السلام عليكم
هذا النص لا اقول انه لامس قلبي بل اخترقني لان كل كلمه عشتها وحسيتها وعانيتها في كل لحظه من الليله الاولى ..
كثير مواقف تمر علينا قاسيه ولكن كل وحده فينا مرت عليها ليلة عن الف ليله
ودي لو كل وحده حابه تشاركنا في الموضوع بموقف حصل لها وكانت اقسى ليله مرت عليها وكيف نجت منها
...
ببدا انا
قبل ثلاث سنوات طلعنا سفره عائليه وكان فيها وحده اقرب لي من كلمة قريبه
احبها واعيش معها السعاده بكل لحظه ويومي مايكتمل من دونها لدرجة نتشارك الاكل وكل شي وما انام الا لما تنام وما اكل الا اذا صحت من النوم
المهم هي من اقترحت علي اسافر معهم وانا كنت ما ابي للامانه لان فيه اطراف ما ارتاح لهم في السفره فقلت علشان عيونها تكرم مدينه
فرحت معهم السفره استمرت اسبوع ولكن كانت اخر سفره لي معهم
قبل الرجوع بيوم حصل سوء فهم بيننا وذي القريبه انهالت علي بالشتائم والاتهامات وكلام باطل وشهادة زور
خلت الشامتين يشمتوا والكارهين يضحكوا وكلن من دلى بدلوه ولكن عند الله تجتمع الخصوم
انا اول مره انحط في موقف كذا كنت ادافع عن نفسي ولكن دموعي سبقتني
ومارضيت اسامحها لانها السبب في كل شي حصل وكانت السبب في جرح الاطراف الاخرى والتهامات الباطله
لكن بعد ما مرت الايام والسنوات سامحتها لوجه الله
بعد مارجعنا ذيك اليله ما قدرت انام لان حياتي صارت معكوسه طلعوا منها اطراف كانوا عايشين معي بسلام وطلعت من حياتي القريبه صارت ابعد من البعيد
طعمت الخذلان والظلم والقهر والكتمان ونظرات الشماته
ذيك اليله مانمت من قوة الوجع الي بقلبي كنت اطعم كل شي مر والجو يخنقني وكل شي حولي ضيق
مرت ثلاث ايام وانا طريحة الفراش بعدها اتقربت من الله اكثر واكثر وكنت اضاعف العبادات وكنت اتلذذ فيها لاني حسيت بالراحه
جبرني الله جبرا تعجب منه كل الي حولي والحمدلله ع كل حال
من يومها وعلاقتي مع كل الناس سطحيه
لان كذا اسلم لقلبي ومشاعري
...
