الله يفرج هم اللي تفرج همي ، ردودكم راح تحدد مصيري!

بنات الله يخليكم ساعدوني انا مرررة محتارة وبس اهوجس وكوابيييييييييس طوووول الليل

تخيلوا يابنات اصحى بنص الليل بروح الحمام وانتم بكرامة ، ولما ارجع انام اقول ياربي ابغى احلم حلم ثاني غير الولادة خلاص طفشت من هالحلم خخخخخخخخخ

المهم بنوتات

انا متزوجة وساكنة بجدة مع أهل زوجي بعمارة وحدة
وأهلي في المدينة

طبعا انتو عارفين مستوى مستشفيات جدة مهما كانت خايسة اتوقع انها افضل من مستشفيات المدينة

بولادتي الاولى ولدت طبيعي الحمد لله في جدة وجات امي عندي اسبوع

صراحة تعذبنا شوي بسبب انه ماعندي شغالة وكانوا يجونا ضيوف وامي تقوم بكل شي غير الطبخ لي :cook: والعناية في بنتي وللاسف الموية دايما مقطوعة :06:

جلست اسبوع بعدين جيت المدينة وكملت نفاسي عند اهلي وطبعا تعب ثاني
ضيوف من اهل المدينة بس عالاقل اهون لانه فيه شغالة وفيه اخواتي يساعدوني

حاليا انا محتارة اولد في جدة ، ولا اولد في المدينة عند اهلي؟؟

المشكلة في المدينة ما اعرف دكاترة كويسين وخايفة من مستوى الطب ومستوى المستشفى عندهم والرعاية والاهتمام

بس انا مخططة اذا ولدت في المدينة اروح لدكتور ايمن عفيفي في المواساة بس مادري كيف مستوى المستشفى وكيف طاقم الممرضات وقت الولادة عندهم :D

اما في جدة فبروح لدكتور بهاء حماد في الالماني انا صراحة ارتاح للالماني تعامل الممرضات وقت الولادة جدا رائع صح خدمة الغرف مو ذاك الزود بس مو مشكلة

فايش رايكم يابنات؟

وفيه شي ثاني باستشيركم فيه

دحين انا عند اهلي من بداية حملي بسبب الدراسة

بس الترم الجاي بعتذر عن الدراسة بسبب الولادة

عاد انا كنت مخططة اجلس عند اهلي لين اولد واتنفس بعدين ارجع لزوجي بالاجازة الصيفية شهرين بعدين ارجع لاهلي اكمل دراستي

بس بنات خالتي ينصحوني اروح لزوجي دحين عشان لا يتعود على بعدي انا وبنته ويصير يفضل انه يتخلى عنا وعن مسؤليتنا :o

بس انا شايلة هم لانه ماعندي شغالة ، وبنتي صغيرة ، وانا اللي باهتم بكل شي لوحدي مافي احد يساعدني وتعرفوا كيف اهل الزوج لازم اذا دخلوا البيت يلاقوه نظيف :06:

وكمان شايلة هم اسافر له اربع ساعات واجلس عنده ثلاث اسابيع او شهر بعدين ارجع لاهلي اولد عندهم
يعني اذا رحت له اولد عنده ولا عند اهلي ؟

والله بموت حيرة وقلق ،، تقدروا تساعدوووني؟