والله يابنات اني ماكنت اقول له شي عن امه عشان كذا ماصدقني لما صارت اول مشكله..يعني كنت اسمع واشوف واسكت ماتكلم بعدها تكلمت وايد ومافي فايدة..زوجي يعتقد انه لو كلم امه ماراح يكون بار بامه..مع اني ماامنعه عنها ولاعمري قلت له تهاوش معاها انا اقول له كلمها عشان تخليني في حالي بس هذا اللي ابيه..علاقتها بامي( كانت صديقتها للاسف) والمشكلة ان كل ماتهاوشت معاي(بدون سبب) تشتم امي مع ان امي مالها خص في الموضوع!!
امي في البداية تغاضت لكن مشاكل هالعجوز ماتنتهي عشان كذا امي طنشتها وماتكلمها مع انها يوم تكلم امي تسوي نفسها مسكينة..وامي عارفة حركاتها..والله ان المشاكل اللي تفتعلها مالها سبب والمصيبة الاعظم انها تشتمني جدام زوجي وابوه ومحد فيهم يقول لها كلمة..وهذا اللي يذبحني لان محد له شخصية في هالبيت غيرها..هي الآمر والناهي

اختي ام علاوي هي ليش تشتمج يعني شو الاسباب في الغالب .....بقولج شتسوين وياها

والله انها تشتم بدون سبب..اول مرة صارت مشكله كبيرة..كانت بسبب شغالتي الاندونيسية لانها ماكانت تفهم عربي ولا اجليزي وكان زوجي يقول لي دايما خلي امي تتفاهم معاها لاتشغلين نفسك بها وانا مشيت على هالحال..ومرة كنت شايفة انها ماتغسل ثيابي وتراكمت في سله الغسيل فترة طويلة ولما سالتها ماكانت فاهمه وقالت لي مدام..(يعني تقصد امه)حاولت افهمها بالاشارة ومافهمت فقلت لزوجي قال بخلي امي تكلمها..عادي ماصار شي صح؟؟؟
انا وزوجي كنا نتغدى ولا هذي اللي فتحت الباب وتمت تصرخ وتزاعج شو السالفة ماادري؟؟؟!!!!
والمشكله اني ماتكلمت وهي مابررت هي ليش تشتم احنا قلنا يمكن هاي السبب بس هي ماذكرته بس اشتغلت في الردح والصراخ والشتم بالفاظ عمري ماسمعتها!!! شرايك؟؟؟
((ام زوجي مب خليجية وهذي اهم سبب لتبرير الردح اليومي اللي هم متعودين عليه في بلادهم))

اختي انتي ساكنه وياها في نفس البيت ولا بيت بروحج ....اذا في نفس البيت حاولي تبتسمين له....ولاتتدخلين في شي خليها اتحس ان هي الملكه ا وعطيها كتب دينيه وحاولي اتفهمينها بطريقه غير مباشره ان الي تسويه غلط ومش من صفات الاسلام اذا هي تثقفت من الناحيه الدينيه اعتقد بتنحل مشاكلج وياها
بس ايش موقف زوجك ويا امه يعني يتم ساكت ولا يحاول يهديها ويفهمها

صاحبة الموضوع انا نصيحتي تشرين لها هدايا كل فتره وتعودين نفسك على الكلام الطيب واللي يغير النفوس هو الكلمه الطيبه يعني مثلا كنتوا في مكان مع بعض عزيمه او زواج عامليها كأنها امك يعني تمشين جنبها لا تسبقينها ابد واسأليها اذا تاخذين عبايتها و راعيها بكل ماللكلمه من معنى ترا الكبار غصب عنهم يبون من يقدرهم وصدقيني الطرف الاخر مو من فراغ ياخذ موقف .. اتوقع انتي سويتي حركه انتي ما يخطر ببالك انها ممكن تزعل وهي شالت عليك.. خليك احسن من بناتها لها اذا هي تعاني من مرض او تعب اسأليها اذا هي مرتاحه؟ تبي شي؟ اعرضي عليها خدماتك اجيب لك شاهي؟ وحاولي قدر ما تقدرين تمدحينها انك انتي بركة هالبيت .. الله لا يخلينا منك.. الله يعينك ويشفيك لو كانت بتقوم وتقعد بصعوبه.. اهم شي الكلمه الطيبه..
وبعد كذا اذا ماتغيرت لا تقولين لامك وتصير الاخوات يكرهون بعض بسبب عيالهم انتبهي ترا انتو بتنسون اما هم لا..
اسأليها انتي بطريقه لطيفه أمانه تعلميني اذا انا مقصره معك باي شي؟ احلفك تعلميني وش اللي بخاطرك علي؟
ولو قالت اللي براسها وانتي شايفه ان ما عندها سالفه لا تبينين.. قولي لها ابشري ما يصير خاطرك الا طيب ..
والله يوفقك..