الله يعين الحرف لحظة هطوله= انا اشهد انه يكشف عقول وعقول

احيانا نندم من كلام نقوله==واحيانا نندم ليه نسكت عن القول
الله يعين الحرف لحظة هطوله==انا اشهد انه يكشف عقول وعقول
السلام عليكم ورحمة الله وبركاته.
ابي اسالك كم سؤال قبل اكتب موضوعي..
واذا قريتي موضوعي الى الاخير بتفهمين ليه سألتك هذا الاسئله بالبدايه..
هل ندمتي في يوم من الايام انك نزلت مثل هذا الكلام في احد مواضيعك؟
هل تتضايقين من وجود هذا الموضوع في جدول مواضيعك؟
هل استفدتي شيء وطلعتي بنتيجه واتخذتي قرار صائب؟مع وجود الاجوبه المتذبذبه بين معارض ومؤيد.
يوم تنقهرين من اي تصرف جاك من اي انسان كان من كان مثل زوجك واقصد بالذات المشاكل الزوجيه لانها حساسه جدا.
وتجين هنا وتكتبين وتشكين حالتك والردود 10 والمشاهدات 1000<<مثال تقريبي.
و الردود الله المستعان وحده تتقي الله في الرد وتكتب مايملي عليها ضميرها وترتاح في كتابته .
ووحده تكتب بكل حماس وتزيد النار حطب لاحول ولاقوة الابالله.
وكل وحده تاخذ مشكلتك وتقيسها على نفسها وتعطيك هي لو حصل لها وش بتسوي مثلا
ناااااااااااااسين ان الاختلافات بكل شيء موجوده
مثلا زوجك يختلف عن زوجها <<مسكين ذا الزوج كل شيء عليه حتى لما نضرب مثل ههههههههههههههه..
ظروفك الماديه ظروف اهلك وضعك العائلي
وعااااد اذا دخلت موضوعك وحده مقهوووره من شيء وتقوم تبرد قلبها في الرد على موضوعك افعلي ولاتسكتي والى اخره واكيد بعد ماتكتب وتطَلع مافي قلبها تحس براحه.
اقولكم شيء واعتبروها نصيحه او تجربه او حل
اذا انقهرتي من اي شيء..
امسكي قلم وورقه واكتبي واكتبي واكتبي كل شيء كنك تكتبين هنا وبالعكس الورقه خاصه وافضل اكتبي كل شيء وباريحيه يمكن هنا تتحفظين بعض الشيء ولاتكتبين كل شيء المهم.
كتبتي كل شيء بتحسين انك ارتحتي كثييير لانك طلعتي اللي في قلبك
اقريها كم مره 3 و10 اقريها الين تشبعين وبعدين بتجيك النتيج ومنها:ـ
بترتاحين راحه مامثلها ..
بتصححين اغلاطك بنفسك وماتكررينها.
يمكن تكتشفين انك مكبره الموضوع او ان الموضوع مايستاهل
تكتشفين الا جابيات والسلبيات وتستفيدين منها
واحب اقولكم شغله فينا يالحريم الحرمه لما تشكي تبي اللي يطبطب عليها ويواسيها اكثر من اعطاء ها الحل
بعكس الرجل فهو لما يشكي يي الحل مايبي مواساة
مثلا ولاحظوه في تعامللاتكم مع ازواجكم
انتي لما تشكين من شغل البيت او الاطفال ..كل اللي تبينه انه يرحمك يواسيك بكلمه والود ودك يطمر ويضمك وينسيك التعب
في المقابل وش يصير وهو جالس بمحله يقول اشتغلي على مهلك ولاتكلفين على نفسك يعطيك حلووول..وانتي تعصبين وتنقهرين اكثر من تصرفه وتحسبينه مو حاس فيك ولامهتم
وكذلك هو لما يشكي ((((وترا الرجال مايشكي الا قليل واذا بغى يشكي يشكي لعقل واعي مو اي احد الله يرحم حالنانحن النسوان)))وتواسينه ياحبيبي ومدري اايش من الكلام يمكن اقل شيء يقول يرحم والديك روحي واتركيني في حالي..ليه لانه يبي حل مايبي طبطبه ..
والله الموضوع في هذا الشيء يطووول..
لكن الله يستر لايجي يوم وانزل موضوع اكتب فيه مشكلتي <<ياخوفي اسويها والله انطرد من بنات حواء :pههههههههه
تذكري اختي في الله ان الشكوى لغير الله مذله وتذكري قوله تعالى على لسان يعقوب عليه السلام (انما اشكوا بثي وحزني الى الله )
ومثل ما انك ماتبغين تشمتين الاقارب فيك ولاتبغين تشكين مشكلتك لـ اختك او امك لاتكتبينها هنا لان هنا مصيبه تدرين ليه؟؟..
لانك افشيتي اسرار بيتك لانك افشيتي اسرار بينك وبين زوجك واغتبتي وكسبتي اثم وبعدين المصيبه الاكبر انك تبحثين عن حل لمشكله تكون هينه عند لو زوجك عرف بمعرفك وبحث وقراء المواضيع الحلوه وش بيسوي فيك وش بتسوين اذا واجهك مع ان الرجال بسم الله علينا كتومين مايواجهون ويعاقبون بسكات ومرات اذا طفح به الكيل تكلم مو مثلنا يالحريم مانصبر نواجهه بكل شيء على طووول كن عندنا علم ياكافي ..
في النهايه انتي جربي طريقتي اكتبي بورقه واقريها ومن ثم قطعيها نتفه نتفه وارميها وانتهينا وعليك ستر الله
ليه هنا نكشف الاسرار ونطلع الفضايح ومثل مايقال ننشر الغسيل ...
وتذكري قبل كل شيء قوله جل شانه(مايلفظ من قول الا لديه رقيب عتيد)
وكلا عنده مايكفيه وماخلت ابدا ولكن الحمدالله على كل حال
قال تعالى(ولئن شكرتم لازيدنكم)
قال تعالى(قل لن يصيبنا الا ماكتب الله لنا)
اوصيك بهذا الدعاء:اللهم ارزقني ايمانا يباشر قلبي ويقينا صادقا حتى اعلم انه لن يصيبني الا ماكتبته علي والرضاء بما قسمته لي ..
وابد الدنيا ماتستاهل من يتعب لها لانها دار فناء قال تعالى(ويبقى وجه ربك ذو الجلال والاكرام)
الله الله بالعمل الصالح اسال الله ان يحسن خاتمتنا ويتقبل صالح اعمالنا ويرزقنا الجنه اللهم آميـــــــــن يارب
سامحوني على الاطاله وعلى الكلام الثقيل
اللهم صلي على محمد..