الله يوفقكم وعطيكم يلي ببالكم ساعدوني! مش قادرة أتحمل الوضع!

السلام عليكم.. أنا بنت عمري 21 سنة أكبر وحدة بإخواتي.. بدرس بجامعة برا مدينتي.. وماخدة سكن داخلي جوا الجامعة.. بس بالعطل برجع عل بيت ولما أرجع عل بيت طبعا منقضيها شغل أنا واخواتي (شغل بيت) وبمل كتير بالبيت.. وأنا بحس إنو البيت متل الحبس.. يعني ما بطلع بالمرة لانو ماما مش اجتماعية وهي مدرسة وما بتطلع كتير نادرا بتروح عند زميلاتها المعلمات بالمناسبات ( جمعة معلمات يعني).. وبتروح لعند تيتى كمان بس كمان هناك بمل لانو كإنا رحنا من حبس لحبس.. وشغل بيت كمان..

المنطقة اللي أنا ساكنة فيها الناس فيها متمسكين بالعادات والتقاليد ( مو دين لانو الدين يسر وتفريج عل عالم) تقاليد زي العمى بتضطهد البنت.. وما في مكان تطلع العيلة في مع بعضها يعني إزا كنت شب فيا نيالك وإزا كنت بنت فيا حسرتي عليك! مشان الله! مش قادرة أتحمل بدي أعيش متل العالم.. شو فيها لو رحت أنا وأختي لبيت تيتى مشي.. مع العلم إنو لبسي مستر ومعروفين مين إحنا بمنطقتي وما حدا برا بيسترجي يحكي معنا كلمة والله شاهد ع هل حكي..

بابا ما كان هيك.. ولا والمصيبة أخوي اللي أصغر مني بسنتين كمان ساير يتفلسف.. وهو بضلو للفجر برا وغالبا بابا ما بيحكي معو ولا كلمة.. حسبي الله ونعم الوكيل.. أنا بتخيل لو إنو لسا في ناس بتدفن بناتها كان بابا دفني وأنا صغيرة.. خايفة أبلش أكره بابا!! وأكره إخواني الذكور!! وإزا صحلي مصاري بضلو معي ما بعرف شو أشتري فيهم.. بيجي عباري أختار أنا شو بدي أساور أو سناك أو غيرو بس.....!!!!

بعرف إني طولت بالحكي وأفكاري مخربطة.. أنا أسفة وهاي أول مرة بفش غلي عل نت لانو ما في حدا أحكي معو!! بابا بميز بين البنات والشباب.. عمرو ما حضني إلا مرة وحدة لما ماتت عمتي لانها كانت تحبني أكتر اشي.. كان عمري 14 سنة.. ولا عمرو باسني.. وماما كمان بس بوسة ( خالية من الحنان) بالمناسبات! حتى بتزكر كنت مرة مريضة وببكي ولا عبرتني وطلعت لعند تيتى وخلتني بالبيت لحالي عم ببكي من الوجع..

مش طايقة البيت والله وعم بستنى إني أتزوج لانو بالسكن ضغط ودراسة صعبة وحاسة علاماتي عم تتراجع كنت إمتياز وهلأ جيد جداً! وبالبيت حبس! وكل ما حدا يتقدملي أو يحكو مع ماما بحكولهم لأ بتدرس! يا رب والله مخنوقة وأنا عم بكتب وأنا عم ببكي.. مشان الله حدا يرد علي.. والله اشتقت لمنظر السما والشجر.. والعصافير..