انا لواني مكانك اتصل واحطه عند الامر الواقع واسأله انت وش فيك وش صاير زعلان مني قلي واذا معك حق اراضيك واذا انت فاهم غلط اوضح لك بالتفصيل واذا انت ماتبيني مااحد جابرك ...اما انك تسكتين وتاكلين بنفسك لا والف لا

والله مااتحمل الهموم والغموم وعمي سي السيد مبسوط ولا على باله وقفيه عند حده وفهميه اذا انت شاري فانا شاريه واذا انت بايع فكلا له الله والعوض على رب العباد ولا تيأسين ولا تخافين واللي كاتبه رب العالمين راح تاخذينه والله يسخرلك ويوفقك ويرده لك غصب عنه

تسلمين حبيبتي المعشوقة الله يسمع منك كلامج وايد ريحني ورفع من معنوياتي وبشاورج في شي اشرايج اصبر لين باجر واشوف إذا مااتصل بااتصل وبشوف شو أخرها معاه ....الكثير من الخوات قالولي اطنش مثل ما هو مطنش وإذا اتصل أكلمة عادي ولكنه شي صاير ....أنت شو رايج

تابعت موضوعج السابق

قلتي في إنج رحتي العرس في بلد زوجج .. وإنه طلب تسكنين عنده

بس إنتي فضلتي بيت أهلج هناك لأنه أريح لج ولأنكم مشغولين في العرس

هذا هو الشيئ اللي زعل زوجج

رفضج إنج تسكنين في بينه ذيج الأيام

حس إنج مب مهتمه لوجوده وإنج مب مشتاقه له وبعده عنج عادي

ما كان هذا قصدج بس هو حس كذا

وخذ على خاطره وما كلمج ولا زارج

الحين إنتي وهو كل واحد منكم زعلان وكل واحد ماخذ على خاطره

إنتي تقولين هو ما اتصل وما سأل عني وعن بنته

وهو يقول هي مب مهتمه ولا اتصلت ولا اسألت

التطنيش بيصعب الأمور بينكم وبيتم كل واحد منكم ماخذ على خاطره

شوفي عيوني .. سوء الفهم بينكم مشترك من الطرفين

لا تقولين بطنش وما بكلمه ليش هو ما يكلمني

هذا زوجج وتبين تحافظين عليه وعلى اللي بينكم

ما فيها شيئ تتصلين وتسألين عنه

وتبينين له إن بالج انشغل عليه

إذا بتعاتبينه عاتبيه بلين .. لأنه شايل عليج من سالفة إنج ما سكنتي في بيته وفي رايه أكيد هذا سبب قوي إنه ياخذ على خاطره منج

نصيحه .. لا تعودين زوجج إنج تكونين برا الصوره .. يعني تمين بالأيام بعيده

ترى البعيد عن العين وفي سالفتج عن الأذن بعيد عن القلب

لازم تكونين دايماً في الصوره عن طريق مسج .. مكالمه ولما يجيج تكونين متفرغه له عشان يتعود عليج وما يصير يستغني عنج

ونصيحه لوجه الله .. مكانج مع زوجج .. ثلاث أيام في الشهر شو بيسوون وبكره بنتج بتكبر تبا أبوها معاها

إذا في بالج تتشتغلين فتره وتروحين عنده عقبها يكون حل طيب .. وإلا راجعي أولوياتج

هذا زوجج ومكانج معاه .. مب بس عشانج ولكن بنتج لها حق إنها تعيش بين أمها وأبوها .. وعشان ترتاحين صلي استخاري في انتقالج للعيش معاه في بلده وأكيد الله بييسر لج اللي في الخير

أكثري من الاسغفار .. تصدقي بنية الله يسخر لج زوجج ويجعل حبج في قلبه ويحنن قلبه عليج وعلى بنتج

وصدقيني دايماً إدعي الله إنه يسخره لج ويهديه ويحنن قلبه عليج

إذا شيئ ضايقج منه .. أحسن شيئ تسوينه إنج تفرشين سجادتك وتصلين ركعتين وتدعين الله

وبتشوفين الفرق

تبين شوري

قومي أحين توضي وصلي ركعتين وإدعي الله بإلحاح ويقين إنه يحبب زوجج فيج ويحنن قلبه عليج ويجعلج قرة عين له .. إدعي بقلب قد ما تقدرين

وإدعي سبع مرات .. اللهم يا ولي نعمتي وملاذي عند نقمتي اجعل نقمة (فلان - زوجج) برداً وسلاماً علي كما جعلت النار برداً وسلاماً على سيدنا إبراهيم

إدعي هالدعاء وإنتِ حاطه زوجج في بالج وكلج يقين إن الله بيصفي قلبه من صوبج وبيكفيج شر زعله وعصبيته

جربت هذا الدعاء كل مره حسيت إن أحد بيعصب علي أو شايل علي ولما تمر فيّ مشاكل والحمدلله تعدي الأمور على خير وكل من أعرفهم ويقولونه أمورهم تعدي على خير

وبكره اتصلي على زوجج وكلميه بنفسيه حلوه وإن شاء الله ما بتلقين إلا اللي يسرج ويسعدج

الله يوفقج

أختي نور القرآن اشكر ردج وكلامج الأكثر من الرائع والنابع من قلب صافي محب لأخواته في الدين .
عزيزتي ..مو الريال هو صاحب القوامة وهو المسؤول (كلكم راع وكلكم مسؤول عن رعيته )المفروض والواجب هو اللي يسأل مو أنا . .أبو بنتي ما تنازل يسأل عن بنته إذا زعلان مني علشان ما يت بيته صدقيني ما حسيت منه هذاك الأصرار على أن يبيني أجي عنده البيت ...صدقيني لوزعلان كان ماتصل فيني في الدرب يطمن وصلنا بلدهم وللأ ريلي اللي تبيني أطمن عليه حتى ما تنازل يسأل عني وصلت بالسلامة لبلادي وللأ ....ولو أكون أنا الغلطانه فالرسول صلى الله عليه وسلم يقول (أوصيكم بالأضعفين يقيل ومن هم الأضعفين يالرسول الله ؟قال:المرأة والخادم .أختي الحبيبة أين واجب العدل بين الزوجتين في المأكل والملبس والسكن ....أنا اللي اصرف على نفسي وعلى بنتي ويوم طالبته بمصروف بنته عصب وبيني وبينج أنا حاسه أن هذا هو السبب الحقيقي ....

إختي إقري الوضوع في هذا الرابط

http://forum.hawaaworld.com/showthread.php?t=447032

للأخت عصير الخوخ جزاها الله خير ورزقها كل خير واسعد قلبها وإن شاء الله بتلقين في نقاط مفيده

إلجئي إلى الله فهو سبحانه من بيده أن يغير من حال إلى حال بكن فيكون

وأن شاء الله لي عوده بكره إن الله أحيانا

دمتي بخير *^__^*