الليونه والمرونه هي سر نجاح العلاقة / قصة مع زوجي

صباح الخير بنات حواء ........ مع الصباح وبعد تسريح الاشبال لمدارسهم .حبيت اشاركم بقصه مع الملقب بأبو الشباب عسى تكون نافعه للجميع


من قبل الزواج ومع توصيات البنات المتزوجات والعازبات قررت ابني شخصيه قويه مع زوجي حتى اضمن حقي واحترامي وما اكون ضعيفه ولينه ... وفعلا بديت بهذي الشخصيه ومافي موقف يمر الا احاول اكون انا الصح (حتى لو الغلط مني) وأحجر لأبو الشباب بالتبريرات والمنطق حتى الاحظ انه ضاع واكسب الموقف ...بدأ يرفع صوته بعض الاحيان وارد الصوت بمثله واذا سكن سكنت واذا طنش طنشت حتى يضطر يعتذر وارحب باعتذاره حتى ما ينكسر وما يقطع هالعاده
وما اخفيكن اني لاحظته يحسب حسابي بمواقف كثيره وياخذ رأيي قبل اي قرار .
لكن يا بنات والله ما حسيت معاه بمشاعر يعني العلاقه وصلت الى ان كل واحد يحفظ احترام الثاني وحقوق وواجبات ما حسيت فيه مشاعر وعاطفه الا اذا بادرت انا ويتحجج بان الحب في القلب ووووو الخ .
وحطيت هالمشكله في راسي أبحث عن حل واحاول اكسب قلبه ....... ومع الايام اختلفنا بموضوع واتخذ العاده الاوله يرفع صوته ويتكلم بشده لانه تعود مني العناد وكنت ساكته طول الطريق لاني وحام واحس بغثيان ولافيني خلق اجادله
فجأه من نفسه اعتذر ونزل محل خضار يشتري لي فواكه احبها هههههه .
ومن كلامه انه قدر مني احترامه واني ما رديت عليه فاستحى على قولته ......بعدها صرت في كل مره يحتد فيها الخلاف اسكت وألين واترك العاصفة تمر بهدوء , ولمن يهدأ ارجع اناقشه صحيح فيه شوية عناد لكن فيه حنان بالتعامل ورفق
والحمد لله تغير معاي وبانت مشاعره وحسيته يعاملني وكأني بنته .
النتيجه
العناد وفرض القوه والعصبيه ما تنفع تكون للانثى ..لابد نفهم وندرك ان الله خلق الانثى لينه وهذي الليونه والمرونه تخضع جبابرة الرجال (وهذه هي الكيمياء الحقيقيه والواقعيه بين الذكر والانثى)




ملاحظه : المرونه والليونه لا تنفع الا مع الرجال وليس اشباه الرجال
الرجل الذي لا يخاف الله و لا يصلي ولا يملك اخلاق هذا مافيه طب الا ان يهديه الله .