الله يجزيكم خير شوروا علي..

مو عارفة كيف اشرح مشكلتي بس بحاول اوضحها قدر الامكان..

يا بنات ان عايشة بغرفتين في بيت اهل زوجي والحين زوجي قرر يحط تحويشته كلها بالاضافة انه
يقترض مبلغ من البنك ويشتري لنا ارض عشان نبنيها اذا الله سهل ويسر الامور..
طبعا لحد هذا كل شي عاجبني وفرحانة فيه الا في نقطة قلبي ناغزني منها..

زوجي يقول انه بيسجل الارض باسم امه لان احنا مقدمين على طلب بيت اسكان من اول زواجنا وعشان نحصل عليه لازم ما يكون عندنا عقار باسم واحد فينا..

طيب بتقولوا لي وين المشكلة..المشكلة ان الانسان مو ضامن عمره ومو ضامن الظروف ..يعني اخوان زوجي في منهم الطماع والاناني وفي منهم اللي يعرف الله.. وانا اقترحت عليه انه يكتب في وثيقة الملكية ان ملكية الارض ترجع له اذا بعد عمر طويل امه صار لها اي شيء..
لكن هو ما عجبه كلامي وقال لي ان كل اخوانه يعرفون ان الارض له وما في داعي لهدا الشيء..

انا خايفة يا بنات ومن حقي اخاف لان الله يعلم اني بعيش في ضيق مادي عشان الاقساط في السنوات الجاية
وانا مستعدة اصبر واعاون زوجي في حال حصلت على وظيفة ان شاء الله.. خايفة تعبتنا تروح بلمح البصر بسبب تصرف زوجي..

وفي الاخير اتمنى منكم دعوة حلوة صادقة ان الله يرزقني الوظيفة الكريمة اللي انتظرتها من زمان..