اللي أعتمرت تدخل تسوالف لنا عن عمرتها

السلام عليكم

أنا أعتمرت أمس والحمدالله

وبسوالف لكم عن عمرتي وأنتم بدوركم كل وحده أعتمرت في رمضان هذا مو العام وقبل العام واللي متعيجزه تسوالف بس تقول هي أعتمرت ولا باقي

الفكره من الموضوع علشان نشوف كم عضوة من عالم حواء أعتمرت واللي ناويه تعتمر أن شاء الله تقول .

أنا أعتمرت بعد صلاة العصر مباشرة وكانت زحمة وشمس صكت في راسي وعصبت على زوجي أنه أختار هذا الوقت بس بعد المغرب لما ناظرت للكعبه من فوق وشفت الزحمة الصدق الناس مشاء الله من كثرهم كنهم نمل والصحن تعبى على الأخير قلت الحمدالله الشمس ولا هالزحمه .

وبعد الطواف أنهد حيلي وقال زوجي تبين عربيه كابرت وقلت لا لا وبعدين هو شافني أترنح وراح وأتفق مع حق العربيات وركبني ومشى فيني حق العربيات والله ياهو فحط فيني تفحيط مو صاحي لدرجة كل شوي يصدم بناس وأنا رفعت رجيلتي خفت يتكسرون من كثر ماصدم فيني وكل شوي معور رجليني خفت يرحون ملح :hahaha::06:

وبعد ماخلصنا جاء دور ولدي الكبير لأننا جلسناه بالحرم عند أخونه الصغار وجاء دوره وأخذ جوالي لأن جواله طفى شحنه .وأنا رحت جلست عند الحريم وبعد صلاة المغرب جيت جلست قريب من مكان الرجال علشان قريب من زوجي اذا جاء ولدي نمشي لدريتنا وجاء الشيخ وهاوشني وقال روحي أجلسي بمكان الحريم وخلال هذا الوقت جت عجوز مصريه تسئلني تقول هم متجمعين هنا ليه وتأشر على الكعبه الله يشرفها أنا فتحت فمي وقلت (نعم ) هي قالت هو الحجر الأسود هنا ؟؟!! علشان كذا متجمعين مره ثانيه قلت هه نعم مااأستوعبت قلت الكعبه هنا قبل الحجر الأسواد ومشت ولحقتها أبغى أشوف وش قصتها ؟؟ قلت أنتي ليش جايه ؟؟!! وألف علامة أستفهام براسي وماردت علي ورحت وخلتني وأنا ودي أفهم قصتها معقوله مو عارفه الكعبه وتفكر الحجر الأسواد هو بس المهم ؟؟!!

المهم أخذت بنتي ورحت لمكان الحريم دخلت الجهه المقابله لزوجي علشان يناديني بسهوله لما نبغى نمشي ولقيت المكان زحمة مره الحريم فوق بعض وتضايقوا مني وطلعت ورحت أخر المكان وبالموت لقيت لي مكان وجلست وبنتي نامت وماقدرت أطلع كل شوي لزوجي أشوف ولدي جاء أو لا وبعد صلاة العشاء تجراءت وطلبت من الحرمه اللي تصلي بجنبي جوالها قلت لها بس مس كول بس وكانت مصريه وقالت أصلي أمي هنا مش عارفه فينها وسوت نفسها بتروح أدور على أمها وطنشتني وتعقدت بعدها أني أطلب جوال من أحد وكملت صلاة التروايح كلها وأنا قلاقنه لأنهم أكيد بيدورون علي وبعدين صلت وحده سعوديه وطلبت جوالها وأتصلت على زوجي أثناء أستراحة التروايح بس كانت الشبكه ماتغطي وجوالها موبايلي وكملت كل التروايح يعني لساعه 11 ليلا وبعدين قمت لقيت ولدي منهد حيله وهو يدور علي قلت له أنت السبب كان شحنت جوالك وريحتنا من هالبهذاله كلها

الله يعطيه العافيه اللي أخترع الجوال الصراحه أهم أختراع .

يلا معاكم المايك أحكوا لنا عن عمرتكم هذي السنه (رمضان)

والله يكتب للجميع العمره بصحه وسلامه يارب