الله يوفقكم ساعدوني ماني عارفه ايش ادخل تخصص في الجامعه!! الله يسكنكم الفردوس الاعلى

بسم الله الرحمن الرحيم
حبيباتي بنوتات حواء....من زمااااااان عنكم بسبب الدراسه والاختبارات المتواصله زي ما انتم عارفين النظام الجديد اللي طفشنا ..
وانا الحين ابغاكم تساعدوني ..وأبغى استشيركم..وأسألكم أسأله عن بعض الاقسام..

وأفهمكم بميولي..استحملوني يا حبايبي شوي معلش مرررررره محتاجتكم..

أولاً أنا متخرجه من تحفيظ القرآن الحمد لله يعني (قسم شرعي)وما أقدر ادخل شي علمي..

وانا في مكه .ومو عاجبني شي هنا من الاقسام..
ونفسي في علم الفرائض والمواريث اذا تعرفوه..وهذا في جده وكمان اعتقد انه في الكليه يعني مو تخصص دقيق كذا يعني يعتبر من المواد العامة.

أو تربية خاصه وما كان موجود هذا القسم الا في الرياض والحين الحمد لله فتح في الطايف على الاقل قريب شويه من مكه..

أو علاج طبيعي في جده كمان ..هذا قالتلي عليه صاحبة اختي تقول اختها بتدخله وهي زيي من مدرسة تحفيظ وناس ملتزمين تقول مافيه اختلاط زي الطب ولا شي يعني تمام ومحترم ان شاء الله.ومره دخل مزاجي عجبني..وأرتحتله...


وانا ماعندي مانع يعني اذا القسم مو في مكة..بس بابا كان مرره معارض ..بس دحين أحس انه هوّن شويه .وانا اللي اتراجعت ..عشان صاحباتي من أولى ابتدائي ما شاء الله. وبعضهم من الروضه. خصوصاً انه صديقتي الروح بالروح درسة الترم الثاني في نجران يعني بعدت عني ترم . ودحين انا كمان أبعد عنها في الجامعة!!! وهي مو من النوع اللي ينسجم مع المجتمع .ما تحب تكون الاّ معايا
وانا فكرت في هذا الشي كثير وقلت احسن لي ادرس في مكه اي قسم...

بس ماما واختي الكبيرة قالولي مستقبلك أهم .وميولك اللي انتي تبغيه لأنك لو دخلتي شي ما أتحبيه ما بترتاحي .وراح تواجهي صعوبات لا قدر الله ..وتقول ماما صحباتك ما عليك اخليك تزوريهم وقت ما تبغي ان شاء الله.

وانا مررررررررررررره محتاره لو أقلكم بكل شي ما راح أخلص وبتعبكم ,لكن هذا تقريباً باختصار
وأبغى أسمع نصايحكم وأرائكم وتوجيهاتكم.. خصوصاً في الاقسام اللي قلتلكم عليها يعني لو احد يعرف عنها شي . أو يعرف احد داخلها يسألي ولا يبخل علي بالنصيحة..الله يوفقكم والله أدعي لكل وحده ترد علي ..عاد انا في مكه الحمد لله وقت ما أروح الحرم والله لأدعيلها ربي يسهل امورها ويسعدها دنيا واخره ويسكنها الفردوس الاعلى يارب. واذا تعرفوا شي ثاني أحسن برضوا قولولي..
وجزاكم الله عني كل خير..