الله يرزقها من حيث لاتحتسب اللي ترد علي

السلام عليكم جميعا


انا عندي مشكله وياليت القالها حل عندكم



انا متزوجه لي سنتين ونص وعندي بنت



زوجي ولله الحمد كل شيء فيه زين كريم حنون طيب


بس ذبحني بهالسفريات


سافر اول سنه بزواجنا لدبي مع اصحابه




وزعلت عليه شوي بعدين رضيت وكنت وقتها حامل






والان جايني يبي يسافر

طبعا هو قالها لي بهالاسلوب


انا طفشان ودي اسافر الامارات قلت امسك ارضك وين تروح


قال ابي اغير جو قلت نروح سوا اما لحالك لا انت مو عزوبي بتسافر لحالك قال بروح مع اصحابي


قلت وليش ماتروح معي انا من يوم تزوجتك ماسفرتني


طبعا هو ناوي نسافر للنمسا بالصيف طبعا مو كرم منه لان هاذي تعتبر طلاعتي من الاربعين


وجالسين نجمع علشان نروح


المهم غلط علي بالكلام انتي المفروض تنطقين بالبيت ماتروحين لاي مكان وانتي ماتحكميني قلت انا زوجتك


قال امي وابوي اغلى منك مالهم حكم علي مو انتي



وتشادينا بالكلام واللي رفع ضغطه قلتله لاتخرب اللي بيننا


وانا مو قصدي بطلع من بيته او بتطلق قصدي بتغير عليه ماراح يكون له بقلبي شيء ولاراح اكلمه العمر كله


قال والله شنبي مو على رجال انك لو هجيتي عني لااجيب بهالبيت حرمه قلت عساك عالقوه

وانا مو قصدي بهج قال وش معنى كلامك لو اني حرمه وقلت هالكلام وش تفسيرينه


قلت فسره مثل ماتبي

ولاتخليني احقد عليك


قال انتي تهدديني انا ماكان براسي روحه بس عناد بسافر وقريب رجعت قلتله اقصر الشر وفكنا من المشاكل


وهو اصلا كذا واحد من اصحابه دايم يقول خلنا نسافر

وامس واحد اتصل عليه وقال انا بروح بعد اسبوعين تخاويني زوجي رد عليه قال لالا ماعندي نيه الا بعد شهرين او 3 طبعا زوجي حرم يروح مع هذا الرجال كارهه


وانا ماابي اقوله انا سمعت مكالمتك علشان مايقول تتجسسين علي


وعلى فكره هو لاسافر دخل مراقص وشرب وهذا الكلام هو قاله لي


واللحين يقول ليش خايفه اني اشرب قلت كيفك هذا الشيء عند ربك بس انا مااقبل بالخيانه

قال ومين قالك اني بزني مايدري حتى بالنظر يزني


المهم راح يصلي ويوم رجع كلمته عادي وقلت توديني السوق قال طيب ورحنا السوق وساكت انا اسحب منه الكلام


وطفشت وطلعت وانا ماشريت شيء

ورجعنا البيت وهو ساكت ولا عطيته وجه

انا اكلمه اللحين مو حب بس لان لو يسافر ماراح انساها له وبتغير عليه 360 درجه


ونسيت اقولكم ترى يوم سافر المره الاولى خايف يقول لاتعلمين احد وخلي جوالي معك واذا دق احد من اهلي قولي راح للشرقيه انتداب


ونسى جواله


يعني يهمه ان محد يدري عنه


اللحين قولولي وش اسوي لاسافر ؟

ووش اسوي اللحين معه؟


تعبت مااحب اجلس مع احد وانا كارهته او متهاوشه معه
واهلي مااقدر اروح لهم استحاله الوضع عندهم مايساعد



واصلا اهلي لاشافوك محتاجتهم باعوا واشتروا فيك


الله يسخره ويبعده عن السفر مع اصحابه



قولولي كيف تتعاملون مع ازواجكم