكم لأني حاسة زواجي شارف على الانتهاء والله يستر