الله يجزاكم خير شوروا علي ايش اسوي

السلام عليكم
بنات انا ترددت كثير قبل انزل موضوعي لان القصة تخص وحده عزييييزه والله يشهد احبها زي اختي ولا قصدي اطلع اسرار بيتها بس ضاقت حيلتي مدري شسوي
صديقتي هذي يا بنات كانت عايشه مع زوجها بشكل طبيعي ولها منه اطفال كانوا ساكنين الشرقيه وهو من اهل جده المهم جاورتني سنين طويله وهي اصغر مني بالسن بس متزوجه بدري واستمرت علاقتنا وصداقتنا حتى بعد زواجي تجيني للبيت وازورها فبيتها مع انه زوجي ما كان يحب اروحلها يقول هي والنعم من مدحي لها طبعا بس ما كان يحب زوجها لانه الله يهديه راعي روحات كثير للبحرين وله شله ما كانت عاجبه زوجي
الشهاده لله الرجال كريم وحنون مره وما كان كذا اول ما سكنوا الشرقيه بس التموا عليه اصحاب السوء وتغير للأسوأ بس كان رغم تقصيره بدينه وخرابيطه الثانيه مهتم ببيته ولا يخلي شي ينقص على عياله
قبل ثمان سنوات تقريبا كلمت صديقتي اهلي جيرانهم في الليل وكانت تبكي زوجها لقيته طايح بالصاله مغمى عليه وكان سهران عند اصحابه راحلهم اخوي الفجر ونقلوا زوجها المستشفى كان بغيبوبه بعدين صحي منها بس الرجال حاله تغير 180 درجه صار مقعد انفصل من عمله ترك بيته هنا ورجع لجده صار يكره زوجته وعياله حتى بنته اللي كان روحه فيها يطردهم من البيت بانصاص الليالي ويقذفها بشرفها وما ينادي اولاده الا بالفاظ اعوذ بالله اخجل اقولها
تخيلوا مع هذا كله ما تخلت عنه باقيه عالعشره وتدعيله الله يشفيه طلقها وراحت بيت اهلها بس ظروفهم صعبه مره بعدين رجعوها اهله مع انه ما يطيقونها ويقولون انها هي اللي ساحره ولدنا بس ما قدروا يتحملونه لانه عاجز تقريبا يبي احد يساعده في الحمام الله يعزكم ولبسه يعني خادم 24 ساعه رجعت له لان الشيخ قال ما دام مريض ما يقع الطلاق وبعد ما رجعتله تقول اهله بطلوا حتى يزورونه بالبيت محتاج احد يوديه للمستشفى جلسات علاج طبيعي ما يودونه وهي اهلها قالولها اذا رجعتيله خلاص لا عاد تتشكين منه وهي ساكته وصابره بس جننها خلاص تقول يدعي علي بالموت واني انعدم عافيتي ما يخليها تنام طول الوقت يصرخ عليها تعالي جيبي مويه وديني الحمام وهو نومه متقطع وقلييييل
الكل تخلى عنها حتى اهلها ما تحب تروحلهم تقول زوجات خواني يحاسبوني حتى على اللقمه تروحلهم مره بالاسبوع ساعه ويروح زوجها مها لانه مستحيل تطلع مكان بدونه
معليش سامحوني طولت بس ادري تتضايقون من تقطيع المواضيع واللي فات مقدمه للي جاي بس علشان تكونون في الصوره وطبعا اختصرت كثير من العذاب اللي شافته من اهل زوجها وزوجها علشان ما اعور قلوبكم
قبل 5 سنوات تقريبا لانه ضاقت الدنيا فيها خلاص لجأت صديقتي لدكتور نفسي هو الوحيد اللي رضي يستقبلها بخصوص موضوع زوجها لانه الزوج مو راضي يروح وهي ما قدرت تجبره واهله شايلين نفسهم من الموضوع المهم شرحت للدكتور الوضع وقالها زوجك عنده اكتئاب شديد وكتبلها على نقط قالها الدواء خطير ولازم تكونين دقيقه بالكميه واحد مل فقط واذا 3 ايام ما فيه تحسن زودي مل ونص جربت معاه وما نفع قالها الدكتور زيدي 2 مل وبعد كذا الزوج صار هااااااااااادي وبس نااااااااايم وتقول ارتحنا ولله الحمد وقالها الدكتور هذا علاج وبعد فتره بتلاحظين تحسن
اللحين لها 5 سنوات وما فيه تحسن ابد ابد وكل مره تشتكي للدكتور يقولها زيدي مل او نص مل الان صارت تعطيه 4 مل والدكتور له فتره طويله ما يرد عليها وكل مره تكلم يقولها انه مسافر شكله يتهرب لانه عياده خاصه وطبعا هي اتصالاتها بالمجان
المشكله يا بنات هي مخبيه على كل الناس حتى اولادها ما يعرف بقصة الدواء غيري انا وهيه واختها بجده وصارت تكلمني ايش اسوي ولاني حاسه بعذابها الله يسامحني حليت محل الدكتور وصرت اقولها زودي نقصي بالجرعه واشجعها ما تخاف وتعطيه المشكله الدكتور قايلها لا تغيرين بالجرعه الا بعد ما تراجعيني بس هو صارله شهووور ما يرد وهو يا بنات من غير الدواء يصير مجنووووووووون وهي خلاص ما عادت تستحمل وكانت تقول افكر اطلع سطح العماره وارمي نفسي وارتاااااح لا احد يسأل عن اهلها او اهله اهلها كارهينه لانه لسانه متبري منه ومره كانوا عندها وطلبلهم الشرطه هو مريض مو بوعيه واهله استغفر الله ما كأنه ولدهم مره مو سائلين حتى عن الاولاد وطلباتهم
اللي مر عليها احد نفس الحاله وتعالج منها او تحسنت حالته لا تبخل على اختها المكروبه الله يعافيكم ولا يوريكم مكروه في انفسكم او احبابكم