الله يعينني بشوفها بعد بكرة في مناسبة !! كيف اتعامل معاها ؟؟

السلام عليكم :
يابنات هذي الآدمية كرهتني في حياتي تدرون من هي ؟؟؟ ام زوجي حسبي الله عليها ونعم الوكيل ، والله إذا رحت ازورها انه يضيق صدري من يوم نقرب من بيتهم واحس بكتمة بسبب معاملتها لي ، تعاملني كأني طبينتها مو مرة ولدها مع اني ويشهد الله على اني طيبة فيها وماعمرها سمعت الكلمة الشينة مني ، واقدرها واحترمها وأهديها واعطيها فلوس لكن هذا كله مافاد فيها تدرون ليش ؟؟ لأن امي سلفتها ومن زمان تكرهها ، طيب أنا إيش ذنبي ؟؟
ابحكي لكم بعض من مواقفها المشرفة معي ومع اهلي ، إذا رحت ازورها تستقبلني اخس استقبال وعمري ماسمعت كلمة الله يحييك منها وتقعد تدقني بالكلام عشان تنكد عليه ، ومرة رحت ازورها وجايبة القهوة والحلا والفطاير ، تدرون ايش سوت ؟؟ قعدت في غرفتها وماجلس معي إلا بنتها ...
ومرة رحت لها أنا وأمي عشان كان عندها مناسبة وجايبين الهدايا والقهوة والصواني .. عارفين ايش سوت ؟؟ جلست تتريق عليه أنا وأمي قدام الحريم !!!
ومرة عزموها أهلي في بيتهم عشان كان عندهم مناسبة وجات .. عارفين ايش سوت ؟ قعدت تتكلم عليهم وتقول انتم كذابين وما ادري إيش لدرجة خلت اختي تبكي من كلامها وبعدين استلمت امي، والله انها نكدت علينا ذيك الليلة لدرجة ماتعشينا بسببها .
المهم أنا بعد موقفها الأخير في بيت أهلي قررت ماعاد اروح لها وفعلا صرت ارسل بناتي بين فترة والثانية وأنا مااروح والحين لي يمكن ثلاثة شهور مادخلت بيتهم ...
المشكلة إنه فيه ناس عازمينا بعد بكرة وأكيد راح تجي وأنا ما ني عارفة كيف اتصرف إذا شفتها ؟؟ وأحيان افكر ارسل بناتي ومااروح انا .. لكن خايفة أهل المناسبة يزعلون مني إذا ماجيت ..
أعطوني نصايحكم يابنات وادعوا معي إن الله يفكني من شرها ويرد كيدها في نحرها وجزاكم الله كل خير ..