الله يسعد كل من ردت علي. يا أخواتي لا تتجاهلوا موضوعي فانا في حاجة لكم

بنات أرجوكم انا ما احتجت احد مثل الان.
أرجوكم اللي عندها نصيحة او رأي صادق لا تبخل فيه علي لانه يعلم الله ان لا احد عندي يهتم يسمع او يناقش.
سبحان الله عمري ماقصرت مع إخواني وامي دايما سباقة للخير وأقسم بالله اني ما ا رتاح لو بيدي شيء وما اسويه لهم لكن لما انا الله يقدر علي واحتاج اذن تسمع او قلب حنون يفهم والله محد يعطيني من وقته.
يا بنات انا عندي مشكلة مركبة:
امي. هي في بداية الخمسين وانا معها عسل بشكل يعني رغم طفولتي السيئة وما أتذكره منها من ضرب قاسي لأتفه للأسباب الا اني أحبها وارعاها مع أنها في صحتها وشبابها ما شاء الله مو واضح عليها. المهم صدقوني اكتشفت شيء غريب. انا متزوجة وحياتي مثل غيري فيها مشاكل واحيانا والله تصل لمرحلة خلاص لكن الحمدلله ع كل حال. وامي أيضاً عندها مشاكل كبيييرة مع أبوي اكن والله الحقيقة أنها هي معتدية. يعني تهاوشه بكل وقاحة قدامنا وتسبه وأهله واحيانا احسها تهينه بكل قوتها حتى لو تضربه أحسن! وهو رجل صبور معها ولو رد بنص كلمة قومت الدنيا وفزعتنا وكرهتنا بابونا وتحارب اي واحد منا يتقرب له وتخليه عدوها.
اذا حست ان عندي مشاكل احيانا احسها تنبسط وتقول ايه حظك مثل أمك. انا يابنات خايفة خايفة موت أصير مثلها لانها مو قدوة. لكن شايفة لساني وصخ وقاسية ع بناتي ويمكن ماوصل الحال إهانات للزوج مثلها لكن ماني راضية أبدا على حالي واروح بالليل ابكي عند بناتي وهن نايمات احس اني ظلمتهن بعقدي مع امي وتاريخي الأغبر معها.
ياه احس بضعف احيانا كيف اخرج منه؟ اعرف أنها أثرت على حياتي وخربت علي ولاني عارفة كيف أتخلص من تأثيرها السلبي. تخيلوا تحب تعرف كل تفاصيل حياتي مع ان مافي شيء يستحق الحكي دايما لكن تسال بناتي من جابكم وابوكم وين ومن ودا امكم السوق وحاطة زوجي بين عيونها. وإذا جاء لبيت أهلي تمدح نفسها قدامه بشكل وتسب بنات هذا الجيل وقدامي وبس تقول بنات اليوم ماهن سنعات ومادري ايش تكره رجالي فيني وانا ساكتة افكر معقولة هذي امي ولا حماتي!
وبعدين تتكلم في جمال الحريم عنده عادي وضحكها عالي وإذا جاء سيرة عن طبخي وإنجاز معين اعمله تسكت ولا تمدح مثل ما تمدح نفسها بل تكتف ايدينها وتطالع فيني بعين مادري ليش.
لما اسألها عن طبخة معينة تضحك ولاتعطيني شيء وتقوم وكأنها تبخل اني اتميز بشيء بينما لو سألتها مرة اخوي تشرح لها بالتفاصيل وشوي ترسم لها بعد!
تنتقدني دايما وإذا مالقت شيء اخترعت.
شكاكة ونواحة وتكره عيالي وتحب عيال اخوي. وتبي فلوس مني دايما لكن ماتطلب اخوي. وبس تسب زوجي وأهله وتكرهني فيه مع انه أدا جاء شاف وجه ثاني.
انا تعبت وكرهتها لاحول ولاقوة الا بالله. ليش كذا تسوي فيني؟ مع أنها تقول احيانا اذا رضت انتي بنتي وأحبك لكن ليش ما اشوف الا مشاعر غيرة منها وتحطيم. والله اني أيكي احيانا وش اعمل
حتى أختي عندها لسا ماجاها نصيبها لكن تدعي عليها وشوهت سمعتها عند الناس لدرجة محد يفكر يخطبها مع أنها جميلة وراعية بيت ومتعلمة وموظفة لكن حرام عليها اللي تسويه لدرجة تخيلوا تضرب أختي بكاس زجاج وانكسر ع رجلها وتدعي عليها قدام الناس وليش وش السبب أنها ما تساعد في البيت مع ان دوام أختي حتى 5 العصر والبيت فيه شغالة! وانتم أحكموا!
ليش امي كذا؟ ليش تنبسط اذا غلطت وإذا شمت ريحة انبساط عندي كشت مني ليش كذا؟